Gujarat government's big preparations for the Olympics: 26 નવેમ્બરે ગુજરાતમાં કોમનવેલ્થ ગેમ્સના આયોજનની વિધિવત જાહેરાત પછી રાજ્ય સરકારે 2036 ના ઓલિમ્પિક ગેમ્સના આયોજન માટે પણ તૈયારીઓ શરૂ કરી દીધી છે. 2030 માં કોમનવેલ્થ પછી 2036 માં ઓલિમ્પિક ગેમ્સ ગુજરાતમાં યોજાય તેવા હકારાત્મક અભિગમ સાથે સરકારે એક મહત્વાકાંક્ષી નિર્ણય લીધો છે. ગુજરાત સરકાર સ્વિત્ઝર્લેન્ડના લુસાન ખાતે એક અલાયદી કચેરી (ઓફિસ) શરૂ કરવા જઈ રહી છે. આ કચેરી દ્વારા ઓલિમ્પિક એસોસિએશન સાથે સંવાદ અને માળખાગત વિકાસની જરૂરિયાતોને સમજવા પર ભાર મૂકાશે.
લુસાનની મુલાકાત અને પ્રતિનિધિમંડળ
આગામી 16 થી 20 ડિસેમ્બર દરમિયાન, નાયબ મુખ્યમંત્રી હર્ષ સંઘવી અને સરકારના ઉચ્ચ અધિકારીઓની એક ટીમ લુસાનની મુલાકાત લેવા જઈ રહી છે. ગુજરાત સરકારના સૂત્રોના જણાવ્યા અનુસાર, કોમનવેલ્થ ગેમ્સના સફળ આયોજનની સાથે-સાથે ઓલિમ્પિક ગેમ્સ માટેની તૈયારીઓ પણ શરૂ કરી દેવામાં આવી છે. આ 5 દિવસની બેઠકો દરમિયાન ઓલિમ્પિક આયોજન સંબંધિત ઘણા મહત્વના ઘટનાક્રમો સર્જાઈ શકે છે. નાયબ મુખ્યમંત્રીની ટીમ 16 ડિસેમ્બરે પ્રવાસ માટે રવાના થશે.
ઓલિમ્પિક એસોસિએશન સાથે સીધો સંવાદ
સ્વિત્ઝર્લેન્ડના લુસાન શહેરમાં ઓલિમ્પિક એસોસિએશનની મુખ્ય કચેરી આવેલી છે. ગુજરાત સરકાર અહીં જ પોતાની કચેરી સ્થાપિત કરશે. આ કચેરીમાં તજજ્ઞોને કન્સલ્ટન્ટ તરીકે અને અધિકારી કક્ષાના લોકોને ભરતી કરવામાં આવશે. આ કચેરીનો સંપૂર્ણ ખર્ચ ગુજરાત સરકાર ભોગવશે, પરંતુ તેનાથી ભવિષ્યમાં ઓલિમ્પિક એસોસિએશન સાથેનો કોઈપણ પ્રકારનો સંવાદ કે સંદેશાવ્યવહાર સીધો અને અસરકારક રીતે થઈ શકશે.
માળખાગત વિકાસમાં સહાયરૂપ
ઓલિમ્પિક ગેમ્સના વૈશ્વિક એસોસિએશન અને અન્ય સ્પોર્ટ્સના વિશ્વસ્તરના ફેડરેશનોની મુખ્ય કચેરીઓ પણ લુસાનમાં સ્થાયી છે. આ કારણસર, ગુજરાત સરકારના પ્રતિનિધિઓ તેમની સાથે સંપર્કમાં રહીને જે-તે ગેમ્સની ઇવેન્ટના આયોજન માટેની ચોક્કસ જરૂરિયાતો સમજી શકશે. આ સમજણ ગુજરાતમાં રમતગમતનું જરૂરી માળખું અને સુવિધા વિકસાવવામાં મદદરૂપ થશે.
ગેમ્સ માટેનું પ્રેઝન્ટેશન
મુલાકાતના પાંચ દિવસ દરમિયાન, નાયબ મુખ્યમંત્રી હર્ષ સંઘવી અને પ્રતિનિધિમંડળ ઓલિમ્પિક ફેડરેશન ઉપરાંત અલગ-અલગ ગેમ્સના એસોસિએશનોને મળીને ગુજરાતમાં ગેમ્સ યોજવા માટેના પ્રેઝન્ટેશન આપશે. આ પ્રેઝન્ટેશનમાં ગુજરાતના અર્થતંત્ર, સુરક્ષા, સુવિધા અને સામાજિક મુદ્દા જેવી બાબતો પર ખાસ ભાર મૂકીને ચર્ચા કરવામાં આવશે, જે વૈશ્વિક સ્તરે ગુજરાતની તૈયારી દર્શાવશે.
