Kuldeep Yadav's wedding : ભારતીય ક્રિકેટ ટીમના સ્ટાર સ્પિનર કુલદીપ યાદવ હાલમાં પોતાની જિંદગીની નવી ઇનિંગ શરૂ કરવા જઈ રહ્યા છે. ઉત્તરાખંડના મસૂરીમાં આવેલી આલીશાન હોટેલ ITC સેવોય ખાતે કુલદીપ યાદવ અને વંશિકા સિંહના લગ્નના ધમધમાટ શરૂ થઈ ચૂક્યા છે. T20 વર્લ્ડ કપ 2026 જીત્યા બાદ કુલદીપ યાદવના ઘરે આ ડબલ ખુશીનો માહોલ છે, જેમાં ક્રિકેટ અને મનોરંજન જગતની હસ્તીઓ હાજરી આપી રહી છે.
મસૂરીમાં મંગલ પ્રારંભ
લગ્નના મુખ્ય કાર્યક્રમો 12 માર્ચથી શરૂ થયા હતા. આજે 13 માર્ચના રોજ સવારે 11 વાગ્યાથી હોટેલના બીયર ગાર્ડનમાં હલ્દીની વિધિ યોજાઈ હતી. કુલદીપ યાદવ ગ્રીન કુર્તા અને વ્હાઇટ પાયજામામાં જોવા મળ્યો હતો. હલ્દી બાદ મહેમાનોએ ડાન્સ અને મસ્તી સાથે કાર્યક્રમનો આનંદ માણ્યો હતો.
દિગ્ગજ મહેમાનોની હાજરી
આ રોયલ વેડિંગમાં હાજરી આપવા માટે રિંકુ સિંહ તેની મંગેતર પ્રિયા સરોજ સાથે પહોંચ્યો છે. આ ઉપરાંત યુઝવેન્દ્ર ચહલે પણ હાજરી આપી છે અને તેણે ઉત્સાહમાં કહ્યું કે, "ભાઈના લગ્ન છે, ફૂલ ડાન્સ થશે." ટીમ ઈન્ડિયાના ફિલ્ડિંગ કોચ ટી દિલીપ પણ મસૂરી પહોંચી ગયા છે, જ્યારે રોહિત શર્મા, સૂર્યકુમાર યાદવ અને ગૌતમ ગંભીર શનિવારે લગ્નમાં પહોંચે તેવી શક્યતા છે.
શાહી મેનૂ અને મોંઘી મિજબાની
લગ્નમાં આવનારા મહેમાનો માટે ખાસ 'પ્લેટિનમ' અને 'ગોલ્ડ' મેનૂ તૈયાર કરવામાં આવ્યું છે. જાણવા મળ્યું છે કે, અહીં એક થાળીની કિંમત 20 હજાર રૂપિયાથી વધુ છે. મેનૂમાં પ્રીમિયમ સ્કોચ, વાઇન અને શેમ્પેન જેવી મોંઘી બ્રાન્ડ્સની ડ્રિંક્સનો સમાવેશ કરાયો છે. ભોજનમાં 4 વેજ, 4 નોન-વેજ, 8 પ્રકારના પ્રીમિયમ સલાડ, 1 વેજ સૂપ, 1 નોન-વેજ સૂપ અને અનેક સ્પેશિયલ ડિશ પીરસવામાં આવી રહી છે.
દુલ્હનનો લક્ઝુરિયસ લુક
કુલદીપ યાદવની ભાવિ પત્ની વંશિકા સિંહ મહેંદી સેરેમનીમાં આશરે 80,000 રૂપિયાની કિંમતના 'નાયરા ફરશી સલવાર સૂટ'માં જોવા મળી હતી. ચેરી કલરના આ આઉટફિટમાં તે ખૂબ જ સુંદર લાગી રહી હતી. બંનેની જોડીને સોશિયલ મીડિયા પર ફેન્સ દ્વારા ખૂબ જ પસંદ કરવામાં આવી રહી છે.
લગ્નનું સંપૂર્ણ શિડ્યુલ
લગ્ન માટે ખાસ #Kulvansh હેશટેગ તૈયાર કરવામાં આવ્યું છે. મુખ્ય લગ્ન વિધિ 14 માર્ચના રોજ યોજાશે.
તારીખ | સમય | કાર્યક્રમ |
|---|---|---|
13 માર્ચ | સવારે 11:00 | હલ્દી સેરેમની (પૂર્ણ) |
13 માર્ચ | સાંજે 06:00 | સંગીત અને કોકટેલ પાર્ટી |
14 માર્ચ | સાંજે 04:00 | સાફા બંધાઈ વિધિ |
14 માર્ચ | સાંજે 05:00 | જાન પ્રસ્થાન (ઘોડી ચઢવા) |
14 માર્ચ | સાંજે 06:00 | વરમાળા |
14 માર્ચ | રાત્રે 08:00 | સાત ફેરા (લગ્ન) |
લખનઉમાં ગ્રાન્ડ રિસેપ્શન
મસૂરીમાં ખાનગીમાં લગ્ન કર્યા બાદ, 17 માર્ચે લખનઉની હોટેલ સેન્ટ્રમમાં એક ભવ્ય રિસેપ્શન પાર્ટીનું આયોજન કરવામાં આવશે. આ રિસેપ્શનમાં ક્રિકેટ, રાજકારણ અને વેપાર જગતના મોટા નામો હાજરી આપશે તેવી શક્યતા છે.
