ઓપરેશન સિંદૂર બાદ ભારત પોતાની લશ્કરી ક્ષમતાઓને વધુ મજબૂત બનાવવાની દિશામાં આગળ વધી રહ્યું છે. સંરક્ષણ સંશોધન વિકાસ સંગઠન (DRDO) એ બહુસ્તરીય વાયુ સંરક્ષણ પ્રણાલી – ઇન્ટિગ્રેટેડ એર ડિફેન્સ વેપન સિસ્ટમ (IADWS) – નું પ્રથમ સફળ પરીક્ષણ કર્યું છે. આ પરીક્ષણ 23 ઑગસ્ટે બપોરે 12:30 વાગ્યે ઓડિશાના દરિયાકાંઠે કરવામાં આવ્યું હતું.
સંરક્ષણ પ્રધાન રાજનાથ સિંહે X પર પોસ્ટ કરીને આ સિદ્ધિ અંગે માહિતી આપી અને DRDO તથા ભારતીય સશસ્ત્ર દળોને અભિનંદન પાઠવ્યા.
શું છે IADWS?
DRDO દ્વારા વિકસાવાયેલ IADWS એક અદ્યતન બહુસ્તરીય વાયુ સંરક્ષણ પ્રણાલી છે. તેમાં અનેક સ્વદેશી મિસાઇલો અને ડાયરેક્ટેડ એનર્જી વેપન (DEW) શામેલ છે.
ક્વિક રિએક્શન સરફેસ-ટુ-એર મિસાઇલ (QRSAM)
વેરી શોર્ટ રેન્જ એર ડિફેન્સ સિસ્ટમ (VSHORADS)
ડાયરેક્ટેડ એનર્જી વેપન (DEW) – લેસર આધારિત હથિયાર, જે દુશ્મનના ફાઇટર જેટ્સ અને મિસાઇલોને હવામાં જ નષ્ટ કરી શકે છે.
DRDOનું નિવેદન
DRDO એ જણાવ્યું કે આ અનોખું ઉડાન પરીક્ષણ ભારતની બહુસ્તરીય વાયુ સંરક્ષણ ક્ષમતા સ્થાપિત કરે છે. આ સિસ્ટમ દ્વારા દુશ્મનના હવાઈ હુમલાઓ સામે દેશની મહત્વપૂર્ણ સુવિધાઓનું રક્ષણ વધુ મજબૂત બનશે.
કેમ છે ખાસ?
મલ્ટી લેયર્ડ પ્રોટેક્શનની ક્ષમતા
સંપૂર્ણ સ્વદેશી ટેકનોલોજી પર આધારિત છે
મિસાઇલ તેમજ ફાઇટર જેટ્સ બંનેને નિશાન બનાવી શકે છે
અદ્યતન લેસર હથિયાર સાથે સજ્જ
