Government Jobs 2026: સરકારી નોકરીની આતુરતાથી તૈયારી કરી રહેલા લાખો યુવાનો માટે સ્ટાફ સિલેક્શન કમિશન (SSC) દ્વારા એક મહત્વના અને આનંદના સમાચાર આપવામાં આવ્યા છે. કમ્બાઈન્ડ ગ્રેજ્યુએટ લેવલ (CGL) 2025ની ચાલી રહેલી ભરતી પ્રક્રિયામાં કમિશને ખાલી પદોની સંખ્યામાં મોટો વધારો કર્યો છે. અગાઉ જાહેર કરવામાં આવેલી 14,582 જગ્યાઓને વધારીને હવે કુલ 15,130 કરી દેવામાં આવી છે. આ ફેરફારને કારણે વધુ ઉમેદવારોને કેન્દ્ર સરકારના પ્રતિષ્ઠિત વિભાગોમાં નોકરી મેળવવાની તક મળશે.
આ ભરતી પ્રક્રિયા દ્વારા કેન્દ્ર સરકારના વિવિધ 58 પ્રકારના ગ્રુપ-બી અને ગ્રુપ-સી પદો પર નિમણૂક કરવામાં આવશે. પસંદગી પામેલા ઉમેદવારોને પે-લેવલ 4 થી 7 મુજબ આકર્ષક પગાર ધોરણ મળવાપાત્ર થશે, જેમાં લઘુત્તમ 25,500 રૂપિયાથી લઈને મહત્તમ 1,42,400 રૂપિયા સુધીનો પગાર સામેલ છે. અત્યારે ભરતી પ્રક્રિયા તેના અંતિમ તબક્કામાં છે અને કમિશને ઉમેદવારો પાસેથી વિભાગીય પસંદગી (Preference) માંગવાની પ્રક્રિયા આજથી એટલે કે 9 માર્ચ, 2026થી શરૂ કરી દીધી છે.
પ્રેફરન્સ ફોર્મ ભરવું કેમ ફરજિયાત છે?
SSC એ સ્પષ્ટતા કરી છે કે જે ઉમેદવારો 18 થી 20 જાન્યુઆરી, 2026 દરમિયાન યોજાયેલી ટિયર-2 પરીક્ષામાં હાજર રહ્યા હતા, તેમણે 'ઓપ્શન-કમ-પ્રેફરન્સ' ફોર્મ ભરવું અનિવાર્ય છે. આ પ્રક્રિયા અંતિમ પરિણામ જાહેર કરતા પહેલાંની સૌથી મહત્વની કડી છે. જો કોઈ ઉમેદવાર આ સમયમર્યાદામાં પોતાની પસંદગીના પદોની પ્રાથમિકતા આપવાનું ચૂકી જશે, તો કમિશન દ્વારા તેના પરિણામની પ્રક્રિયા આગળ વધારવામાં આવશે નહીં. એટલે કે, ટિયર-2માં ગમે તેટલા સારા માર્ક્સ હોય તો પણ જો પ્રેફરન્સ ફોર્મ નહીં ભર્યું હોય તો ઉમેદવાર ગેરલાયક ઠરશે.
મહત્વની તારીખો અને કઈ રીતે કરશો લોગિન?
ઉમેદવારો માટે પ્રેફરન્સ વિન્ડો આજથી ખૂલી ગઈ છે. તેની વિગતો નીચે મુજબ છે:
શરૂઆતની તારીખ: 9 માર્ચ, 2026
અંતિમ તારીખ: 12 માર્ચ, 2026 (સાંજે 6:00 વાગ્યા સુધી)
સત્તાવાર વેબસાઈટ: ssc.gov.in
ઉમેદવારોએ વેબસાઈટ પર જઈને પોતાના યુઝર આઈડી અને પાસવર્ડથી લોગિન કરવાનું રહેશે. ત્યારબાદ ડેશબોર્ડ પર આપેલા ઓપ્શન દ્વારા પોતાની પસંદગીના વિભાગો અને પદોને ક્રમબદ્ધ ગોઠવવાના રહેશે. યાદ રાખજો કે આ છેલ્લી તક છે, ત્યારબાદ કોઈ સુધારો કે વધારાની તક આપવામાં આવશે નહીં.
કેટેગરી મુજબ ખાલી જગ્યાઓની વિગત
કુલ 15,130 જગ્યાઓનું વર્ગીકરણ કમિશન દ્વારા નીચે મુજબ કરવામાં આવ્યું છે:
કેટેગરી | જગ્યાઓની સંખ્યા |
બિન-અનામત (UR) | 6,464 |
ઓબીસી (OBC) | 3,834 |
એસસી (SC) | 2,223 |
ઈડબલ્યુએસ (EWS) | 1,475 |
એસટી (ST) | 1,134 |
કુલ | 15,130 |
