વલસાડમાં બે કલાકમાં ૬ ઈંચ વરસાદથી જળબંબોળ, રાજ્યના ૧૭૨ તાલુકા ભીંજાયા

ગુજરાતમાં ચોમાસાએ ધમાકેદાર બેટિંગ શરૂ કરી છે. છેલ્લા ૨૪ કલાકમાં રાજ્યના ૧૭૨ તાલુકાઓમાં નોંધપાત્ર વરસાદ નોંધાયો છે, જેમાં સૌરાષ્ટ્ર અને દક્ષિણ ગુજરાતમાં ભારે નુકસાન થયું છે. જૂનાગઢ, ગીર સોમનાથ, નવસારી અને ડાંગમાં નદી-નાળા છલકાયા છે. સૌથી ગંભીર સ્થિતિ વલસાડમાં સર્જાઈ છે, જ્યાં આજે સવારે માત્ર બે કલાકમાં આભ ફાટ્યું હોય તેમ ૬.૧૦ ઈંચ (૧૫૫ મીમી) વરસાદ ખાબકતા જનજીવન ઠપ્પ થઈ ગયું છે અને અનેક વિસ્તારો પાણીમાં ગરકાવ થયા છે. આ ઉપરાંત ડાંગમાં ૩.૧૧ ઈંચ અને ગણદેવીમાં ૨.૧૭ ઈંચ વરસાદ નોંધાયો છે. ટૂંકા ગાળામાં ખાબકેલા આ ધોધમાર વરસાદને કારણે નીચાણવાળા વિસ્તારોમાં પૂર જેવી સ્થિતિ સર્જાઈ છે.