ભારતીય બજારમાં લક્ઝરી અને હાઈ-પર્ફોર્મન્સ સુપરકારોનો ક્રેઝ સતત વધી રહ્યો છે. આ ટ્રેન્ડને ધ્યાનમાં રાખીને Ferrariએ પોતાની અત્યંત શક્તિશાળી સુપરકાર Ferrari 849 Testarossa ભારતમાં લોન્ચ કરી દીધી છે. આ નવી કાર કંપનીની લોકપ્રિય સુપરકાર SF90 Stradaleનું સ્થાન લેશે. આધુનિક ટેકનોલોજી, આક્રમક ડિઝાઇન અને પ્રચંડ એન્જિન પાવર સાથે આવેલી આ સુપરકાર લક્ઝરી અને સ્પીડના શોખીનો માટે એક નવું નજરાણું સાબિત થશે.
Ferrari 849 Testarossaનું દમદાર એન્જિન અને સ્પીડ
Ferrariએ આ સુપરકારમાં એન્જિનિયરિંગની કમાલ બતાવી છે. આ કારમાં 4.0 લીટરનું ટર્બો પેટ્રોલ એન્જિન આપવામાં આવ્યું છે. આ એન્જિનને પ્લગ-ઈન હાઈબ્રિડ સિસ્ટમ સાથે જોડવામાં આવ્યું છે, જેમાં 3 ઈલેક્ટ્રિક મોટર્સનો સમાવેશ થાય છે. આ આખી સિસ્ટમ ભેગી મળીને અંદાજે 1030 હોર્સપાવરની તાકાત જનરેટ કરે છે. આ પ્રચંડ પાવરને કારણે કારનું પર્ફોર્મન્સ અત્યંત સ્મૂધ અને તેજ બને છે.
કારમાં 8-સ્પીડ ઓટોમેટિક ટ્રાન્સમિશન સિસ્ટમ આપવામાં આવી છે. ઝડપની વાત કરીએ તો Ferrari 849 Testarossaની ટોપ સ્પીડ અંદાજે 330 કિલોમીટર પ્રતિ કલાકની છે. આ સુપરકાર માત્ર 2.25 સેકન્ડમાં 0 થી 100 કિલોમીટર પ્રતિ કલાકની સ્પીડ પકડી શકે છે, જ્યારે 200ની સ્પીડ સુધી પહોંચવામાં તેને માત્ર 6.3 સેકન્ડનો સમય લાગે છે.
આધુનિક ફીચર્સ અને લક્ઝરી ઈન્ટિરિયર
Ferrariની આ નવી સુપરકારમાં પ્રીમિયમ ફીચર્સની ભરમાર છે:
ડિજિટલ ડિસ્પ્લે: કારમાં ડ્રાઈવર માટે 16 ઈંચનું વિશાળ ડિજિટલ ઈન્સ્ટ્રુમેન્ટ ક્લસ્ટર આપવામાં આવ્યું છે.
ઈન્ફોટેનમેન્ટ: આમાં 9 ઈંચની ટચસ્ક્રીન ડિસ્પ્લે છે, જે વાયરલેસ Android Auto અને Apple CarPlayને સપોર્ટ કરે છે.
સાઉન્ડ સિસ્ટમ: શ્રેષ્ઠ મ્યુઝિક અનુભવ માટે 7 સ્પીકરવાળી પ્રીમિયમ ઓડિયો સિસ્ટમ ફિટ કરવામાં આવી છે.
ડિઝાઇન: એલઈડી હેડલાઈટ્સ અને એરોડાયનેમિક ડિઝાઇન આ કારને રસ્તા પર અલગ તારવે છે.
ભારતમાં કિંમત અને હરીફાઈ
Ferrariએ આ સુપરકારની ભારતમાં શરૂઆતી કિંમત અંદાજે 10.37 કરોડ રૂપિયા નિર્ધારિત કરી છે. જોકે, ગ્રાહકો પોતાની પસંદગી મુજબ કસ્ટમાઈઝેશન કરાવી શકે છે, જેના કારણે કિંમતમાં વધારો થઈ શકે છે.
બજારમાં Ferrari 849 Testarossaની સીધી સ્પર્ધા Lamborghini Revuelto સાથે થશે. આ ઉપરાંત, 1035 bhp પાવર ધરાવતી આ હાઈબ્રિડ કાર McLaren 750S અને Aston Martin Valhalla જેવી કારોને પણ જોરદાર ટક્કર આપશે.
