Russian President Vladimir Putin Shedule: રશિયાના રાષ્ટ્રપતિ વ્લાદિમીર પુતિન ગઈકાલે દિલ્હીમાં લેન્ડ થયા અને વડા પ્રધાન મોદીએ તેમનું સ્વાગત કર્યું હતું. સાંજે, પીએમ મોદીએ પુતિન સાથે ડિનરનું આયોજન કર્યું હતું. પુતિનની મુલાકાતનો મુખ્ય ઉદ્દેશ્ય ભારત-રશિયા વ્યૂહાત્મક અને આર્થિક ભાગીદારીને મજબૂત બનાવવાનો છે, ખાસ કરીને એવા સમયે જ્યારે ભારતના યુનાઇટેડ સ્ટેટ્સ સાથેના સંબંધો ઝડપથી બગડ્યા છે. જ્યારે વડા પ્રધાન નરેન્દ્ર મોદી આજે તેમના સન્માનમાં એક ખાનગી રાત્રિભોજનનું આયોજન કરશે, શુક્રવાર સૌથી મહત્વપૂર્ણ દિવસ હશે. શુક્રવારની સમિટ સંરક્ષણ સહયોગ વધારવા, બાહ્ય દબાણથી દ્વિપક્ષીય વેપારને બચાવવા અને નાના મોડ્યુલર રિએક્ટરમાં સંભવિત સહયોગ પર ધ્યાન કેન્દ્રિત કરે તેવી શક્યતા છે. પશ્ચિમી દેશો આ વાટાઘાટો પર નજીકથી નજર રાખશે.
આ મુલાકાત એવા સમયે થઈ રહી છે જ્યારે અમેરિકાએ ભારતીય માલસામાન પર 50 ટકાનો જંગી ટેરિફ લાદ્યો છે, જેમાં રશિયન ક્રૂડ ઓઇલની ખરીદી પર 25 ટકા ડ્યુટીનો પણ સમાવેશ થાય છે, જેના કારણે ભારત-અમેરિકા સંબંધો છેલ્લા બે દાયકામાં કદાચ સૌથી ખરાબ તબક્કાનો સામનો કરી રહ્યા છે.
આજે પુતિનના પ્રવાસનો સંપૂર્ણ કાર્યક્રમ (5 ડિસેમ્બર 2025)
આજે વડા પ્રધાન મોદી સાથેની બેઠકમાં અનેક ક્ષેત્રો પર વાટાઘાટો થવાની અને વેપાર, સંરક્ષણ અને ઊર્જા સંબંધિત ઘણા કરારો પર હસ્તાક્ષર થવાની અપેક્ષા છે. એવામાં આજે પુતિન સવારે 11:00 વાગ્યે સેરેમોનિયલ વેલકમ (ઔપચારિક સ્વાગત) માં ભાગ લેવા માટે રાષ્ટ્રપતિ ભવન જશે. ત્યાર બાદ સવારે 11:30 વાગ્યે પુષ્પાંજલિ અર્પણ કરવા માટે રાજઘાટની મુલાકાત લેશે.
રાજઘાટની મુલાકાત બાદ 11:50 વાગ્યે વડા પ્રધાન નરેન્દ્ર મોદી સાથે દ્વિપક્ષીય બેઠક યોજાશે. ત્યારબાદ બપોરે 1:50 વાગ્યે હૈદરાબાદ હાઉસમાં સંયુક્ત પ્રેસ કોન્ફરન્સ યોજાશે, જ્યાં મુખ્ય જાહેરાતો થવાની સંભાવના છે.
સાંજે દ્રૌપદી મુર્મુ સાથે મુલાકાત બાદ રશિયા માટે રવાના
રશિયન રાષ્ટ્રપતિ પુતિન શુક્રવારે સાંજે 7:00 વાગ્યે ભારતના રાષ્ટ્રપતિ દ્રૌપદી મુર્મુ સાથે મુલાકાત કરવા માટે રાષ્ટ્રપતિ ભવન જશે. ત્યારે બાદ રાત્રે 9:00 વાગ્યે ભારતમાંથી રશિયા માટે પ્રસ્થાન કરશે અને તેમનો પ્રવાસ સમાપ્ત થશે.
