ગુજરાત પોલીસ ભરતી બોર્ડ દ્વારા વર્ષ 2024-25 માટે બિન હથિયારી પોલીસ સબ-ઇન્સ્પેક્ટર (PSI)ની ભરતી પ્રક્રિયામાં મહત્વનો પડાવ પૂર્ણ થયો છે. ભરતી બોર્ડની જાહેરાત ક્રમાંક GPRB/2023-24/1 અંતર્ગત બિન હથિયારી PSI ની કુલ 472 જગ્યાઓ માટે ભરતી પ્રક્રિયા હાથ ધરવામાં આવી હતી.
આ ભરતી પ્રક્રિયા હેઠળ શારીરિક કસોટીમાં ક્વોલિફાઇડ થયેલા કુલ 1,02,935 ઉમેદવારોની લેખિત પરીક્ષા (પેપર-1 અને પેપર-2) તારીખ 13 એપ્રિલ 2025 ના રોજ લેવામાં આવી હતી. પરીક્ષા નિયમો મુજબ પેપર-1ના Part-A અને Part-B માં અલગ-અલગ ઓછામાં ઓછા 40 ટકા ગુણ મેળવનાર ઉમેદવારોના પેપર-2 (વર્ણનાત્મક)ની તપાસ કરવામાં આવી હતી.
આ મુજબ કુલ 49,591 ઉમેદવારોના પેપર-2 નું મૂલ્યાંકન કરાયું હતું, જેમાંથી પેપર-2 માં 40 કે તેથી વધુ ગુણ મેળવનાર કુલ 8,679 ઉમેદવારોને ક્વોલિફાઇડ જાહેર કરવામાં આવ્યા છે. ભરતીના નિયમો અનુસાર ખાલી જગ્યાઓના અંદાજે બે ગણા ઉમેદવારોને દસ્તાવેજ ચકાસણી માટે બોલાવવામાં આવે છે.
મેરીટના આધારે ક્વોલિફાઇડ ઉમેદવારોમાંથી કુલ 1,023 ઉમેદવારોને દસ્તાવેજ ચકાસણી માટે પસંદ કરવામાં આવ્યા છે. આ યાદી 29 જાન્યુઆરી 2026 ના રોજ ગુજરાત પોલીસ ભરતી બોર્ડની સત્તાવાર વેબસાઇટ પર જાહેર કરવામાં આવી છે.
દસ્તાવેજ ચકાસણીની કામગીરી તારીખ 05 ફેબ્રુઆરી 2026 થી 10 ફેબ્રુઆરી 2026 દરમિયાન ગુજરાત પોલીસ અકાદમી, કરાઇ, ગાંધીનગર ખાતે યોજાશે. અનામત શ્રેણીના ઉમેદવારોએ ભરતી બોર્ડની વેબસાઇટ પર દર્શાવેલી સૂચનાઓ મુજબ જરૂરી દસ્તાવેજો રજૂ કરવાના રહેશે.
દસ્તાવેજ ચકાસણી માટેના કોલ લેટર IAS વેબસાઇટ પરથી 02 ફેબ્રુઆરી 2026ના રોજ બપોરે 2:00 વાગ્યાથી ડાઉનલોડ કરી શકાશે.
