Facebook Down : જો આજે 19 જુલાઈએ તમારું Facebook એકાઉન્ટ સામાન્ય રીતે કામ નથી કરી રહ્યું, તો ચિંતા કરવાની જરૂર નથી. વિશ્વભરના હજારો યુઝર્સે Facebookમાં લોગિન કરવામાં, વેબસાઇટ ઍક્સેસ કરવામાં અને મુખ્ય ફીચર્સનો ઉપયોગ કરવામાં મુશ્કેલી હોવાની ફરિયાદ નોંધાવી છે. સોશિયલ મીડિયા અને આઉટેજ ટ્રેકિંગ પ્લેટફોર્મ્સ પર પણ આ સમસ્યા અંગે મોટી સંખ્યામાં પોસ્ટ્સ જોવા મળી રહી છે. ઉપલબ્ધ માહિતી મુજબ, આ સમસ્યા વૈશ્વિક સ્તરે જોવા મળી રહી છે. અનેક યુઝર્સે જણાવ્યું છે કે તેઓ પોતાના Facebook એકાઉન્ટમાં લોગિન કરી શકતા નથી, જ્યારે કેટલાક માટે વેબસાઇટ ખુલતી જ નથી અથવા "Account Temporarily Unavailable. Your account is currently unavailable due to a site issue" જેવા મેસેજ જોવા મળી રહ્યા છે. પ્રાથમિક અહેવાલો દર્શાવે છે કે મોબાઇલ એપની સરખામણીએ ડેસ્કટોપ અથવા વેબ વર્ઝન પર અસર વધુ જોવા મળી રહી છે.
યુઝર્સને કઈ પ્રકારની સમસ્યાઓનો સામનો કરવો પડી રહ્યો છે?
વિવિધ દેશોમાંથી મળતી ફરિયાદો મુજબ સમસ્યાઓ એકસરખી નથી. કેટલાક યુઝર્સ માટે ન્યૂઝ ફીડ અપડેટ થતું નથી, જ્યારે અન્ય લોકો ફોટા અને વીડિયો અપલોડ કરી શકતા નથી. કેટલાક કિસ્સાઓમાં Messenger મારફતે મેસેજ મોકલવામાં પણ મુશ્કેલી આવી રહી હોવાનું જણાવાયું છે. આ પરથી અનુમાન લગાવવામાં આવી રહ્યું છે કે, Metaની કેટલીક સંબંધિત સેવાઓ પણ આ ટેક્નિકલ સમસ્યાથી પ્રભાવિત થઈ હોઈ શકે છે, જોકે તેની સત્તાવાર પુષ્ટિ હજુ થઈ નથી. આ દરમિયાન ઘણા યુઝર્સે X, Reddit અને અન્ય સોશિયલ પ્લેટફોર્મ્સ પર સ્ક્રીનશોટ શેર કરીને જણાવ્યું છે કે તેમનું એકાઉન્ટ બ્લોક થયું નથી, પરંતુ સર્વર સંબંધિત સમસ્યાને કારણે તેઓ Facebookનો ઉપયોગ કરી શકતા નથી.
આ પણ ખાસ વાંચો : તમારો ફોન Water Resistant છે? : છતાં ચાર્જ કરતાં પહેલા આ વાતો અવશ્ય જાણો, નહીં તો થઈ શકે મોટું નુકસાન
Downdetector પર ફરિયાદોમાં અચાનક વધારો
આઉટેજ ટ્રેક કરતી વેબસાઇટ Downdetector પર Facebook સંબંધિત ફરિયાદોમાં અચાનક મોટો ઉછાળો નોંધાયો છે. સામાન્ય રીતે ખૂબ ઓછી ફરિયાદો મળતી હોવા છતાં થોડા જ સમયમાં હજારો યુઝર્સે સમસ્યા નોંધાવી હતી, જેનાથી સ્પષ્ટ થાય છે કે આ કોઈ એક વિસ્તાર પૂરતી મર્યાદિત સમસ્યા નથી પરંતુ વ્યાપક ટેક્નિકલ ખામી હોઈ શકે છે. ડાઉનડિટેક્ટર પર નોંધાતી ફરિયાદો યુઝર્સ દ્વારા આપવામાં આવેલી માહિતી પર આધારિત હોય છે, તેથી વાસ્તવમાં અસરગ્રસ્ત યુઝર્સની સંખ્યા આ કરતાં વધુ પણ હોઈ શકે છે.
Meta તરફથી હજુ સુધી કોઈ સત્તાવાર નિવેદન નથી
અત્યાર સુધી Metaએ આ આઉટેજનું ચોક્કસ કારણ જાહેર કર્યું નહોતું અને કોઈ સત્તાવાર નિવેદન પણ બહાર પાડ્યું નહોતું. સામાન્ય રીતે આવી સ્થિતિમાં કંપની પહેલા ટેક્નિકલ તપાસ પૂર્ણ કરે છે અને ત્યારબાદ કારણ તથા સેવાઓ પુનઃસ્થાપિત થવા અંગે માહિતી આપે છે. હાલમાં ઉપલબ્ધ માહિતીના આધારે એવું કહી શકાય કે આ સમસ્યા વ્યક્તિગત એકાઉન્ટ અથવા પાસવર્ડ સાથે સંબંધિત હોવાની શક્યતા ઓછી છે અને સર્વર સ્તરની ખામી હોવાની સંભાવના વધુ છે. જોકે Meta દ્વારા સત્તાવાર પુષ્ટિ થયા બાદ જ ચોક્કસ કારણ સ્પષ્ટ થશે.
આ પણ ખાસ વાંચો : AI Agent શું છે? : Chatbot કરતાં કેમ છે વધુ સ્માર્ટ, જાણો બંને વચ્ચેનો સૌથી મોટો તફાવત
જો તમારા Facebookમાં પણ સમસ્યા આવી રહી હોય તો શું કરવું?
જો તમે પણ Facebook ઍક્સેસ કરી શકતા ન હો, તો ગભરાવાની જરૂર નથી. આવી સ્થિતિમાં વારંવાર એપ ઇન્સ્ટોલ-અનઇન્સ્ટોલ કરવી, પાસવર્ડ બદલવો અથવા એકાઉન્ટ રિકવર કરવાની પ્રક્રિયા શરૂ કરવી યોગ્ય નથી. જો સમસ્યા Metaના સર્વર સાથે સંબંધિત હશે, તો કંપની દ્વારા ટેક્નિકલ સુધારા બાદ સેવા આપમેળે સામાન્ય થઈ જશે. તમે થોડો સમય રાહ જોઈ શકો છો અને થોડા સમય બાદ ફરીથી લોગિન કરવાનો પ્રયાસ કરી શકો છો. જો અન્ય Meta સેવાઓ પણ અસરગ્રસ્ત હોય, તો તેમની કામગીરી પણ ધીમે ધીમે સામાન્ય થવાની શક્યતા રહે છે.
