પાડોશી દેશ બાંગ્લાદેશમાં બદલાયેલા રાજકીય સમીકરણો અને ત્યાંના સૈન્ય અધિકારીઓની પાકિસ્તાન સાથે વધતી જતી નિકટતાએ ભારતની ચિંતામાં વધારો કર્યો છે. આ બદલાતી ભૌગોલિક અને રાજકીય પરિસ્થિતિને ધ્યાનમાં રાખીને ભારતીય સેનાએ પોતાની રણનીતિમાં મોટો ફેરફાર કર્યો છે. પૂર્વોત્તર ભારતની સુરક્ષા માટે અત્યંત મહત્વપૂર્ણ ગણાતા સિલીગુડી કોરિડોરની સુરક્ષા વ્યવસ્થાને અભેદ બનાવવા માટે સેનાએ કમર કસી લીધી છે. આ વિસ્તારની સંવેદનશીલતાને જોતા તાત્કાલિક ધોરણે ત્રણ નવા લશ્કરી મથકો સ્થાપિત કરવાનો નિર્ણય લેવામાં આવ્યો છે જેથી કોઈપણ પ્રકારના ખતરાને પહોંચી વળી શકાય.
ત્રણ નવા સૈન્ય મથકો અને તેનું મહત્વ સુરક્ષા એજન્સીઓના ગુપ્તચર અહેવાલોના આધારે લેવાયેલા નિર્ણય મુજબ આસામના બામુની, બિહારના કિશનગંજ અને પશ્ચિમ બંગાળના ચોપરા વિસ્તારમાં નવા ગેરિસન એટલે કે લશ્કરી થાણા ઉભા કરવામાં આવ્યા છે. આ ત્રણેય સ્થળો વ્યૂહાત્મક રીતે ખૂબ જ મહત્વના છે. કટોકટીના સમયે અથવા કોઈ પણ વિપરીત પરિસ્થિતિમાં આ નવા મથકો સેના અને બીએસએફના જવાનોને ત્વરિત કાર્યવાહી કરવામાં મદદરૂપ થશે. અહીંથી જવાનો ઓછા સમયમાં સરહદ પર પહોંચીને દુશ્મનોને જડબાતોડ જવાબ આપી શકશે.
ચિકન નેક કોરિડોર શા માટે છે મહત્વનું સિલીગુડી કોરિડોરને ભૌગોલિક રચનાને કારણે સામાન્ય ભાષામાં ચિકન નેક તરીકે ઓળખવામાં આવે છે. આ રસ્તો અમુક જગ્યાએ માત્ર 22 કિલોમીટર જેટલો જ પહોળો છે. આ સાંકડો રસ્તો ભારતની મુખ્ય ભૂમિને પૂર્વોત્તરના 8 રાજ્યો સાથે જોડતી એકમાત્ર કડી છે. જો યુદ્ધ કે તણાવની સ્થિતિમાં આ રસ્તો બંધ થઈ જાય તો અરુણાચલ પ્રદેશ અને આસામ સહિતના રાજ્યોનો સંપર્ક તૂટી શકે છે અને અબજો રૂપિયાનો વેપાર પણ અટકી શકે છે. જોકે સેનાના અધિકારીઓએ સ્પષ્ટ કર્યું છે કે આ વિસ્તાર ભારતની નબળાઈ નથી પરંતુ તાકાત છે કારણ કે અહીં ભારતીય સેના ત્રણેય દિશાઓથી મજબૂત રીતે તૈનાત છે.
પાકિસ્તાન અને બાંગ્લાદેશની મિલિટરી મિટિંગથી ચિંતા તાજેતરમાં બાંગ્લાદેશના વચગાળાના મુખ્ય સલાહકાર મોહમ્મદ યુનુસ અને પાકિસ્તાનના જનરલ સાહિર શમશાદ મિર્ઝા વચ્ચે ઢાકામાં મુલાકાત થઈ હતી. શેખ હસીનાના સત્તા પરથી દૂર થયા બાદ બાંગ્લાદેશમાં ભારત વિરોધી ગતિવિધિઓ વધી હોવાના અહેવાલો છે. ઢાકામાં થયેલી આ બેઠકમાં બંને દેશો વચ્ચે સૈન્ય સહયોગ વધારવાની ચર્ચા થઈ હોવાનું મનાય છે. ભારત આ મુલાકાતને માત્ર એક ઔપચારિક ઘટના તરીકે નથી જોઈ રહ્યું પરંતુ તેને ક્ષેત્રમાં બદલાતા સુરક્ષા સમીકરણો તરીકે મૂલવી રહ્યું છે.
આધુનિક ટેકનોલોજી અને ઝીરો ટોલરન્સ નીતિ નવા લશ્કરી મથકોની સાથે સાથે સરહદ પર દેખરેખ માટે અત્યાધુનિક ઉપકરણો પણ ગોઠવવામાં આવ્યા છે. જેમાં ડ્રોન દ્વારા સતત મોનિટરિંગ, ડિજિટલ વોચ ટાવર અને હાઈટેક ફેન્સિંગનો સમાવેશ થાય છે. ખાસ કરીને કિશનગંજ વિસ્તાર બાંગ્લાદેશ બોર્ડરથી માત્ર 23 કિલોમીટર દૂર હોવાથી ત્યાં વિશેષ સતર્કતા રાખવામાં આવી રહી છે. કેન્દ્રીય ગૃહમંત્રી અમિત શાહ સહિતના શીર્ષ નેતૃત્વએ સ્પષ્ટ કર્યું છે કે સિલીગુડી કોરિડોરની સુરક્ષા બાબતે ઝીરો રિસ્ક અને ઝીરો ટોલરન્સની નીતિ અપનાવવામાં આવશે. રાષ્ટ્રીય સુરક્ષા અને અખંડિતતા સાથે કોઈ પણ પ્રકારનું સમાધાન કરવામાં આવશે નહીં.
