મુંબઈ: ગ્લેમર વર્લ્ડની સૌથી પ્રતિષ્ઠિત ઇવેન્ટ ગણાતા 'લેક્મે ફેશન વીક 2026' (LFW) નો મુંબઈના જિયો વર્લ્ડ કન્વેન્શન સેન્ટર ખાતે ધમાકેદાર પ્રારંભ થયો છે. ૧૯ માર્ચથી શરૂ થયેલા આ પાંચ દિવસીય ફેશન ઉત્સવના પ્રથમ દિવસે જ બોલિવૂડ સેલેબ્સ અને જાણીતા ડિઝાઇનર્સે પોતાના અનોખા અંદાજથી રેમ્પ પર આગ લગાવી દીધી હતી. આ વર્ષે ફેશન વીકમાં ટ્રેડિશનલ કલ્ચર અને મોડર્ન સ્ટાઇલનું એવું ફ્યુઝન જોવા મળ્યું છે, જેણે ફેશન પ્રેમીઓને મંત્રમુગ્ધ કરી દીધા છે.
પ્રથમ દિવસે બી-ટાઉનની યંગ સેન્સેશન અનન્યા પાંડે, ટેલેન્ટેડ એક્ટ્રેસ રાધિકા મદાન અને સાઉથ સ્ટાર સિદ્ધાર્થ જેવા દિગ્ગજોએ શો-સ્ટોપર બનીને મહેફિલ લૂંટી લીધી હતી. આ ઉપરાંત, સોશિયલ મીડિયા પર અત્યારે જેની સૌથી વધુ ચર્ચા છે તેવી મોડલ અને ક્રિકેટર હાર્દિક પંડ્યાની ગર્લફ્રેન્ડ માહિકા શર્મા પણ અનામિકા ખન્નાના શોમાં આકર્ષણનું કેન્દ્ર બની હતી.
અનામિકા ખન્નાના શોમાં માહિકા શર્માનો ગ્લેમરસ લુક
પ્રથમ દિવસનું શાનદાર સમાપન ભારતની દિગ્ગજ ડિઝાઇનર અનામિકા ખન્નાના કલેક્શન 'AK|OK' સાથે થયું હતું. આ શોમાં મોડલ માહિકા શર્મા અનામિકાના ખાસ આઉટફિટમાં રેમ્પ પર ઉતરી હતી. માહિકાએ તેના ગ્રેસફુલ વોક અને વર્સેટાઇલ લુકથી બધાનું ધ્યાન ખેંચ્યું હતું. અનામિકાના આ કલેક્શનમાં ધોતી પેન્ટ, રફલ્ડ ટોપ અને ફ્લોર લેન્થ ગાઉન્સ પર વિશેષ ફોકસ કરવામાં આવ્યું હતું, જે આરામદાયક હોવાની સાથે સાથે અત્યંત સ્ટાઇલિશ પણ હતા.
સિદ્ધાર્થનો 'દેશી' અંદાજ અને મેન્સવેરનો ટ્રેન્ડ
મેન્સવેર સેગમેન્ટમાં 'ધ બોયઝ ક્લબ' હેઠળ ડિઝાઇનર વિવેક કરુણાકરન માટે એક્ટર સિદ્ધાર્થ શો-સ્ટોપર બન્યો હતો. સિદ્ધાર્થે બ્રાઉન સિલ્ક કોટ અને ડ્રેપ્ડ ધોતી પેન્ટ સાથે 'અર્થી ટોન' લુક રજૂ કર્યો હતો. તેની સાદગી અને રોયલ લુકને દર્શકોએ ખૂબ જ પસંદ કર્યો હતો. આ ઉપરાંત ધ્રુવ વૈશ અને સાહિલ અનેજા જેવા ડિઝાઇનર્સે પુરુષો માટે ફ્યુચરિસ્ટિક ફેશન ટ્રેન્ડ્સ રજૂ કર્યા હતા.
ગૌરી ખાન અને અન્ય સેલેબ્સની હાજરી
આ ઇવેન્ટમાં માત્ર રેમ્પ પર જ નહીં, પણ ફ્રન્ટ રોમાં પણ સિતારાઓનો મેળાવડો જામ્યો હતો. શાહરૂખ ખાનની પત્ની અને ઇન્ટિરિયર ડિઝાઇનર ગૌરી ખાન ખાસ હાજર રહી હતી. આ ઉપરાંત કુબ્રા સૈત વ્હાઇટ આઉટફિટમાં, ડેઝી શાહ ગ્લેમરસ અંદાજમાં અને સિંગર પપોન પોતાની પત્ની સાથે ઇવેન્ટમાં જોવા મળ્યા હતા. અનન્યા પાંડેએ પોતાની અદાઓથી રેમ્પ વોક દરમિયાન ફેન્સના દિલ જીતી લીધા હતા.
સાડી અને મોડર્ન ડિઝાઇનનો તાલમેલ
ડિઝાઇનર જોડી અબ્રાહમ એન્ડ ઠાકુરે ફ્રેન્ચ બ્રાન્ડ સાથે મળીને 'સાડી-ટોરિયલ' કલેક્શન રજૂ કર્યું હતું. જેમાં ભારતીય પરંપરાગત સાડીને મોડર્ન ફ્રેન્ચ ટચ આપીને નવો લુક આપવામાં આવ્યો હતો. તો બીજી તરફ 'ચોલા' બ્રાન્ડે બ્લેક અને વ્હાઇટ (મોનોક્રોમ) થીમ પર બોલ્ડ ડિઝાઇન પ્રદર્શિત કરી હતી. આગામી ૪ દિવસમાં હજુ પણ અનેક મોટા સ્ટાર્સ રેમ્પ પર વોક કરતા જોવા મળશે.
