જમ્મુ-કાશ્મીર: દેશ જ્યારે ગણતંત્ર દિવસની ઉજવણીની તૈયારીઓમાં વ્યસ્ત છે, ત્યારે સરહદ પારથી પાકિસ્તાન પોતાની નાપાક હરકતો ચાલુ રાખી રહ્યું છે. જમ્મુ-કાશ્મીરના સાંબા સેક્ટરમાં ભારતીય સેનાએ રવિવારે મોડી રાત્રે એક પાકિસ્તાની ઘૂસણખોરને ઠાર મારીને મોટી દુર્ઘટના ટાળી છે. બીજી તરફ, કઠુઆમાં ફરી એકવાર પાકિસ્તાની ડ્રોન જોવા મળતા સુરક્ષા એજન્સીઓ હાઈ એલર્ટ પર મુકાઈ ગઈ છે. ઓપરેશન સિંદૂરના આઠ મહિના બાદ પણ સરહદ પર તણાવ યથાવત છે.
સાંબામાં ઘૂસણખોરીનો પ્રયાસ નિષ્ફળ
રવિવારે મોડી રાત્રે સાંબા સેક્ટરમાં ઇન્ટરનેશનલ બોર્ડર (IB) પાસે શંકાસ્પદ હલચલ જોવા મળી હતી. સેનાના સૂત્રોના જણાવ્યા અનુસાર, એક પાકિસ્તાની ઘૂસણખોર ભારતીય સરહદમાં પ્રવેશવાનો પ્રયાસ કરી રહ્યો હતો. BSFના જવાનોએ તેને ચેતવણી આપી હતી, પરંતુ તેણે આગળ વધવાનું ચાલુ રાખતા જવાનોએ ફાયરિંગ કર્યું હતું, જેમાં ઘૂસણખોર ઠાર મરાયો હતો. હાલ આ સમગ્ર વિસ્તારમાં સેના દ્વારા સર્ચ ઓપરેશન હાથ ધરવામાં આવ્યું છે જેથી કોઈ અન્ય છુપાયેલા આતંકી કે શંકાસ્પદ વસ્તુને શોધી શકાય.
એન્ટી-ડ્રોન સિસ્ટમ સક્રિય
સાંબાની સાથે જ કઠુઆ જિલ્લામાં લાઇન ઓફ કંટ્રોલ (LoC) નજીક પાકિસ્તાની ડ્રોન જોવા મળ્યું હતું. નિયમિત દેખરેખ દરમિયાન જ્યારે જવાનોની નજર આ ડ્રોન પર પડી, ત્યારે તાત્કાલિક એન્ટી-ડ્રોન સિસ્ટમ સક્રિય કરવામાં આવી હતી. નોંધનીય છે કે 20 જાન્યુઆરીએ પણ કઠુઆમાં આવી જ ઘટના બની હતી. છેલ્લા 15 દિવસમાં સરહદ નજીક 6 વખત ડ્રોન જોવા મળ્યા છે, જે દર્શાવે છે કે પાકિસ્તાન ટેકનોલોજીના સહારે ભારતમાં અસ્થિરતા ફેલાવવાનો પ્રયાસ કરી રહ્યું છે.
છેલ્લા 15 દિવસમાં ડ્રોન દેખાવાની ઘટનાઓ:
17 જાન્યુઆરી: રામગઢ સેક્ટરમાં ડ્રોન દેખાયું, ફાયરિંગ બાદ પાકિસ્તાન તરફ ભાગ્યું.
15 જાન્યુઆરી: રામગઢ સેક્ટરમાં વધુ એક વખત શંકાસ્પદ ડ્રોન જોવા મળ્યું.
13 જાન્યુઆરી: રાજૌરી જિલ્લામાં બે અલગ-અલગ સ્થળે ડ્રોન દેખાયા.
11 જાન્યુઆરી: નૌશેરા, સાંબા અને પૂંછ સહિત પાંચ સ્થળોએ એકસાથે ડ્રોન જોવા મળ્યા.
11 જાન્યુઆરીની રાત્રે એકસાથે 5 ડ્રોનનો હુમલો
સૌથી ગંભીર સ્થિતિ 11 જાન્યુઆરીએ જોવા મળી હતી જ્યારે સાંબા, રાજૌરી અને પૂંછ સેક્ટરમાં સાંજે 6 થી 7 વાગ્યાના ગાળામાં એકસાથે 5 ડ્રોન મંડરાતા દેખાયા હતા. નૌશેરા સેક્ટરમાં તૈનાત ભારતીય જવાનોએ 'ગનિયા-કલસિયાં' ગામ પાસે ડ્રોન જોતા જ મશીનગનથી ફાયરિંગ શરૂ કર્યું હતું. આ જ સમયે રાજૌરીના ખબ્બર અને સાંબાના ચક બબરલ ગામ ઉપર પણ ડ્રોન જેવી વસ્તુઓ જોવા મળી હતી
હથિયારો અને નશીલા પદાર્થોનું કાવતરું?
સુરક્ષા એજન્સીઓને આશંકા છે કે પાકિસ્તાન ડ્રોનનો ઉપયોગ માત્ર જાસૂસી માટે જ નહીં, પરંતુ ભારતીય ક્ષેત્રમાં હથિયારો, વિસ્ફોટકો અને નશીલા પદાર્થો ફેંકવા માટે કરી રહ્યું છે. 9 જાન્યુઆરીએ સાંબામાં ઇન્ટરનેશનલ બોર્ડર પાસે ડ્રોન દ્વારા ફેંકવામાં આવેલો હથિયારોનો જથ્થો મળી આવ્યો હતો, જેમાં 2 પિસ્તોલ, 3 મેગેઝીન, 16 રાઉન્ડ અને એક ગ્રેનેડનો સમાવેશ થતો હતો.
ઓપરેશન સિંદૂર: પાકિસ્તાનને જડબાતોડ જવાબ
7 મે 2025 ના રોજ ભારતે 'ઓપરેશન સિંદૂર' હેઠળ પાકિસ્તાન અને PoK માં આતંકી ઠેકાણાઓ પર હવાઈ હુમલા કર્યા હતા. 22 એપ્રિલ 2025 ના રોજ પહેલગામમાં થયેલા આતંકી હુમલા (જેમાં 26 લોકોએ જીવ ગુમાવ્યા હતા) ના જવાબમાં ભારતીય સેનાએ બહાવલપુર અને મુરીદકે જેવા જૈશ-એ-મોહમ્મદ અને લશ્કરના 9 અડ્ડાઓ ધ્વસ્ત કર્યા હતા. સેના પ્રમુખ જનરલ ઉપેન્દ્ર દ્વિવેદીએ સ્પષ્ટ કર્યું છે કે, "ઓપરેશન સિંદૂર હજુ પણ ચાલુ છે." પાકિસ્તાન દ્વારા કરવામાં આવતી કોઈપણ ઘૂસણખોરી કે આતંકી હુમલાના પ્રયાસનો ભારત સખત ભાષામાં જવાબ આપવા માટે તૈયાર છે.
