શ્રીલંકામાં ત્રાટકેલા વિનાશક વાવાઝોડા દિતવાહના કારણે ભયાનક પરિસ્થિતિનું નિર્માણ થયું છે ત્યારે ભારતે એક સારા પાડોશી હોવાનો ધર્મ નિભાવીને તાત્કાલિક મદદ મોકલી છે. ભારતે શ્રીલંકાને આ ગંભીર સંકટમાંથી ઉગારવા માટે ઓપરેશન સાગર બંધુ હાથ ધર્યું છે. આ મિશન અંતર્ગત ભારતીય વાયુસેનાના બે મોટા પરિવહન વિમાનો સી 130 અને આઈએલ 76 મારફતે જીવનજરૂરિયાતની ચીજવસ્તુઓ અને બચાવ ટુકડીઓ કોલંબો મોકલી આપવામાં આવી છે. આ કુદરતી હોનારતમાં અત્યાર સુધીમાં 132 લોકોએ જીવ ગુમાવ્યા હોવાના દુખદ અહેવાલ છે.
ભારતીય વાયુસેના દ્વારા સોશિયલ મીડિયા પ્લેટફોર્મ એક્સ પર સત્તાવાર માહિતી આપવામાં આવી હતી કે 28 અને 29 નવેમ્બર 2025 ની રાત્રે ગાઝિયાબાદના હિંડન એરબેઝ પરથી રાહત સામગ્રી ભરેલા વિમાનો રવાના કરવામાં આવ્યા હતા. આ વિમાનોમાં 21 ટન જેટલી રાશન જેવી રાહત સામગ્રી ઉપરાંત એનડીઆરએફના 80 થી વધુ જવાનો અને 8 ટન જેટલા બચાવ કામગીરીના સાધનો શ્રીલંકા પહોંચાડવામાં આવ્યા છે. ભારત સરકારે નેબરહુડ ફર્સ્ટની નીતિ અપનાવીને આ મુશ્કેલ સમયમાં શ્રીલંકાને તમામ પ્રકારની મદદ કરવાની ખાતરી આપી છે.
વિદેશ મંત્રી એસ જયશંકરે પણ શનિવારે ઓપરેશન સાગર બંધુ અંગે નવી વિગતો જાહેર કરતા જણાવ્યું હતું કે વાયુસેનાનું વધુ એક આઈએલ 76 વિમાન 9 ટન સામગ્રી અને શહેરી બચાવ ટુકડીઓને લઈને કોલંબો પહોંચ્યું છે. અત્યાર સુધીમાં હવાઈ અને દરિયાઈ માર્ગે કુલ મળીને 27 ટન સામગ્રી પહોંચતી કરવામાં આવી છે અને હજુ વધુ મદદ રસ્તામાં છે. અગાઉ ભારતીય નૌકાદળના જહાજ આઈએનએસ વિક્રાંત અને આઈએનએસ ઉદયગિરિ દ્વારા પણ મદદની પ્રથમ ખેપ મોકલવામાં આવી હતી. શ્રીલંકામાં પૂર અને ભૂસ્ખલનને કારણે હજારો પરિવારો અસરગ્રસ્ત થયા છે અને અનેક લોકો મુસીબતમાં મુકાયા છે.
આ દરમિયાન કોંગ્રેસના સાંસદ શશિ થરૂરે પણ શ્રીલંકામાં ફસાયેલા ભારતીય નાગરિકોની ચિંતા વ્યક્ત કરી હતી. તેમણે ભારતીય હાઈ કમિશનર સંતોષ ઝા સાથે વાતચીત કરીને કોલંબો એરપોર્ટ પર અટવાયેલા અને તિરુવનંતપુરમ આવવા માંગતા મુસાફરોને મદદ કરવા રજૂઆત કરી હતી. રાહતના સમાચાર એ છે કે ભારતીય વાયુસેના દ્વારા રવિવારે સવારે 5 વાગ્યાથી વિશેષ ફ્લાઈટ્સનું સંચાલન કરવામાં આવશે. જે ભારતીય નાગરિકોએ એરપોર્ટ પર હાઈ કમિશનના કંટ્રોલ રૂમમાં નોંધણી કરાવી છે તેમને આ ફ્લાઈટ્સ મારફતે સુરક્ષિત રીતે ભારત પરત લાવવામાં આવશે.
