કર્ણાટક હાઈકોર્ટએ સેન્ટ્રલ મોટર વ્હીકલ્સ નિયમના પાલનને લઈને રાજ્ય સરકારને તરત જ અસરકારક પગલાં લેવાનો નિર્દેશ આપ્યો છે. હાઈકોર્ટની ટકોર બાદ ટ્રાફિક વિભાગે નિયમોના કડક અમલ માટે મોનિટરિંગ વધારી દીધું છે અને બે વ્હીલર પર સલામતી સાધનો વિના બાળકોને લઈ જતાં વાલીઓ સામે દંડની કાર્યવાહી શરૂ કરી છે.
રાજ્ય સરકાર આગામી છ મહિનામાં બાળ હેલ્મેટ સંબંધિત નિયમોમાં ફેરફાર રજૂ કરવાની તૈયારીમાં છે. નવા પ્રાવધાન હેઠળ 9 મહિનાથી 4 વર્ષની વય ધરાવતા બાળકોને ટુ વ્હીલરના પિલિયન સીટ પર મુસાફરી કરતી વખતે હેલ્મેટ પહેરવું જરૂરી થશે. બેંગલુરુના સંયુક્ત ટ્રાફિક પોલીસ કમિશનર કાર્તિક રેડ્ડીના જણાવ્યા મુજબ નાની ઉંમરના બાળકો પણ અકસ્માત સમયે ગંભીર જોખમમાં આવી શકે છે, તેથી સલામતી માટે હેલ્મેટ અવશ્યક ગણાશે.
બજારમાં બાળકો માટે ખાસ બનાવાયેલા હળવા વજનના હેલ્મેટ લગભગ ₹1000ના દરે ઉપલબ્ધ હોવાથી, પોલીસ અધિકારીઓએ વાલીઓને જવાબદારીપૂર્વક આ નિયમનું પાલન કરવા અપીલ કરી છે. તેમનું માનવું છે કે બેંગલુરુ જેવા મેટ્રો શહેરોમાં અનેક વાલીઓ હજુ પણ સલામતી સાધનોને પ્રાથમિકતા આપતા નથી, જેના કારણે જાગૃતિ અભિયાન વધુ મહત્વનું બની રહ્યું છે.
ટ્રાફિક વિભાગે તાજેતરમાં નિયમ પાલન વધારવા માટે અનેક પહેલો શરૂ કરી છે. આમાથી 'એક દિવસ માટે પોલીસમેન બનો' નામનો કાર્યક્રમ ખાસ ધ્યાન ખેંચી રહ્યો છે, જેમાં નાગરિકોને ટ્રાફિક વ્યવસ્થાપનનો વાસ્તવિક અનુભવ આપવામાં આવે છે. ભાગ લેનારાઓને કાર્યક્રમ પૂર્ણ થયા બાદ પ્રમાણપત્ર આપવામાં આવે છે અને તેનું રજીસ્ટ્રેશન BTP ASTraM એપ મારફતે થઈ શકે છે.
વિભાગનું માનવું છે કે આવા યત્નોથી માર્ગ સલામતી પ્રત્યે સમાજમાં વધુ જાગૃતિ સર્જાશે અને નાની ઉંમરના બાળકો માટે હેલ્મેટનો ઉપયોગ સ્વાભાવિક વ્યવહાર બનશે.
