Assembly Elections 2026: ભારતીય ચૂંટણી પંચે આગામી વિધાનસભા ચૂંટણીઓમાં વૃદ્ધો, દિવ્યાંગો અને આવશ્યક સેવાઓમાં તૈનાત મતદારો માટે મોટી રાહત આપતી સુવિધાની જાહેરાત કરી છે. હવે આ મતદારો ઘરે બેઠા અથવા ફરજ દરમિયાન પણ પોસ્ટલ બેલેટ (ટપાલ મતપત્ર) દ્વારા સરળતાથી મતદાન કરી શકશે.
આ વ્યવસ્થા 'લોક પ્રતિનિધિત્વ અધિનિયમ, 1951' ની કલમ 60(સી) હેઠળ લાગુ કરવામાં આવી છે, જેથી કોઈ પણ પાત્ર મતદાર પોતાના મતાધિકારથી વંચિત ન રહે. ચૂંટણી પંચે મતદાનના દિવસે કવરેજ કરનાર અધિકૃત મીડિયા કર્મીઓને પણ આવશ્યક સેવાઓમાં તૈનાત 'ગેરહાજર મતદારો'ની શ્રેણીમાં સામેલ કર્યા છે. તેઓ પણ પોસ્ટલ બેલેટથી વોટ આપવા માટે હકદાર રહેશે.
કોને અને કેવી રીતે મળશે આ સુવિધા?
વૃદ્ધો અને દિવ્યાંગો: 85 વર્ષથી વધુ વયના વૃદ્ધ મતદારો અને દિવ્યાંગો પોસ્ટલ બેલેટથી મતદાન કરી શકે છે. આ માટે ફોર્મ 12D ભરીને ચૂંટણી જાહેરનામું બહાર પડ્યાના 5 દિવસની અંદર પોતાના બૂથ લેવલ ઓફિસર (BLO) મારફતે રિટર્નિંગ ઓફિસર (RO) ને જમા કરાવવાનું રહેશે. ચૂંટણી ટીમ ઘરે આવીને મત એકત્ર કરશે. આ પ્રક્રિયા પારદર્શક રહેશે અને ઉમેદવારોની ટીમને પણ જાણ કરવામાં આવશે.
આવશ્યક સેવાઓના કર્મચારીઓ: મતદાનના દિવસે ફરજ પર રહેલા કર્મચારીઓ પણ આનો લાભ લઈ શકશે. જેમાં ફાયર બ્રિગેડ, આરોગ્ય સેવાઓ, વીજળી વિભાગ, ટ્રાફિક પોલીસ, એમ્બ્યુલન્સ સેવા, વિમાન સેવા અને લાંબા અંતરની સરકારી એસ.ટી. નિગમ વગેરેનો સમાવેશ થાય છે. આવા મતદારો તેમના વિભાગના નિયુક્ત નોડલ અધિકારી દ્વારા અરજી કરી શકે છે.
સેવારત મતદારો માટે વિશેષ જોગવાઈ
ચૂંટણી ડ્યુટી પર તૈનાત મતદારો પોસ્ટલ બેલેટ મેળવશે, મતદાન કરશે અને સુવિધા કેન્દ્ર પર જમા કરાવશે. સંપૂર્ણ ગોપનીયતા સુનિશ્ચિત કરવા માટે પંચે સ્પષ્ટ સૂચનાઓ જારી કરી છે. ઉમેદવારોની અંતિમ યાદી તૈયાર થતાની સાથે જ ઈલેક્ટ્રોનિક ટ્રાન્સમિટેડ પોસ્ટલ બેલેટ સિસ્ટમ (ETPBS) દ્વારા બેલેટ પેપર ઇલેક્ટ્રોનિક રીતે મોકલવામાં આવશે. ખાસ વાત એ છે કે આ સુવિધા માટે કોઈ ટપાલ ખર્ચની જરૂર નથી – તે તદ્દન મફત છે.
મહત્વપૂર્ણ સમયમર્યાદા
નોંધનીય છે કે તમામ પોસ્ટલ બેલેટ 4 મે, 2026 ના રોજ મતગણતરીના દિવસે સવારે 8:00 વાગ્યા સુધીમાં સંબંધિત રિટર્નિંગ ઓફિસર સુધી પહોંચી જવા જોઈએ. ચૂંટણી પંચનું આ પગલું “કોઈ મતદાર પાછળ ન રહી જાય” એવા સંકલ્પને મજબૂત કરે છે, જેથી વૃદ્ધો, દિવ્યાંગો અને ફરજ પરના લોકો કોઈપણ મુશ્કેલી વગર લોકશાહીના પર્વમાં સહભાગી થઈ શકે. વધુ માહિતી માટે ચૂંટણી પંચની સત્તાવાર વેબસાઇટ અથવા સ્થાનિક RO ઓફિસનો સંપર્ક કરી શકાય છે.
