ભારતના અનેક મોટા એરપોર્ટ પર છેલ્લા એક વર્ષ દરમિયાન વિમાનોના સંચાલનમાં જીપીએસ સિસ્ટમ સાથે ચેડાં થવાના બનાવો સામે આવ્યા છે. સોમવારે સંસદના ઉપલા ગૃહ રાજ્યસભામાં કેન્દ્રીય નાગરિક ઉડ્ડયન મંત્રી રામ મોહન નાયડુએ આ ગંભીર મુદ્દે લેખિતમાં જવાબ રજૂ કર્યો હતો. તેમણે દેશના હવાઈ મથકો પર બની રહેલી જીપીએસ જેમિંગ અને સ્પૂફિંગ જેવી ઘટનાઓની ગંભીરતા સ્વીકારી હતી અને વિમાન સુરક્ષાને વધુ મજબૂત કરવા માટે લેવાયેલા પગલાં વિશે માહિતી આપી હતી.
મંત્રીએ વિગતો આપતા જણાવ્યું હતું કે નવેમ્બર 2023માં ડીજીસીએ દ્વારા તમામ એરલાઈન્સ માટે એક નવો નિયમ જાહેર કરવામાં આવ્યો હતો. જે મુજબ જીપીએસ જેમિંગ કે સ્પૂફિંગ જેવી કોઈપણ શંકાસ્પદ પ્રવૃત્તિ ધ્યાનમાં આવે તો તેની જાણ કરવી ફરજિયાત છે. આ આદેશ બાદ અધિકારીઓને દેશના પ્રમુખ શહેરો જેવા કે કોલકાતા અમૃતસર મુંબઈ હૈદરાબાદ બેંગલુરુ અને ચેન્નઈ એરપોર્ટ પરથી સતત અપડેટ્સ મળી રહ્યા છે.
દિલ્હી એરપોર્ટ પર પાયલોટ્સને પડી મુશ્કેલી
રાજ્યસભામાં સાંસદ એસ નિરંજન રેડ્ડી દ્વારા પૂછવામાં આવેલા એક સવાલના જવાબમાં મંત્રીએ પુષ્ટિ કરી હતી કે દિલ્હીના ઈન્દિરા ગાંધી ઈન્ટરનેશનલ એરપોર્ટ પર પણ આવી સમસ્યા સર્જાઈ હતી. ખાસ કરીને રનવે 10 પર લેન્ડિંગ કરતી વખતે કેટલાક વિમાનોને જીપીએસ સ્પૂફિંગનો સામનો કરવો પડ્યો હતો. આ પરિસ્થિતિમાં સુરક્ષિત લેન્ડિંગ માટે ફ્લાઈટ્સને તાત્કાલિક ધોરણે ઈમરજન્સી પ્રોસેસ પર શિફ્ટ કરવી પડી હતી.
સરકારે સુરક્ષા માટે લીધા કડક પગલાં
આ સમસ્યાના ઉકેલ માટે સરકારે શું કર્યું તે અંગે મંત્રી રામ મોહન નાયડુએ ગૃહને માહિતગાર કર્યા હતા. તેમણે કહ્યું કે પરંપરાગત ગ્રાઉન્ડ બેઝ્ડ નેવિગેશન અને સર્વેલન્સ ઈન્ફ્રાસ્ટ્રક્ચરની સાથે મિનિમમ ઓપરેટિંગ નેટવર્કને ગ્લોબલ બેસ્ટ પ્રેક્ટિસ મુજબ જાળવી રાખવામાં આવ્યું છે. ભારત નવી ટેકનોલોજી અને કાર્યપદ્ધતિથી અપડેટ રહેવા માટે વૈશ્વિક પ્લેટફોર્મ્સ પર પણ સક્રિય છે. એવિયેશન સેક્ટરમાં હાલ સાયબર સિક્યુરિટી માટે રેન્સમવેર અને મેલવેર જેવા વૈશ્વિક જોખમો તોળાઈ રહ્યા છે.
વધુમાં તેમણે ઉમેર્યું હતું કે આ પ્રકારના જોખમો સામે લડવા માટે એરપોર્ટ ઓથોરિટી ઓફ ઈન્ડિયા પોતાના આઈટી નેટવર્ક અને માળખાને સુરક્ષિત કરવા એડવાન્સ્ડ સાયબર સિક્યુરિટીના ઉપાયો લાગુ કરી રહી છે. આ તમામ પગલાં નેશનલ ક્રિટિકલ ઈન્ફર્મેશન ઈન્ફ્રાસ્ટ્રક્ચર પ્રોટેક્શન સેન્ટર અને ઈન્ડિયન કોમ્પ્યુટર ઈમરજન્સી રિસ્પોન્સ ટીમ એટલે કે સીઈઆરટી ઈન જેવી સંસ્થાઓની ગાઈડલાઈન્સ મુજબ લેવામાં આવ્યા છે. જેમ જેમ જોખમોનું સ્વરૂપ બદલાય છે તેમ તેમ સુરક્ષા વ્યવસ્થાને પણ સતત અપગ્રેડ કરવામાં આવી રહી છે.
