GPSC Recruitment: સરકારી નોકરીની તૈયારી કરી રહેલા ઉમેદવારો માટે મહત્વપૂર્ણ સમાચાર સામે આવ્યા છે. ગુજરાત જાહેર સેવા આયોગ (GPSC) દ્વારા રાજ્ય સરકારના વિવિધ વિભાગો, ગુજરાત વિધાનસભા સચિવાલય, ગુજરાત મેરિટાઇમ બોર્ડ અને વિવિધ મહાનગરપાલિકાઓમાં ક્લાસ-1 અને ક્લાસ-2ના અધિકારી કક્ષાના હોદ્દાઓ માટે મોટી ભરતી જાહેર કરવામાં આવી છે. આ ભરતી અંતર્ગત કુલ 345 જગ્યાઓ પર સીધી ભરતી કરવામાં આવશે, જેના માટે લાયક ઉમેદવારો પાસેથી ઓનલાઈન અરજીઓ મંગાવવામાં આવી છે.
GPSC દ્વારા જાહેર કરાયેલી આ ભરતી રાજ્યના શિક્ષણ, આરોગ્ય, ઉદ્યોગ, ખાણ, માર્ગ અને મકાન, સામાન્ય વહીવટ તેમજ સ્થાનિક સ્વરાજ્ય સંસ્થાઓ સહિતના અનેક મહત્વપૂર્ણ વિભાગોને આવરી લે છે. સરકારી ક્ષેત્રમાં કારકિર્દી બનાવવા ઇચ્છતા યુવાનો માટે આ ભરતીને મોટી તક તરીકે જોવામાં આવી રહી છે.
5 મેથી શરૂ થઈ અરજી પ્રક્રિયા, 16 જૂન છેલ્લી તારીખ
આયોગ દ્વારા જાહેર કરવામાં આવેલી સૂચના મુજબ ઓનલાઈન અરજી પ્રક્રિયા 5 મેથી શરૂ થઈ ચૂકી છે. રસ ધરાવતા ઉમેદવારો 16 જૂન સુધી GPSCની સત્તાવાર વેબસાઇટ પર જઈને ઓનલાઈન અરજી કરી શકશે.
GPSCએ ઉમેદવારોને સૂચના આપી છે કે અરજી કરતી વખતે પોતાના તાજેતરના ફોટોગ્રાફ અને સહી અપલોડ કરવી ફરજિયાત રહેશે. અરજી કરતાં પહેલાં ઉમેદવારોએ ભરતીની સંપૂર્ણ જાહેરાત અને લાયકાતની વિગતો ધ્યાનપૂર્વક વાંચવાની સલાહ આપવામાં આવી છે.
સૌથી વધુ 200 જગ્યાઓ મદદનીશ ઇજનેર (સિવિલ) માટે
આ ભરતીમાં સૌથી વધુ જગ્યાઓ માર્ગ અને મકાન વિભાગ હેઠળ ‘મદદનીશ ઇજનેર (સિવિલ), વર્ગ-2’ માટે જાહેર કરવામાં આવી છે. આ એક જ કેડરમાં કુલ 200 જગ્યાઓ ઉપલબ્ધ છે, જેના કારણે સિવિલ એન્જિનિયરિંગ ક્ષેત્રના ઉમેદવારો માટે આ ભરતી વિશેષ મહત્વ ધરાવે છે. રાજ્યમાં માર્ગ અને ઇન્ફ્રાસ્ટ્રક્ચર વિકાસના વિવિધ પ્રોજેક્ટ્સને ધ્યાનમાં રાખીને આ ભરતીને મહત્વપૂર્ણ માનવામાં આવી રહી છે.
ક્લાસ-1 અને ક્લાસ-2ની વિવિધ કેડરોમાં ભરતી
GPSC દ્વારા જાહેર કરાયેલી ભરતીમાં સંશોધન અધિકારી, ભૂસ્તરશાસ્ત્રી, નાયબ પશુપાલન નિયામક, સંયુક્ત ખેતી નિયામક, ગુજરાતી પ્રતિવેદક અને જિલ્લા શિક્ષણાધિકારી જેવા મહત્વપૂર્ણ હોદ્દાઓનો સમાવેશ થાય છે.
આ ઉપરાંત વિવિધ મહાનગરપાલિકાઓમાં એસ્ટેટ ઓફિસર, આઈસીટી ઓફિસર, લીગલ ઓફિસર અને વહીવટી અધિકારી જેવી જગ્યાઓ માટે પણ ભરતી કરવામાં આવશે.
આ પણ વાંચો: UPSC પરીક્ષામાં Face authenticationનો સફળ ઉપયોગ: ગુજરાતના ઉમેદવારોએ હવે શું ધ્યાનમાં રાખવું?
મેરિટાઇમ બોર્ડ અને ઔદ્યોગિક વિભાગમાં પણ તક
ગુજરાત મેરિટાઇમ બોર્ડ હેઠળ મદદનીશ ઇજનેર (યાંત્રિક), મદદનીશ ઇજનેર (બાંધકામ) અને ગ્રેજ્યુએટ એન્જિનિયર ટ્રેઈની જેવી જગ્યાઓ માટે પણ અરજીઓ મંગાવવામાં આવી છે. તે ઉપરાંત ઉદ્યોગ અને ખાણ વિભાગમાં ભૂસ્તરશાસ્ત્રી તથા મદદનીશ ભૂસ્તરશાસ્ત્રીની જગ્યાઓ જાહેર કરવામાં આવી છે. ઔદ્યોગિક સલામતી અને સ્વાસ્થ્ય વિભાગમાં પણ અધિકારી કક્ષાની વિવિધ જગ્યાઓ માટે ભરતી પ્રક્રિયા હાથ ધરવામાં આવી છે.
આ 19 કેડરની જગ્યાઓ માટે ભરતી
GPSC દ્વારા નીચેની 19 કેડરમાં ભરતી જાહેર કરવામાં આવી છે:
સંશોધન અધિકારી, વર્ગ-2
મદદનીશ ઇજનેર (સિવિલ), વર્ગ-2
ભૂસ્તરશાસ્ત્રી, વર્ગ-1
મદદનીશ ભૂસ્તરશાસ્ત્રી, વર્ગ-2
નાયબ પશુપાલન નિયામક, વર્ગ-1
સંયુક્ત ખેતી નિયામક, વર્ગ-1
ગુજરાતી પ્રતિવેદક, વર્ગ-2
મદદનીશ ઇજનેર (યાંત્રિક), વર્ગ-2
મદદનીશ ઇજનેર (બાંધકામ), વર્ગ-2
ગ્રેજ્યુએટ એન્જિનિયર ટ્રેઈની, વર્ગ-2
પ્રવર ઔષધ નિરીક્ષક, વર્ગ-2
નાયબ નિયામક ઔદ્યોગિક સલામતી અને સ્વાસ્થ્ય, વર્ગ-1
એસ્ટેટ અધિકારી, વર્ગ-2
આઈસીટી અધિકારી, વર્ગ-2
લીગલ ઓફિસર, વર્ગ-2
વહીવટી અધિકારી, વર્ગ-2
ઔદ્યોગિક સલામતી અને સ્વાસ્થ્ય અધિકારી, વર્ગ-2
મદદનીશ નિયામક બોઈલરો, વર્ગ-2
જિલ્લા શિક્ષણાધિકારી અને સમકક્ષ ગુજરાત શિક્ષણ સેવા, વર્ગ-1
ક્યાંથી કરશો અરજી?
ઉમેદવારો GPSCની સત્તાવાર વેબસાઇટ પર જઈને ભરતીની વિગતવાર જાહેરાત, શૈક્ષણિક લાયકાત, વયમર્યાદા, પગારધોરણ અને અન્ય શરતો વિશે માહિતી મેળવી શકે છે. રાજ્યભરના હજારો ઉમેદવારો માટે આ ભરતી સરકારી સેવામાં પ્રવેશવાની મોટી તક સાબિત થઈ શકે છે. ખાસ કરીને ઇજનેરી, શિક્ષણ, વહીવટ, કૃષિ, પશુપાલન અને કાયદા ક્ષેત્રના ઉમેદવારો માટે આ ભરતી મહત્વપૂર્ણ ગણાઈ રહી છે.
