ઉન્નાવ રેપ કેસના મુખ્ય આરોપી પૂર્વ ધારાસભ્ય કુલદીપ સિંહ સેંગર (Kuldeep Singh Sengar) ને દિલ્હી હાઈકોર્ટ તરફથી મોટો ઝટકો લાગ્યો છે. હાઈકોર્ટે પૂર્વ ધારાસભ્ય દ્વારા સજા સ્થગિત કરવા માટે દાખલ કરવામાં આવેલી અરજીને ફગાવી દીધી છે. દિલ્હી હાઈકોર્ટે કસ્ટોડિયલ ડેથ સંબંધિત કેસમાં સેંગરની અરજીને ફગાવી દીધી છે. આ કેસ ઉન્નાવ રેપ પીડિતાના પિતાના કસ્ટડી દરમિયાન મૃત્યુના સંદર્ભમાં નોંધાયેલો હતો. આ કેસમાં સજાને કારણે કુલદીપ સિંહ સેંગર જેલમાંથી બહાર આવી શક્યા ન હતા.
કુલદીપ સિંહ સેંગરને 2019 માં ટ્રાયલ કોર્ટે 10 વર્ષની સખત કેદની સજા ફટકારી હતી. સેંગરે દિલ્હી હાઈકોર્ટમાં આ સજાને સ્થગિત કરવાની માંગ કરતી અરજી દાખલ કરી હતી. પૂર્વ ધારાસભ્યએ કોર્ટમાં દલીલ કરી હતી કે તેઓ લાંબા સમયથી જેલમાં બંધ છે અને તેમનું સ્વાસ્થ્ય બગડી રહ્યું છે. અરજીમાં ડાયાબિટીસ, મોતિયા અને રેટિના ડિટેચમેન્ટ જેવી બીમારીઓનો પણ ઉલ્લેખ કરવામાં આવ્યો હતો અને વિનંતી કરવામાં આવી હતી કે તેમને તિહાર જેલની બહાર સારવાર માટે દિલ્હીના એઈમ્સમાં ટ્રાન્સફર કરવામાં આવે.
કુલદીપ સિંહ સેંગરની અરજી, જે CrPC ની કલમ 389 હેઠળ દાખલ કરવામાં આવી હતી, તેમાં અપીલ સુધી તેમની સજા સ્થગિત કરવાની માંગ કરવામાં આવી હતી. પૂર્વ ધારાસભ્ય દ્વારા કોર્ટમાં દાખલ કરવામાં આવેલી સેંગરની અરજીનો CBI અને પીડિતા બંનેએ વિરોધ કર્યો હતો. CBI એ હાઇકોર્ટને જણાવ્યું હતું કે આ એક ખૂબ જ ગંભીર કેસ છે, જેમાં અપહરણ, હુમલો અને કસ્ટોડિયલ ડેથ જેવા ગુનાઓનો સમાવેશ થાય છે. તેમાં એમ પણ કહેવામાં આવ્યું હતું કે સેંગરનો પ્રયાસ પીડિતા અને તેના પરિવારને ચૂપ કરવાનો હતો. પીડિતા પક્ષે એવી પણ દલીલ કરી હતી કે આવા આરોપીને રાહત આપવી ન્યાયની વિરુદ્ધ હશે. તમામ પક્ષોને સાંભળ્યા પછી, ન્યાયાધીશ રવિન્દર દુડેજાએ પોતાનો ચુકાદો આપ્યો, સજા સ્થગિત કરવાની અરજીને ફગાવી દીધી.
29 ડિસેમ્બરે સુપ્રીમ કોર્ટ તરફથી આવ્યો હતો આ નિર્ણય
તમને જણાવી દઈએ છે કે 29 ડિસેમ્બરના રોજ સુપ્રીમ કોર્ટે 2017ના ઉન્નાવ રેપ કેસમાં સેંગરની આજીવન કેદની સજાને સ્થગિત કરવાના દિલ્હી હાઈકોર્ટના આદેશ પર સ્ટે આપ્યો હતો. સેંગરને તેમની અપીલ પર જામીન આપવામાં આવ્યા હતા. પૂર્વ ધારાસભ્ય કુલદીપ સિંહ સેંગરને ઉન્નાવ રેપ કેસમાં દોષિત ઠેરવવામાં આવ્યા છે અને તેમને આજીવન કેદની સજા ફટકારવામાં આવી છે. સેંગરે તે સજા સામે અપીલ કરી છે.
