દિલ્હીમાં મનીષ પોલના માતાનું અવસાન, પરિવાર અને ચાહકોમાં શોક
ટેલિવિઝન હોસ્ટ અને અભિનેતા મનીષ પોલના માતા ઉર્મિલ પોલનું બુધવારે નવી દિલ્હીમાં નિધન થયું છે. તેઓ 76 વર્ષના હતા. મનીષ પોલની ટીમે સત્તાવાર નિવેદન જાહેર કરીને આ દુઃખદ સમાચારની પુષ્ટિ કરી છે. જોકે, પરિવાર તરફથી હજુ સુધી તેમના નિધનનું કારણ જાહેર કરવામાં આવ્યું નથી.
ટીમે સત્તાવાર નિવેદન જાહેર કર્યું
મનીષ પોલની ટીમે નિવેદનમાં જણાવ્યું કે, "ખૂબ જ દુઃખ સાથે જણાવવું પડે છે કે મનીષ પોલના માતાનું આજે દિલ્હીમાં અવસાન થયું છે. અમે સૌને તેમના દિવંગત આત્માની શાંતિ માટે પ્રાર્થના કરવાની વિનંતી કરીએ છીએ."
આ સમાચાર સામે આવ્યા બાદ ફિલ્મ અને ટેલિવિઝન ઇન્ડસ્ટ્રીના અનેક કલાકારો તેમજ ચાહકોએ સોશિયલ મીડિયા પર મનીષ પોલ અને તેમના પરિવાર પ્રત્યે શોક વ્યક્ત કર્યો.
માતા સાથે હતો ખાસ સંબંધ
મનીષ પોલ પોતાના માતાની ખૂબ નજીક હતા. તેઓ ઘણીવાર સોશિયલ મીડિયા પર માતા સાથેની તસવીરો અને વીડિયો શેર કરતા હતા. વર્ષ 2022 માં માતાના જન્મદિવસે મનીષે એક ભાવુક પોસ્ટ શેર કરી હતી. તેમાં તેમણે લખ્યું હતું કે, "મને બિન્દાસ રહીને જીવન જીવતા શીખવવા બદલ તમારો આભાર." આ પોસ્ટ ચાહકોમાં પણ ઘણી ચર્ચામાં રહી હતી. ઉર્મિલ પોલના પરિવારમાં તેમના પતિ જગમોહન પોલ, પુત્રી જ્યોતિ પોલ મોહન તેમજ પુત્રો મનીષ પોલ અને વિવેક પોલ છે.
આરજેથી લઈને લોકપ્રિય હોસ્ટ બન્યા
મનીષ પોલે પોતાની કારકિર્દીની શરૂઆત રેડિયો જોકી (RJ) અને વિડિયો જોકી (VJ) તરીકે કરી હતી. ત્યારબાદ તેમણે એક્ટિંગ, હોસ્ટિંગ અને સ્ટેન્ડ-અપ કોમેડીમાં પોતાની અલગ ઓળખ બનાવી. તેઓ 'સા રે ગા મા પા છોટે ઉસ્તાદ', 'ઝલક દિખલા જા', 'ડાન્સ ઇન્ડિયા ડાન્સ લિટલ માસ્ટર્સ' અને 'નચ બલિયે' જેવા અનેક લોકપ્રિય રિયાલિટી શોના હોસ્ટ રહી ચૂક્યા છે. ઉપરાંત તેમણે 'રાધા કી બેટિયાં કુછ કર દિખાએંગી', 'શશશ... ફિર કોઈ હૈ' અને 'ઘર-ઘર મેં' જેવી ટીવી સિરિયલોમાં પણ અભિનય કર્યો છે. વર્ષ 2013માં આવેલી ફિલ્મ 'મિકી વાયરસ'થી તેમણે મુખ્ય અભિનેતા તરીકે બોલિવૂડમાં ડેબ્યૂ કર્યું હતું.
તાજેતરમાં આ પ્રોજેક્ટમાં જોવા મળ્યા
તાજેતરમાં મનીષ પોલ ફિલ્મ 'હૈ જવાની તો ઇશ્ક હોના હૈ'માં વરુણ ધવન સાથે જોવા મળ્યા હતા. તેઓ આજે પણ ભારતીય ટેલિવિઝનના સૌથી લોકપ્રિય હોસ્ટમાંના એક માનવામાં આવે છે.
