રાજકોટમાં શનિવારે રાજ્યના નાયબ મુખ્યમંત્રી હર્ષ સંઘવીએ ખોડલધામ ટ્રસ્ટના ચેરમેન નરેશ પટેલના નિવાસસ્થાને મુલાકાત લેતા રાજકીય વર્તુળોમાં ચર્ચાનો માહોલ સર્જાયો છે. શહેરમાં ભાજપના કેટલાક આગેવાનોની હાજરી વચ્ચે આ બેઠક બંધ બારણે યોજાઈ હોવાના અહેવાલો સામે આવ્યા બાદ વિવિધ પ્રકારની અટકળો શરૂ થઈ હતી. જોકે બેઠક પૂર્ણ થયા બાદ ભાજપના ધારાસભ્ય રમેશ ટીલાળા તેમજ નરેશ પટેલ બંનેએ સ્પષ્ટતા કરી કે આ માત્ર શુભેચ્છા મુલાકાત હતી અને તેમાં કોઈ રાજકીય એજન્ડા સામેલ નહોતો.
મળતી માહિતી મુજબ નાયબ મુખ્યમંત્રી હર્ષ સંઘવી રાજકોટમાં એક જાહેર કાર્યક્રમ અને બ્રીજના લોકાર્પણ પ્રસંગે આવ્યા હતા. તે દરમિયાન તેમણે નરેશ પટેલ સાથે મુલાકાત કરવાની ઈચ્છા વ્યક્ત કરી હતી. ત્યારબાદ નરેશ પટેલના નિવાસસ્થાને ચા-નાસ્તા સાથે અનૌપચારિક મુલાકાત યોજાઈ હતી.
Rajkot વાસીઓ આનંદો!: ટ્રાફિક સમસ્યામાં મળશે મોટી રાહત; હર્ષ સંઘવીએ કર્યું સાંઢિયા પુલનું લોકાર્પણ
ધારાસભ્ય રમેશ ટીલાળાની સ્પષ્ટતા
મુલાકાત અંગે મીડિયા સાથે વાત કરતાં રાજકોટના ધારાસભ્ય રમેશ ટીલાળાએ જણાવ્યું કે હર્ષ સંઘવી અને નરેશ પટેલ વચ્ચે ટેલિફોનિક વાતચીત થઈ હતી. તેમણે કહ્યું કે જ્યારે ડેપ્યુટી સીએમ રાજકોટ આવ્યા ત્યારે તેમણે નરેશ પટેલના ઘરે ચા-પાણી માટે આવવાની ઈચ્છા વ્યક્ત કરી હતી. તેના અનુસંધાને આ મુલાકાત યોજાઈ હતી.
રમેશ ટીલાળાના જણાવ્યા અનુસાર, “આજે માત્ર ચા-પાણી અને નાસ્તાનો કાર્યક્રમ હતો. હર્ષભાઈ મુલાકાત પૂર્ણ કરીને એરપોર્ટ માટે રવાના થયા છે. આ મુલાકાત પાછળ કોઈ રાજકીય એજન્ડા નહોતો અને અગાઉથી કોઈ વિશેષ આયોજન પણ કરવામાં આવ્યું નહોતું. ટેલિફોનિક વાતચીતના આધારે આ શુભેચ્છા મુલાકાત યોજાઈ હતી.”
મુલાકાતને લઈને ઉભી થયેલી રાજકીય અટકળો અંગે પૂછવામાં આવતા તેમણે ફરી ભારપૂર્વક જણાવ્યું કે આ મુલાકાતને રાજકીય દ્રષ્ટિએ જોવાની જરૂર નથી અને સામાજિક તથા જાહેર જીવનમાં કાર્યરત વ્યક્તિઓ વચ્ચે આવી મુલાકાતો સ્વાભાવિક બાબત છે.
વડોદરાનાં ફાયરિંગ કેસમાં 24 કલાકમાં પોલીસને મળી સફળતા: 4 હિસ્ટ્રીશીટર ઝડપાયા, પિસ્તોલ-તલવારોનો જથ્થો જપ્ત
નરેશ પટેલના રાજકારણમાં પ્રવેશ અંગે ફરી ચર્ચા
મુલાકાત બાદ ફરી એકવાર નરેશ પટેલના સંભવિત રાજકીય પ્રવેશ અંગે ચર્ચાઓ તેજ બની છે. છેલ્લા કેટલાક વર્ષોમાં વિવિધ રાજકીય પક્ષો સાથે તેમના નામની ચર્ચા અનેક વખત થઈ ચૂકી છે. ખાસ કરીને પાટીદાર સમાજમાં તેમની લોકપ્રિયતા અને સામાજિક ક્ષેત્રમાં તેમની સક્રિય ભૂમિકાને કારણે તેઓ રાજકીય વર્તુળોમાં સતત ચર્ચાના કેન્દ્રમાં રહ્યા છે.
જોકે રમેશ ટીલાળાએ આ મુદ્દે સાવચેતીપૂર્વક જવાબ આપતાં જણાવ્યું કે રાજકારણમાં આવવું કે નહીં તે સંપૂર્ણપણે નરેશ પટેલનો વ્યક્તિગત નિર્ણય છે. તેમણે કહ્યું કે “સારા લોકો રાજકારણમાં આવે તો તે સારી બાબત છે, પરંતુ અંતિમ નિર્ણય સંબંધિત વ્યક્તિએ જ લેવાનો હોય છે.”
તાજેતરમાં નરેશ પટેલે જાહેર જીવનની દોડધામમાંથી નિવૃત્તિની ઈચ્છા અંગે કરેલી ટિપ્પણીઓ પણ ચર્ચામાં રહી હતી. તેના સંદર્ભમાં પૂછાયેલા પ્રશ્નના જવાબમાં રમેશ ટીલાળાએ જણાવ્યું કે ઉંમર વધતાં કોઈપણ વ્યક્તિને કામકાજનો બોજ ઘટાડવાની અથવા નિવૃત્તિ લેવાની ઈચ્છા થવી સ્વાભાવિક બાબત છે.
રાજ્યસભાની અટકળો વચ્ચે મુલાકાત
રાજ્યસભાની ચૂંટણી અને વિવિધ નિમણૂકોને લઈને અગાઉ નરેશ પટેલનું નામ પણ ચર્ચામાં આવ્યું હતું. આ પૃષ્ઠભૂમિમાં હર્ષ સંઘવી અને નરેશ પટેલ વચ્ચેની મુલાકાતને કેટલાક વર્તુળોએ રાજકીય દ્રષ્ટિએ જોવાનો પ્રયાસ કર્યો હતો. જોકે રમેશ ટીલાળાએ આ પ્રકારની ચર્ચાઓ અંગે કોઈ ટિપ્પણી કરવાનું ટાળ્યું અને કહ્યું કે પાર્ટી સંબંધિત મુદ્દાઓ પર નિર્ણય અને નિવેદન પક્ષના સ્તરે જ આપવામાં આવે છે.
રાજકીય વિશ્લેષકોનું માનવું છે કે ગુજરાતમાં સામાજિક આગેવાનો અને રાજકીય નેતાઓ વચ્ચેની મુલાકાતો ઘણી વખત ચર્ચાનું કારણ બનતી હોય છે, ખાસ કરીને જ્યારે સંબંધિત વ્યક્તિનું નામ અગાઉ રાજકીય સંભાવનાઓ સાથે જોડાયું હોય. તેમ છતાં હાલ ઉપલબ્ધ માહિતી અનુસાર આ મુલાકાતને બંને પક્ષોએ સંપૂર્ણપણે સામાજિક અને શુભેચ્છા આધારિત ગણાવી છે.
રેશનકાર્ડ ધારકો ધ્યાન આપો!: અનાજ મેળવવા માટે હવે કરવું પડશે આ કામ
નરેશ પટેલે પણ આપ્યું સ્પષ્ટ નિવેદન
મુલાકાત અંગે ખોડલધામ ટ્રસ્ટના ચેરમેન નરેશ પટેલે પણ સ્પષ્ટતા કરતા જણાવ્યું કે નાયબ મુખ્યમંત્રી હર્ષ સંઘવી શુભેચ્છા મુલાકાતે તેમના ઘરે આવ્યા હતા. તેમણે કહ્યું કે મુલાકાત દરમિયાન સામાન્ય સામાજિક મુદ્દાઓ અંગે ચર્ચા થઈ હતી અને તેના સિવાય કોઈ વિશેષ રાજકીય ચર્ચા કે નિર્ણય લેવાયો નથી.
નરેશ પટેલના જણાવ્યા અનુસાર, “માનનીય મંત્રીશ્રી આજે શુભેચ્છા મુલાકાતે મારા ઘરે આવ્યા હતા. સંપૂર્ણપણે સામાજિક ચર્ચાઓ થઈ હતી. તેઓ પાણી પીને પરત ગયા છે. આથી વિશેષ કોઈ વાત નથી.”
આ નિવેદન બાદ હાલ માટે બેઠકને લઈને ચાલી રહેલી રાજકીય અટકળો પર વિરામ લાગ્યો હોય તેવું જણાઈ રહ્યું છે. જોકે ગુજરાતના રાજકીય અને સામાજિક પરિપ્રેક્ષ્યમાં નરેશ પટેલનું નામ સતત ચર્ચામાં રહેતું હોવાથી આવી મુલાકાતો ભવિષ્યમાં પણ રાજકીય રસનું કેન્દ્ર બની શકે છે.
