હવે ભક્તો જાતે જ ચઢાવી શકશે ડાકોરના ઠાકોરને ધજા : બદલાઈ જશે રણછોડરાયજી મંદિરે ધજા ચડાવવાની વર્ષો જુની પદ્ધતિ

Gujarat Tourism: ગુજરાતના ખેડા જિલ્લાના પ્રખ્યાત યાત્રાધામ ડાકોરમાં વર્ષોથી ધજા ચઢાવવાની પ્રથા ચાલતી આવે છે. ધજા ચડાવવાની પરંપરાનો ઇતિહાસ ખુબ જુનો છે. ડાકોરમાં ધજા અર્પણ કરવાની પરંપરા પ્રાચીન છે. માન્યતા મુજબ, જ્યારે શ્રીકૃષ્ણ ભક્ત બોડાણાની ભક્તિથી પ્રસન્ન થઈને દ્વારકાથી ડાકોર પધાર્યા, ત્યારે આ પરંપરા શરૂ થઈ. આજે પણ ભક્તો પોતાની માનતા પૂર્ણ કરવા માટે અહીં ધજા ચડાવે છે.

જોકે, ડાકોરના ઠાકોરને ધજા ચઢાવવાની પદ્ધતિમાં હવે બદલાવ થવા જઈ રહ્યો છે. ડાકોરમાં સ્થિત રાજાધિરાજ ભગવાન શ્રી કૃષ્ણના સ્વરૂપ રણછોડરાયજીના મંદિરમાં ભક્તો માટે ખાસ વ્યવસ્થા ઉભી કરાશે. મંદિર ટ્રસ્ટ દ્વારા ધજા ચડાવવાની પરંપરાગત પદ્ધતિમાં બદલાવ કરવામાં આવી રહ્યો છે. જેને પગલે હવે ભક્તો જાતે જ નીચે ઊભા રહીને ધજા શિખર સુધી પહોંચાડી શકશે.

નવી દોરડા-ગરગડી સિસ્ટમ શરૂઃ

મંદિરના સુવર્ણ શિખર પર દોરડા અને ગરગડી (પુલ્લી) સિસ્ટમ સ્થાપિત કરવાની કામગીરી હાલમાં ઝડપથી ચાલી રહી છે. આ નવી વ્યવસ્થાથી ભક્તો મંદિરના પરિસરમાંથી જ સરળતાથી ધજા ચડાવી શકશે. અત્યાર સુધી આ કાર્ય મંદિરના કર્મચારીઓ દ્વારા કરવામાં આવતું હતું.

પ્રાયોગિક ધોરણે નવી સિસ્ટમનો અમલઃ

મંદિર ટ્રસ્ટના જણાવ્યા મુજબ આ નિર્ણય પ્રાયોગિક ધોરણે લેવામાં આવ્યો છે. શરૂઆતમાં આ સિસ્ટમ કેવી રીતે કાર્ય કરે છે અને ભક્તોનો પ્રતિસાદ કેવો મળે છે તેની સમીક્ષા કરવામાં આવશે. સફળતા મળ્યા બાદ આ વ્યવસ્થા કાયમી બનાવવાની યોજના છે.

અંબાજી જેવી સુવિધા હવે ડાકોરમાંઃ

આ પ્રકારની દોરડા-ગરગડી વ્યવસ્થા અંબાજી મંદિર જેવા યાત્રાધામોમાં વર્ષોથી કાર્યરત છે. હવે એ જ મોડેલ પર ડાકોરમાં પણ ભક્તોને સુવિધા મળશે, જેના કારણે ધજા ચડાવવાની પ્રક્રિયા વધુ સરળ બનશે. દર વર્ષે લાખો ભક્તો ડાકોરમાં દર્શન માટે આવે છે. ધજા ચડાવવાનું ધાર્મિક મહત્વ ખૂબ વિશેષ છે. અગાઉ ભક્તોને લાંબી રાહ જોવી પડતી હતી અથવા કર્મચારીઓ પર આધાર રાખવો પડતો હતો. નવી સિસ્ટમથી આ પ્રક્રિયા ઝડપી અને સ્વયંસંચાલિત બનશે.

નવી વ્યવસ્થા માત્ર સુવિધા પૂરતી નથી, પણ સલામતીને પણ ધ્યાનમાં રાખીને બનાવવામાં આવી છે. હવે કર્મચારીઓને વારંવાર ઊંચાઈ પર જવાનું ટાળવામાં આવશે, અને પુલ્લી સિસ્ટમથી સુરક્ષિત રીતે ધજા બદલી શકાશે. એન્જિનિયરો દ્વારા શિખરની મજબૂતી ચકાસીને ટેકનિકલ ફેરફારો કરવામાં આવી રહ્યા છે. આ નવી ટેકનોલોજી આધારિત પહેલ પરંપરા અને આધુનિકતાનો સુંદર સમન્વય છે. આગામી સમયમાં ભક્તો માટે આ સુવિધા ખુલ્લી મુકાતાં ડાકોર યાત્રા વધુ સુલભ અને આધ્યાત્મિક અનુભૂતિથી ભરપૂર બનવાની શક્યતા છે.