શિયાળામાં ઘરે બનાવો ગાજરના રસભર્યા ગુલાબ જામુન : સ્વાદ એવો કે આંગળા ચાટી જશો! જાણો મનમોહક રેસીપી

Carrot Gulab Jamun Recipe: શિયાળાની મોસમ આવી કે તરત જ ઘરે ગાજરનો હલવો બનવા માંડે, પણ આ વખતે કંઈક એવું બનાવો કે બધા આંગળા ચાટતા રહી જાય! ગાજરમાંથી બનતા આ સોફ્ટ-જ્યુસી ગુલાબ જામુન એકદમ અલગ અને ઝડપી બની જાય છે. બસ 30-40 મિનિટમાં તૈયાર, અને સ્વાદ એવો કે દરેક પૂછે “આ શું બનાવ્યું છે?!”

જરૂરી સામગ્રી

ગાજર (બાફેલા અને છીણેલા) – 2 કપ

ખોયા (માવો) – 1 કપ

મેદો – 2-3 ચમચી (જરૂર પ્રમાણે)

ખાંડ (ચાસણી માટે) – 1 કપ

પાણી (ચાસણી માટે) – 1 કપ

એલચી પાવડર – 1/2 ચમચી

ઘી અથવા તેલ – તળવા માટે

પિસ્તા-બદામ – સજાવટ માટે

બનાવવાની સરળ રીત

એક તારની ચાસણી બનાવો

કડાઈમાં 1 કપ ખાંડ + 1 કપ પાણી મૂકીને ગરમ કરો. ખાંડ ઓગળે અને એક તાર જેવી ચાસણી બને ત્યાં સુધી ઉકાળો. એલચી પાવડર નાખી ગેસ બંધ કરી દો.

ગાજર-ખોયાનું મિશ્રણ તૈયાર કરો

કડાઈમાં 1-2 ચમચી ઘી ગરમ કરી છીણેલા ગાજર 2-3 મિનિટ તળો. ખોયા નાખી સારી રીતે મિક્સ કરો અને ઘટ્ટ થાય ત્યાં સુધી હલાવતા રહો. ગેસ બંધ કરી થોડું ઠંડું થવા દો. ઠંડું થાય પછી 2-3 ચમચી મેદો અને થોડી એલચી પાવડર નાખી નરમ લોટ બાંધો. (જો ચોંટે તો થોડો વધુ મેદો નાખજો, પણ વધારે નહીં જામુન સખત થઈ જશે)

ગોળા વણો અને તળો

નાના-નાના ગોળા બનાવો (ફાટે નહીં એનું ધ્યાન રાખજો). કડાઈમાં ઘી/તેલ મધ્યમ-ધીમી આંચે ગરમ કરો અને ગોળ્ડન બ્રાઉન થાય ત્યાં સુધી ધીમે-ધીમે તળો. વધુ ગરમ તેલમાં નાખશો તો અંદર કાચા રહી જશે.

ચાસણીમાં પલાળો

તળેલા જામુન તરત જ ગરમ ચાસણીમાં નાખી દો. ઓછામાં ઓછા 15-20 મિનિટ કે 1 કલાક પલાળો જેથી ચાસણી સારી રીતે અંદર સુધી જાય અને જામુન ફૂલી જાય.

સજાવો અને પીરસો

પિસ્તા-બદામની કતરણ છાંટીને ગરમ-ગરમ કે ઠંડા પીરસો.

આ ગાજરના ગુલાબ જામુન એટલા સોફ્ટ અને જ્યુસી બને છે કે એક વાર બનાવશો તો હલવો બનાવવાનું ભૂલી જશો!

આજે જ અજમાવી જુઓ અને ઘરના બધાને સરપ્રાઇઝ આપો!