ફાઈન ડાઈનિંગ રેસ્ટોરન્ટ કે ફાઈવ સ્ટાર હોટલમાં જ્યારે આપણે જમવા જઈએ છીએ, ત્યારે અવારનવાર એક વાત નોટિસ કરીએ છીએ કે ત્યાં પ્લેટમાં પીરસવામાં આવતા ખોરાકની માત્રા ખૂબ જ ઓછી હોય છે. અનેક લોકોને એ પ્રશ્ન થાય છે કે આટલા મોંઘા ભાવ લેવા છતાં આટલું ઓછું જમવાનું કેમ? જોકે, લક્ઝરી રેસ્ટોરન્ટમાં આ રીતે ઓછું ભોજન પીરસવા પાછળ એક ઊંડું લોજિક અને ચોક્કસ ગણતરી રહેલી છે.
સ્વાદને માણવાનો અનોખો અભિગમ
મોંઘી રેસ્ટોરન્ટમાં ખોરાકની ક્વોન્ટિટી ઓછી રાખવાનું સૌથી મોટું કારણ એ છે કે ત્યાં જમવાનું માત્ર પેટ ભરવા માટે નહીં, પરંતુ દરેક બાઈટના સ્વાદને ઊંડાણપૂર્વક સમજવા માટે પીરસવામાં આવે છે. અહીં ગેસ્ટ દરેક ડિશને ખૂબ જ ધ્યાનથી અને ધીમે-ધીમે માણી શકે તેવો માહોલ તૈયાર કરવામાં આવે છે.
કોર્સ મીલ સિસ્ટમ અને વિવિધતા
લક્ઝરી હોટલોમાં ગેસ્ટ સમક્ષ એકસાથે બધું જ પીરસવાને બદલે એક સમયે એક જ ડિશ રાખવામાં આવે છે. અહીં સામાન્ય રીતે 4 થી 8 કોર્સ મીલની પરંપરા હોય છે. જેમાં સ્ટાર્ટરથી લઈને મેઈન કોર્સ અને છેલ્લે ડેઝર્ટ સુધીની અલગ-અલગ વાનગીઓ પીરસાય છે. જો શરૂઆતમાં જ વધુ માત્રામાં ખાવાનું આપી દેવામાં આવે, તો ગેસ્ટ તમામ કોર્સનો આનંદ માણી શકતા નથી.
ટેસ્ટિંગ મેનૂ અને ફ્રેન્ચ કનેક્શન
ખાવામાં અનેક કોર્સ હોવાનો અર્થ 'ટેસ્ટિંગ મેનૂ' સાથે જોડાયેલો છે. આ ખ્યાલ ફ્રેન્ચ શબ્દ "Degustation" પરથી આવ્યો છે, જેનો અર્થ થાય છે વિવિધ વાનગીઓને થોડી-થોડી ચાખવી. આ સિસ્ટમમાં 5 થી 15 જેટલી નાની-નાની ડિશ સર્વ કરવામાં આવે છે, જેથી ગ્રાહક રેસ્ટોરન્ટની તમામ સ્પેશિયાલિટીનો સ્વાદ લઈ શકે.
સામગ્રીની ગુણવત્તા અને શેફની કલાત્મકતા
મોંઘી રેસ્ટોરન્ટ ક્યારેય પણ ગુણવત્તા સાથે સમજૂતી કરતી નથી. તેઓ દુનિયાભરમાંથી મંગાવેલા મોંઘા મસાલા અને તાજી સામગ્રીનો ઉપયોગ કરે છે. ખોરાકની માત્રા ઓછી હોવાથી શેફ દરેક ડિશ પર પૂરતું ધ્યાન આપી શકે છે અને તેને કલાત્મક રીતે સજાવી શકે છે. ફાઈન ડાઈનિંગમાં દરેક પ્લેટ એક 'વર્ક ઓફ આર્ટ' જેવી હોય છે.
સ્વાદનું મેનેજમેન્ટ
જો એક જ પ્લેટમાં ઘણી બધી વાનગીઓ ભરી દેવામાં આવે, તો દરેકનો વ્યક્તિગત સ્વાદ ઓળખવો મુશ્કેલ બની જાય છે. જ્યારે પ્લેટમાં મર્યાદિત ખોરાક હોય છે, ત્યારે તમારી જીભ દરેક ફ્લેવરને અલગથી અનુભવી શકે છે. આ પદ્ધતિથી ભોજનનો અસલી સ્વાદ લાંબા સમય સુધી જળવાઈ રહે છે અને ગેસ્ટ હેવીનેસ અનુભવ્યા વગર પૂરા મીલનો આનંદ લઈ શકે છે.
