અમદાવાદના ઈસનપુર પોલીસે સમયસર અને સંવેદનશીલ કાર્યવાહી કરી એક યુવકનો અમૂલ્ય જીવ બચાવીને ખરેખર સાચા અર્થમાં “પોલીસ પ્રજાનો મિત્ર છે”. તે વાતને સાર્થક કરી છે. મળતી માહિતી મુજબ, ઈસનપુર પોલીસ સ્ટેશન વિસ્તારમાં રહેતા એક યુવકના 12 ડિસેમ્બર 2025ના રોજ લગ્ન થવાના હતા, પરંતુ લગ્નની આગલી રાત્રે યુવક અચાનક ઘરેથી ગુમ થઈ ગયો હતો. પરિવારજનોએ તાત્કાલિક ઈસનપુર પોલીસનો સંપર્ક કરતા પોલીસે ગંભીરતાથી તપાસ શરૂ કરી હતી.
બેંક એકાઉન્ટની વિગતો તપાસતા યુવક મુંબઈ પહોંચ્યાની માહિતી સામે આવી
પોલીસે આસપાસના સીસીટીવી ફૂટેજ ચેક કરતાં યુવક એક ટેક્સી કારમાં બેસીને બહાર જતો હોવાનું જણાયું હતું. વધુ તપાસમાં ખુલ્યું કે યુવકે ઇન્ડીગો એરલાઇન્સમાં મુંબઈ જવાની ટિકિટ બુક કરાવી હતી. ત્યારબાદ બેંક એકાઉન્ટની વિગતો તપાસતા 11/12/2025ના રોજ મુંબઈ સ્થિત ટુંગા ઇન્ટરનેશનલ હોટલના ખાતામાં પૈસા ટ્રાન્સફર કરેલા હોવાનું પણ સામે આવ્યું હતું. આ આધારે ઈસનપુર પોલીસે મુંબઈની સ્થાનિક પોલીસની મદદ લઈને હોટલમાં તપાસ હાથ ધરી હતી.
બ્લેડ મારી નસ કાપી અને ગળફાંસો ખાવાની તૈયારી હતી અને પોલીસ પહોંચી...
હોટલના રૂમમાં પહોંચતા પોલીસને યુવક ગંભીર હાલતમાં મળ્યો હતો. યુવકે પોતાના ડાબા હાથના કાંડાના ભાગે મહેંદીથી લખાયેલ શુભ વિવાહ ઉપર બ્લેડ મારી નસ કાપી હતી અને ગળાફાંસો ખાઈ આપઘાત કરવાની તૈયારી કરી રહ્યો હતો. પરિસ્થિતિની ગંભીરતા સમજી ઈસનપુર પોલીસે વિલંબ કર્યા વિના તાત્કાલિક હસ્તક્ષેપ કરી યુવકને બચાવી લીધો. ત્યારબાદ યુવકને મુંબઈમાં જ તાત્કાલિક સારવાર અપાવવામાં આવી હતી.
લગ્ન કરવા ન હતા, માનસિક તાણના કારણે આવું પગલું ભર્યું!
પોલીસ પૂછપરછ દરમિયાન યુવકે જણાવ્યું હતું કે, તે લગ્ન કરવા ઇચ્છતો ન હતો અને આ કારણે માનસિક તાણ અનુભવતો હતો. લગ્નના દબાણથી બચવા માટે તે અમદાવાદથી ભાગી મુંબઈ આવ્યો હતો અને હોટલમાં એકલો રહેતા તણાવ વધતા તેણે આત્મહત્યા કરવાનો પ્રયાસ કર્યો હતો. ઈસનપુર પોલીસે સમયસર કાર્યવાહી કરી યુવકનો જીવ બચાવી પરિવાર સાથે ફરી મિલાપ કરાવ્યો હતો. ઈસનપુર પોલીસની આ માનવતાભરી અને સતર્ક કામગીરીને લઈને પરિવારજનોએ પોલીસનો આભાર વ્યક્ત કર્યો છે અને સમગ્ર ઘટનાએ સમાજમાં સંવેદનશીલતા અને સમયસર મદદની મહત્વતા ઉજાગર કરી છે.
