IPL 2026 : IPL 2026 ને લઈને ક્રિકેટ પ્રેમીઓ માટે મોટા સમાચાર સામે આવ્યા છે. રોયલ ચેલેન્જર્સ બેંગ્લોર (RCB) ના ફેન્સ જેની આતુરતાથી રાહ જોઈ રહ્યા હતા, તે હવે સાચું પડવા જઈ રહ્યું છે. કર્ણાટક સરકારે એમ. ચિન્નાસ્વામી સ્ટેડિયમમાં મેચોના આયોજન માટે મંજૂરી આપી દીધી છે. આ સાથે જ સ્પષ્ટ થઈ ગયું છે કે, આગામી સિઝનની ભવ્ય ઓપનિંગ સેરેમની બેંગલુરુના આ પ્રતિષ્ઠિત સ્ટેડિયમમાં યોજાશે.
ઉત્સાહનો માહોલ
હાલમાં જ કર્ણાટક સરકારે એમ. ચિન્નાસ્વામી સ્ટેડિયમમાં IPL અને આંતરરાષ્ટ્રીય મેચો યોજવા પરના તમામ નિયંત્રણો હટાવી લીધા છે. શરૂઆતમાં કેટલીક શરતો સાથે મંજૂરી અપાઈ હતી, પરંતુ હવે તમામ અવરોધો દૂર થતાં ફેન્સમાં ખુશીની લહેર જોવા મળી રહી છે. આ સિઝનમાં RCB તેના હોમ ગ્રાઉન્ડ પર કુલ 5 મેચો રમતી જોવા મળશે.
ભૂતકાળની દુર્ઘટના અને પ્રતિબંધ
ઉલ્લેખનીય છે કે, ગયા વર્ષે જ્યારે RCB એ તેનું પહેલું IPL ટાઇટલ જીત્યું હતું, ત્યારે ટીમની વિજય પરેડ દરમિયાન સ્ટેડિયમ પાસે મોટી ભાગદોડ થઈ હતી. આ દુર્ઘટનામાં કેટલાક લોકોએ જીવ ગુમાવ્યા હતા, જેના કારણે સરકારે તપાસ શરૂ કરી સ્ટેડિયમમાં તમામ કાર્યક્રમો પર પ્રતિબંધ મૂક્યો હતો. આ કારણે ફ્રેન્ચાઇઝીએ નવું હોમ ગ્રાઉન્ડ શોધવાની નોબત આવી હતી, પરંતુ હવે સ્થિતિ સામાન્ય થઈ ગઈ છે.
મેચોનું આયોજન : બેંગલુરુ અને રાયપુર
RCB આ વખતે તેની કુલ 7 હોમ મેચોમાંથી 5 મેચ બેંગલુરુના ચિન્નાસ્વામી સ્ટેડિયમમાં રમશે. બાકીની 2 મેચો રાયપુરના શહીદ વીર નારાયણ સ્ટેડિયમમાં રમાશે. આ નિર્ણય છત્તીસગઢ સરકાર સાથેના અગાઉના કરાર મુજબ લેવામાં આવ્યો છે. જાન્યુઆરીમાં RCB ના CEO રાજેશ મેનને છત્તીસગઢના મુખ્યમંત્રી વિષ્ણુ દેવ સાઈ સાથે મુલાકાત કરી હતી, જેમાં સરકારે ટેક્સમાં છૂટછાટ અને સંપૂર્ણ સહકારનું વચન આપ્યું હતું.
ફ્રેન્ચાઇઝીનો આભાર
આ મહત્વપૂર્ણ જાહેરાત કરતાં RCB મેનેજમેન્ટે જણાવ્યું હતું કે, મહિનાઓની મહેનત અને તમામ વિભાગોના સંકલન બાદ મેચો ફરી હોમ ગ્રાઉન્ડ પર લાવવી શક્ય બની છે. ટીમે કર્ણાટક સરકાર, કર્ણાટક સ્ટેટ ક્રિકેટ એસોસિએશન (KSCA) અને કર્ણાટક પોલીસનો હૃદયપૂર્વક આભાર માન્યો છે.
CEO નો સંદેશ
RCB ના CEO રાજેશ મેનને જણાવ્યું હતું કે, "ચિન્નાસ્વામી સ્ટેડિયમ ફક્ત અમારું ગ્રાઉન્ડ નથી, પણ અમારી ઓળખ છે. બેંગલુરુના ફેન્સની ઉર્જા ખેલાડીઓ માટે પ્રેરણાનું કામ કરે છે. ચાહકોએ હંમેશા અમને સાથ આપ્યો છે, અને તેઓ પોતાની ટીમને પોતાના મેદાન પર રમતા જોવા માટે હકદાર છે."
ક્યારે આવશે શેડ્યૂલ?
IPL 2026 ના સંપૂર્ણ શેડ્યૂલની વાત કરીએ તો, ICC મેન્સ T20 વર્લ્ડ કપ પૂર્ણ થયા બાદ IPL ગવર્નિંગ કાઉન્સિલ દ્વારા સત્તાવાર જાહેરાત કરવામાં આવે તેવી શક્યતા છે.
