Israel US Iran War: મધ્ય પૂર્વમાં વધતા તણાવ વચ્ચે કતારના પ્રાદેશિક પાણીમાં એક લશ્કરી હેલિકોપ્ટર ક્રેશ થયું છે. કતારના ગૃહ મંત્રાલયે પુષ્ટિ કરી છે કે આ દુર્ઘટનામાં 6 લોકોના મોત થયા છે, જ્યારે એક વ્યક્તિ હજુ પણ ગુમ છે અને બચાવ કામગીરી ચાલુ છે. કતારના સંરક્ષણ મંત્રાલયે જણાવ્યું છે કે હેલિકોપ્ટર નિયમિત ફરજ (રુટીન ડ્યુટી) પર હતું ત્યારે "તકનીકી ખામી" (technical malfunction)ને કારણે પર્શિયન ગલ્ફમાં ક્રેશ થયું.
દુશ્મન કાર્યવાહીના કોઈ પુરાવા મળ્યા નથી
અધિકારીઓએ સ્પષ્ટ કર્યું છે કે આ ઘટના ઈરાન-અમેરિકા-ઈઝરાયલ વચ્ચે ચાલી રહેલા તણાવ અથવા યુદ્ધ સાથે જોડાયેલી નથી અને દુશ્મન કાર્યવાહીના કોઈ પુરાવા મળ્યા નથી. બચાવ ટીમો, જેમાં કોસ્ટ ગાર્ડ અને આંતરિક સુરક્ષા દળોનો સમાવેશ થાય છે, ગુમ વ્યક્તિની શોધમાં જોડાયેલી છે.
ગલ્ફ ક્ષેત્રમાં પ્રાદેશિક અસ્થિરતા
મૃતકોની રાષ્ટ્રીયતા અને તેઓ લશ્કરી કર્મચારીઓ હતા કે નાગરિકો તે અંગે હજુ સ્પષ્ટતા કરવામાં આવી નથી. આ ઘટના ગલ્ફ ક્ષેત્રમાં પ્રાદેશિક અસ્થિરતા વચ્ચે બની છે, જ્યાં ઈરાનના હુમલાઓ અને અન્ય તણાવો ચાલુ છે, પરંતુ કતાર સરકારે આને માત્ર તકનીકી ખામી ગણાવી છે. તપાસ શરૂ કરવામાં આવી છે.
