IND vs SA T-20 Match: નરેન્દ્ર મોદી ક્રિકેટ સ્ટેડિયમ ખાતે તા. 19/12/2025 ના રોજ ભારત અને સાઉથ આફ્રિકા વચ્ચે યોજાનારી T-20 ક્રિકેટ મેચને ધ્યાનમાં રાખીને ગુજરાત મેટ્રો રેલ કોર્પોરેશન (GMRC) દ્વારા મહત્વપૂર્ણ નિર્ણય લેવામાં આવ્યો છે. મેચ પૂર્ણ થયા બાદ દર્શકોને સરળ, સુરક્ષિત અને સુવિધાજનક પરિવહન મળી રહે તે હેતુથી અમદાવાદ મેટ્રો ટ્રેન સેવાઓને મધ્યરાત્રિના 12:30 વાગ્યા સુધી લંબાવવાનો નિર્ણય જાહેર કરવામાં આવ્યો છે. હાલમાં અમદાવાદમાં મેટ્રો ટ્રેન સેવાઓ સવારે 6:20 વાગ્યાથી રાત્રે 10:00 વાગ્યા સુધી ચાલે છે. પરંતુ T-20 મેચના દિવસે ખાસ વ્યવસ્થા હેઠળ રાત્રિના 10:00 વાગ્યા પછીથી મધ્યરાત્રિના 12:30 વાગ્યા સુધી મેટ્રો સેવાઓ ચાલુ રહેશે. આ લંબાયેલ સમયગાળા દરમિયાન મુસાફરો માત્ર મોટેરા સ્ટેડિયમ મેટ્રો સ્ટેશન અને સાબરમતી મેટ્રો સ્ટેશન પરથી મેટ્રોમાં બેસી શકશે.
GMRC દ્વારા ખાસ સુવિધા ઉપલબ્ધ કરાઈ
આ સ્ટેશનો પરથી મુસાફરો અમદાવાદ મેટ્રોના બંને કોરિડોર મોટેરાથી APMC અને થલતેજ ગામથી વસ્ત્રાલ ગામ—પરના કોઈપણ કાર્યરત મેટ્રો સ્ટેશન સુધી મુસાફરી કરી શકશે. મેચ જોવા આવેલા ગાંધીનગરના દર્શકો માટે પણ GMRC દ્વારા ખાસ સુવિધા કરવામાં આવી છે. મોટેરા સ્ટેડિયમ મેટ્રો સ્ટેશનથી સેક્ટર-1 (ગાંધીનગર) સુધી રાત્રે બે વધારાની મેટ્રો ટ્રેનો દોડાવવામાં આવશે. આ ટ્રેનો અનુક્રમે રાત્રિના 11:40 વાગ્યે અને મધ્યરાત્રિના 12:10 વાગ્યે ઉપડશે. GMRC દ્વારા મુસાફરોને કોઈપણ પ્રકારની અસુવિધા ન પડે તે માટે T-20 મેચના દિવસ માટે ખાસ “સ્પેશ્યલ પેપર ટિકિટ” બહાર પાડવામાં આવી છે. આ ટિકિટનું ભાડું પ્રતિ વ્યક્તિ ₹50 નક્કી કરવામાં આવ્યું છે. આ ટિકિટ વડે લંબાવેલા સમય દરમિયાન મોટેરા સ્ટેડિયમ અથવા સાબરમતી મેટ્રો સ્ટેશનથી અમદાવાદના બંને કોરિડોર તેમજ ગાંધીનગર કોરિડોરના સેક્ટર-1 મેટ્રો સ્ટેશન સુધી મુસાફરી કરી શકાશે.
સ્પેશ્યલ પેપર ટિકિટ વગર મેટ્રોમાં પ્રવેશ નહીં મળે
રાત્રિના 10:00 વાગ્યા સુધી કોન્ટેક્ટલેસ સ્માર્ટ ટોકન, GMRC ટ્રાવેલ કાર્ડ, NCMC કાર્ડ, QR ડિજિટલ અને QR પેપર ટિકિટ પર નિયમિત ભાડા મુજબ પ્રવેશ મળશે. પરંતુ રાત્રિના 10:00 વાગ્યા પછી મોટેરા સ્ટેડિયમ અને સાબરમતી મેટ્રો સ્ટેશનમાં પ્રવેશ માટે માત્ર સ્પેશ્યલ પેપર ટિકિટ જ માન્ય રહેશે. કિઓસ્ક, ટોકન વેન્ડિંગ મશીન, ટિકિટ કાઉન્ટર અથવા મોબાઇલ એપથી અગાઉ ખરીદેલી ટિકિટ રાત્રિના 10:00 વાગ્યા પછી માન્ય નહીં રહે. પ્રવાસીઓને પરત ફરતી વખતે લાંબી લાઈનમાં ઊભા રહેવું ન પડે તે માટે સ્પેશ્યલ પેપર ટિકિટ મેચના દિવસ દરમ્યાન નિરાંત ક્રોસ રોડ, એપેરલ પાર્ક, કાલુપુર, ઓલ્ડ હાઈકોર્ટ, થલતેજ, મોટેરા, સાબરમતી, રાણીપ, વાડજ, જીવરાજ પાર્ક, જીએનએલયુ, ઇન્ફોસિટી અને સેક્ટર-1 મેટ્રો સ્ટેશન પરથી અગાઉથી ખરીદી શકાશે.
છેલ્લી ટ્રેનનો સમય
મોટેરા સ્ટેડિયમ મેટ્રો સ્ટેશનથી એપીએમસી તરફની છેલ્લી મેટ્રો ટ્રેન મધ્યરાત્રિના 12:30 વાગ્યે ઉપડશે, જ્યારે સેક્ટર-1 (ગાંધીનગર) તરફની છેલ્લી ટ્રેન મધ્યરાત્રિના 12:10 વાગ્યે રવાના થશે. GMRCના આ નિર્ણયથી ક્રિકેટપ્રેમી દર્શકોમાં ખુશીનો માહોલ છે અને મોટા ઇવેન્ટ દરમિયાન જાહેર પરિવહનને પ્રોત્સાહન મળવાનું નિશ્ચિત છે.
