Khichado Recipe: ઉત્તરાયણ ગુજરાતીઓ માટે ખુશીઓ અને પરંપરાઓનો તહેવાર છે. આ દિવસે આકાશમાં પતંગોની ધૂમ હોય છે, તલ-ગોળની મીઠાસ છલકાય છે અને ઘરે ઘરે એક ખાસ વાનગી સાત ધાનનો ખીચડો બનાવવામાં આવે છે.! સનાતન ધર્મમાં ઉત્તરાયણનું મહત્વપૂર્ણ સ્થાન છે અને આ દિવસે દાન-પુણ્ય કરવાની પરંપરા છે. સાત ધાનનો ખીચડો બનાવીને ખાવો અને અન્યને ખવડાવવો એ પુણ્ય કાર્ય માનવામાં આવે છે. આ પૌષ્ટિક ખીચડો શિયાળામાં ગરમી આપે છે અને તેને બનાવવો પણ ખૂબ સરળ છે. ઘઉં, જુવાર, બાજરી, દાળો અને તાજી શાકભાજીથી બનેલો આ ખીચડો દહીં કે કાઢી સાથે ખાવામાં આવે તો સ્વાદ દ્વિગુણિત થઈ જાય છે. આ વર્ષે ઉત્તરાયણ પર ઘરે આ સ્પેશિયલ ખીચડો બનાવવા માટે અમે તમને સ્ટેપ બાય સ્ટેપ સરળ રેસિપી અને ટિપ્સ આપી રહ્યા છીએ.
જરૂરી સામગ્રી
સાત ધાનનો ખીચડો બનાવવા માટે આ વસ્તુઓની જરૂર પડશે:
ઘઉં, જુવાર, બાજરી
તુવેર દાળ, ફોતરાવાળી દાળ, ચણાની દાળ, ઝીણા ચોખા
તાજા વટાણા, તુવેર, લીલા ચણા
ટામેટા, ઘી, જીરું, રાઈ, હીંગ
સુકા લાલ મરચાં, તજ-લવિંગ, મીઠા લીમડાના પાન
લાલ મરચું પાઉડર, હળદર, ધાણા-જીરું પાઉડર, કોથમીર
મીઠું સ્વાદાનુસાર
સ્ટેપ 1: ધાન તૈયાર કરો
સાતેય ધાનને સારી રીતે સાફ કરીને ચોખ્ખા પાણીથી ધોઈ લો. રાત્રે પલાળી દો જેથી તે સારી રીતે નરમ થઈ જાય. બીજા દિવસે પાણી કાઢીને બધા ધાનને એકસાથે મિક્સ કરો.
સ્ટેપ 2: ખીચડો બાફો
કૂકરમાં સાત ધાન કરતાં વધુ પાણી મૂકીને ઉકાળો. પાણી ઉકળે ત્યારે તેમાં પલાળેલા ધાન, વટાણા, તુવેર અને લીલા ચણા ઉમેરો. સ્વાદાનુસાર મીઠું અને થોડું ઘી નાખીને બે-ત્રણ સીટી આવે તેટલો બાફી લો.
સ્ટેપ 3: વઘાર તૈયાર કરો
એક પૅનમાં ઘી ગરમ કરો. તેમાં રાઈ, જીરું અને હીંગનો વઘાર કરો. સુકા લાલ મરચાં, તજ-લવિંગ, મીઠા લીમડાના પાન અને કાપેલા ટામેટા ઉમેરો. ટામેટા નરમ થાય ત્યારે હળદર, લાલ મરચું પાઉડર અને ધાણા-જીરું નાખો.
સ્ટેપ 4: ખીચડો તૈયાર કરો અને પીરસો
બાફેલા ખીચડામાં તૈયાર વઘાર ઉમેરીને સારી રીતે મિક્સ કરો. ઉપરથી તાજી કોથમીર છાંટીને ગરમાગરમ પીરસો. દહીં કે કાઢી સાથે ખાવામાં આવે તો સ્વાદ વધુ વધી જાય છે!
આ ઉત્તરાયણે ઘરે સાત ધાનનો ખીચડો બનાવીને પરિવાર સાથે મજા માણો અને પુણ્ય પણ કમાઓ. ઉત્તરાયણની ખૂબ ખૂબ શુભકામનાઓ!
