ગુજરાતમાં મેઘમહેર: હવામાન વિભાગે આગામી ૪૮ કલાક માટે આપી ચેતવણી, ફરી શરૂ થશે વરસાદી રાઉન્ડ

અમદાવાદ: ગુજરાતમાં ચોમાસું ફરી સક્રિય થતાં હવામાન વિભાગે આગામી ૪૮ કલાક માટે વરસાદને લઈને મહત્ત્વની આગાહી કરી છે. બંગાળની ખાડીમાં સર્જાયેલા વેલ-માર્ક્ડ લો-પ્રેશર અને સાયક્લોનિક સર્ક્યુલેશનની અસરને કારણે રાજ્યમાં ફરી એકવાર વરસાદનો નવો રાઉન્ડ શરૂ થઈ રહ્યો છે. હવામાન વિભાગના જણાવ્યા અનુસાર, આગામી બે દિવસ દરમિયાન દક્ષિણ ગુજરાત, ઉત્તર ગુજરાત અને સૌરાષ્ટ્રના વિવિધ વિસ્તારોમાં ગાજવીજ અને તેજ પવન સાથે હળવોથી મધ્યમ વરસાદ પડવાની સંભાવના છે. ખાસ કરીને ખેડા, આણંદ, અમદાવાદ અને ગાંધીનગર સહિતના મધ્ય-ઉત્તર ગુજરાતના જિલ્લાઓમાં છૂટાછવાયા સ્થળોએ વરસાદી ઝાપટાં વરસી શકે છે. માછીમારોને પણ દરિયો ન ખેડવાની સલાહ આપવામાં આવી છે.