એન્ફોર્સમેન્ટ ડિરેક્ટોરેટ (ED)ની અમદાવાદ ઝોનલ ઓફિસે શેરબજારમાં રોકાણના નામે રોકાણકારો સાથે કરોડો રૂપિયાની છેતરપિંડી કરનાર માસ્ટરમાઇન્ડ હિમાંશુ ઉર્ફે પિંટુ ભાવસાર અને તેના સાથીદારો વિરુદ્ધ મોટી કાર્યવાહી હાથ ધરી છે. PMLA (Prevention of Money Laundering Act) હેઠળ ચાલી રહેલી તપાસમાં EDએ આ ટોળકી પાસેથી અંદાજે 110 કિલોગ્રામ ચાંદી, 1.296 કિલોગ્રામ સોનું અને કરોડો રૂપિયાની મિલકતોના દસ્તાવેજો કબજે કર્યા છે. આ માસ્ટરમાઇન્ડે મહેસાણા અને તેની આસપાસના વિસ્તારોમાં ઓફિસો ખોલીને લોકો સાથે અંદાજે 10.87 કરોડ રૂપિયાની ઠગાઈ કરી હોવાનું બહાર આવ્યું છે.
દરોડામાં મળ્યો સોના-ચાંદી અને રોકડનો મોટો જથ્થો
EDની તપાસ દરમિયાન આરોપીઓના વિવિધ સ્થળો પરથી કિંમતી ધાતુઓ અને રોકડ જપ્ત કરવામાં આવી છે. જપ્ત કરાયેલ 110 કિલોગ્રામ ચાંદીની બજાર કિંમત અંદાજે 2.4 કરોડ રૂપિયા અને 1.296 કિલોગ્રામ સોનાની કિંમત 1.7 કરોડ રૂપિયા આંકવામાં આવી છે. આ ઉપરાંત તપાસમાં 39.7 કિલોગ્રામ ચાંદીના દાગીના, 38.8 લાખ રૂપિયાની રોકડ રકમ અને 10.6 લાખ રૂપિયાનું વિદેશી ચલણ પણ મળી આવ્યું છે. આરોપીઓએ આ નાણાંનો ઉપયોગ અંગત મોજશોખ અને મિલકતો ખરીદવા માટે કર્યો હતો.
ત્રણ શહેરોમાં ઓફિસો ખોલીને આચર્યું કૌભાંડ
તપાસમાં ખુલાસો થયો છે કે હિમાંશુ ભાવસારે લોકોનો વિશ્વાસ જીતવા માટે મહેસાણા, વિસનગર અને વડનગર જેવા શહેરોમાં આલીશાન ઓફિસો ખોલી હતી. તેણે મોટી સંખ્યામાં ટેલીકોલર્સ રાખ્યા હતા, જેઓ સંભવિત રોકાણકારોને ફોન કરીને શેરબજારમાં ટૂંકા સમયમાં ઊંચા વળતરની લાલચ આપતા હતા. રોકાણકારો જ્યારે પૈસા આપતા, ત્યારે આ રકમ કોઈ કંપનીના શેરમાં રોકાણ કરવાને બદલે આરોપીઓ પોતાના અંગત બેંક ખાતાઓમાં ટ્રાન્સફર કરી લેતા હતા.
SEBIના લાયસન્સ વગર જ ચાલતું હતું કૌભાંડ
મની લોન્ડરિંગની તપાસમાં એ પણ સામે આવ્યું છે કે હિમાંશુ ભાવસારે તેની કંપનીઓ જેવી કે વિશ્વાસ સ્ટોક્સ રિસર્ચ પ્રાઇવેટ લિમિટેડ, દલાલ સ્ટોક્સ એડવાઇઝરી પ્રાઇવેટ લિમિટેડ અને દેવકી સ્ટોક્સ પ્રાઇવેટ લિમિટેડ માટે SEBI (Securities and Exchange Board of India) પાસેથી કોઈ માન્ય રજિસ્ટ્રેશન મેળવ્યું નહોતું. તે પોતાની વ્યક્તિગત ક્ષમતામાં મેળવેલા સર્ટિફિકેટનો દુરુપયોગ કરીને ગેરકાયદેસર રીતે ઇન્વેસ્ટમેન્ટ એડવાઇઝરી ચલાવતો હતો. આ મામલે મહેસાણાના ખેરાલુ પોલીસ સ્ટેશનમાં નોંધાયેલી FIRના આધારે EDએ તપાસનો વ્યાપ વધાર્યો છે.
