CDSCO Alert: કેન્દ્રીય ડ્રગ્સ સ્ટાન્ડર્ડ કંટ્રોલ ઓર્ગેનાઈઝેશન (CDSCO) દ્વારા ડિસેમ્બર 2025 માટે જારી કરાયેલા માસિક ડ્રગ એલર્ટમાં દેશભરમાંથી કુલ 167 દવાઓના નમૂનાઓને 'નોટ ઓફ સ્ટાન્ડર્ડ ક્વોલિટી' (NSQ) તરીકે જાહેર કરવામાં આવ્યા છે. આમાંથી 74 નમૂના કેન્દ્રીય ડ્રગ્સ લેબોરેટરીઝ દ્વારા અને 93 નમૂના રાજ્ય ડ્રગ ટેસ્ટિંગ લેબોરેટરીઝ દ્વારા હલકી ગુણવત્તાવાળા શોધાયા છે. આ દવાઓ એક કે વધુ ગુણવત્તા પરિમાણોમાં નિષ્ફળ ગઈ હોવાનું જાણવા મળ્યું છે, જેના કારણે તેને NSQ તરીકે લેબલ કરવામાં આવી છે. આ નમૂનાઓમાં સામાન્ય બીમારીઓ માટે વપરાતી દવાઓ જેમ કે બ્લડ પ્રેશર, ડાયાબિટીસ, તાવ, એસિડિટી, દર્દ નિવારક અને એન્ટીબાયોટિક્સનો પણ સમાવેશ થાય છે.
7 દવાઓના નમૂના નકલી
આ ઉપરાંત, ડિસેમ્બરમાં 7 દવાઓના નમૂના નકલી (spurious) જાહેર કરવામાં આવ્યા છે. આમાં ગાઝિયાબાદ (નોર્થ ઝોન)માંથી 4, અમદાવાદ (FDA), બિહાર અને મહારાષ્ટ્રમાંથી એક-એક નમૂનો સામેલ છે. આ નકલી દવાઓ અન્ય કંપનીઓના બ્રાન્ડ નામનો દુરુપયોગ કરીને બનાવવામાં આવી હતી અને વેચાઈ રહી હતી. તપાસ ચાલુ છે અને કાનૂની કાર્યવાહી કરવામાં આવશે.
સમગ્ર યાદી CDSCOની અધિકૃત વેબસાઈટ પર ઉપલબ્ધ
આરોગ્ય મંત્રાલય અને CDSCO દર મહિને રાજ્ય નિયમનકારો સાથે મળીને આ પ્રકારની તપાસ કરે છે, જેથી નકલી અને હલકી ગુણવત્તાવાળી દવાઓ બજારમાંથી તાત્કાલિક દૂર કરી શકાય. આ સમગ્ર યાદી CDSCOની અધિકૃત વેબસાઈટ પર ઉપલબ્ધ છે.
સલાહ: દર્દીઓએ તેમની દવાઓના બેચ નંબર અને ઉત્પાદકની વિગતો તપાસી લેવી જોઈએ અને શંકા હોય તો ડોક્ટર કે ફાર્માસિસ્ટની સલાહ લેવી. આ પગલાંથી દવાઓની ગુણવત્તા અને દર્દીઓની સુરક્ષા સુનિશ્ચિત થાય છે.
