કઈ ઉંમરના લોકોએ રોજ કેટલું ચાલવું જોઈએ : રોજ ચાલવાના શું છે ફાયદા?

આજના વ્યસ્ત જીવનમાં સ્વાસ્થ્ય અને ફિટનેસ માટે સમય આપવો સૌથી મુશ્કેલ કામ બની ગયું છે. આખો દિવસ કામ કર્યા પછી, આપણે એટલા થાકી જઈએ છીએ કે આપણામાં ચાલવાની શક્તિ પણ નથી રહેતી, પરંતુ શું તમે જાણો છો કે માત્ર થોડુંક ચાલવાથી આપણે પોતાને ફિટ રાખી શકીએ છીએ? શરીરને સ્વસ્થ અને ફિટ રાખવા માટે ચાલવું એ સૌથી સહેલો રસ્તો છે. જોકે, વ્યક્તિએ કઈ ઉંમરે કેટલું ચાલવું જોઈએ તે મોટો પ્રશ્ન છે.

50,000 લોકો સાથે સંકળાયેલા 15 અભ્યાસોના વૈજ્ઞાનિક મેટા-વિશ્લેષણ મુજબ, 10,000-પગલાની દૈનિક દિનચર્યા દરેક ઉંમરે યોગ્ય નથી. અભ્યાસમાં બતાવ્યું છે કે દરરોજ માત્ર થોડાં પગલાં ચાલવાથી ફાયદો થાય છે. આવો જાણીએ કઈ ઉંમરે કેટલા ડગલાં ચાલવા જોઈએ અને તેના ફાયદા...

તમારી ઉંમર પ્રમાણે તમારે દિવસમાં કેટલાં પગલાં ચાલવા જોઈએ

જો તમારી ઉંમર 18-30 વર્ષની હોય તો દરરોજ 8,000 થી 10,000 સ્ટેપ્સ ચાલો.

જો તમારી ઉંમર 31થી 50 વર્ષની વચ્ચે છે, તો તમે 7,000થી 9,000 સ્ટેપ્સ ચાલીને તમારી જાતને ફિટ રાખી શકો છો.

51-65 વર્ષની વયના લોકો 6,000થી 8,000 પગલાં લઈને લાંબુ જીવન જીવી શકે છે.

જો તમારી ઉંમર 65 વર્ષથી વધુ છે, તો દરરોજ 4,000થી 6,000 સ્ટેપ્સ પૂરતા છે.

ચાલવાના 7 અદ્ભૂત ફાયદા

1. વજન કંટ્રોલ થાય છે

દરરોજ ચાલવાથી શરીરમાં ચરબી બર્ન થાય છે, જેનાથી વજન વધતું અટકે છે. તેનાથી શરીર ફિટ અને સ્વસ્થ રહે છે. સ્થૂળતા જેવી કોઈ સમસ્યા રહેતી નથી.

2. હૃદયની હેલ્થ સુધરે છે

આજકાલ આખો દિવસ બેસીને ખાવાની ટેવ અને કામ કરવાને કારણે હ્રદયરોગનો ખતરો વધી રહ્યો છે. આવી સ્થિતિમાં ચાલવું ફાયદાકારક સાબિત થઈ શકે છે. તેનાથી હાર્ટ પમ્પિંગમાં સુધારો થાય છે અને બ્લડ પ્રેશર પણ સામાન્ય રહે છે.

3. ડાયાબિટીસ અને બ્લડ શુગર કંટ્રોલમાં રહે છે.

ડાયાબિટીસના દર્દીઓ માટે ચાલવું ખૂબ જ જરૂરી છે. આના કારણે બ્લડ શુગર કુદરતી રીતે સંતુલિત રહે છે અને કોઈ સમસ્યા ઊભી થતી નથી. તેનાથી નસોમાં કોલેસ્ટ્રોલ જમા થવાની સમસ્યા પણ થતી નથી.

4. માનસિક સ્વાસ્થ્ય સુધરે છે

માત્ર 30-મિનિટ ચાલવાથી ડિપ્રેશન, તણાવ અને ચિંતા ઓછી થઈ શકે છે. આનાથી મન આખો દિવસ સક્રિય રહે છે અને પ્રોડક્ટિવિટી વધે છે. સવારે કે સાંજે ગમે ત્યારે ચાલવાથી મગજ ખૂબ જ સક્રિય બને છે.

5. સાંધા અને સ્નાયુઓ મજબૂત બને છે

ચાલવું એ શરીરને થાક્યા વિના ફ્લેક્સિબલ અને મજબૂત રાખવાનો શ્રેષ્ઠ માર્ગ છે. તમે દિવસભર થોડાં પગલાંઓ ચાલીને તમારા સ્નાયુઓને મજબૂત બનાવી શકો છો.

6. ઊંઘ સારી આવે છે

આજકાલ સ્ક્રીન ટાઇમિંગ ખૂબ વધી ગયું છે, જેના કારણે રાત્રે મોડી ઊંઘ આવે છે. આ સવારની પ્રવૃત્તિઓને અસર કરે છે. દરરોજ ચાલવાથી શરીર થાકી જાય છે, જેનાથી ઊંઘ ઊંડી અને આરામ મળે છે.