Junior NTR: રવિવારે (8 માર્ચ, 2026) તેલુગુ સુપરસ્ટાર જુનિયર એનટીઆર બેંગલુરુની KIMS સુપર સ્પેશિયાલિટી હોસ્પિટલના ઉદ્ઘાટન માટે પહોંચ્યા હતા. અભિનેતાને એક ઝલક જોવા માટે હજારો ચાહકો ઉમટી પડ્યા, જેના કારણે હોસ્પિટલ પરિસરમાં અંધાધૂંધી મચી ગઈ. ચાહકોની ભાગદોડમાં હોસ્પિટલનું એસ્કેલેટર નુકસાન પામ્યું અને રિસેપ્શન એરિયામાં ફર્નિચર પણ તૂટ્યું.
ચાહકોએ બેરિકેડ તોડીને લોબીમાં પ્રવેશ કર્યો
જુનિયર એનટીઆરે તેમની કારની છત પર ઊભા રહીને ચાહકોને વેવ કરીને સ્વાગત કર્યું, જેથી ઉત્સાહ વધુ વધી ગયો. ચાહકોએ બેરિકેડ તોડીને લોબીમાં પ્રવેશ કર્યો અને સુરક્ષા કર્મચારીઓના પ્રયાસો છતાં અંદર ધસી આવ્યા. ભીડના દબાણને કારણે એક ચાહક એસ્કેલેટર પરથી પડી ગયો હોવાના અહેવાલો છે. પરિસ્થિતિ કાબૂ બહાર નીકળતાં પોલીસે હળવો લાઠીચાર્જ કરીને ભીડને વિખેરી અને સુપરસ્ટારને સુરક્ષિત રીતે અંદર પહોંચાડ્યા.
વીડિયો સોશિયલ મીડિયા પર વાયરલ
આ ઘટનાના વીડિયો સોશિયલ મીડિયા પર વાયરલ થઈ ગયા છે, જેમાં ચાહકોના ઉન્માદને લઈને ઘણા યુઝર્સે નિરાશા વ્યક્ત કરી છે. કેટલાકે તેને "સ્ટારડમની કાળી બાજુ" ગણાવી, તો કેટલાકે "હોસ્પિટલ જેવી જગ્યાએ આવો હંગામો ખોટો છે" એવી ટિપ્પણી કરી.જુનિયર એનટીઆરના વિશાળ ફેન ફોલોઇંગનો આ એક ઉદાહરણ છે, પરંતુ આવી ઘટનાઓ સુરક્ષા અને વ્યવસ્થાની જરૂરિયાતને પણ ઉજાગર કરે છે.
