ભારતનો પડોશી દેશ શ્રીલંકા હાલમાં ગંભીર કુદરતી આફતનો સામનો કરી રહ્યો છે. વિનાશક ચક્રવાત દિટવાહના કારણે દેશના ઘણા ભાગોમાં ભારે પૂર અને જીવલેણ ભૂસ્ખલન થયું છે. આ ભારે વિનાશને કારણે અત્યાર સુધીમાં ડઝનબંધ લોકોએ જીવ ગુમાવ્યા છે, અને ગુમ થયેલા લોકોની શોધ ચાલુ છે. દેશભરમાં ચિંતાનું વાતાવરણ છે.
ભારે વિનાશ અને જાનહાનિ
ચક્રવાત દિટવાહ ગઈકાલે સવારે પૂર્વ કિનારા પર ત્રાટક્યું હતું, જેના કારણે શ્રીલંકાના ઘણા વિસ્તારોમાં મુશળધાર વરસાદ અને ભારે પવન ફૂંકાયો હતો. નવીનતમ માહિતી અનુસાર, આ દુ:ખદ પૂર અને ભૂસ્ખલમાં 47 લોકોના મોતની પુષ્ટિ થઈ છે. વધુમાં, અધિકારીઓએ અહેવાલ આપ્યો છે કે 21 લોકો હજુ પણ ગુમ છે, અને તેમને શોધવા માટે એક વિશાળ બચાવ કામગીરી ચાલી રહી છે. સેંકડો લોકો ઘાયલ પણ થયા છે.
બચાવ કામગીરી અને સરકારી અપીલ
ચક્રવાતથી થયેલા નુકસાનને ધ્યાનમાં રાખીને, શ્રીલંકાના વહીવટીતંત્રે તાત્કાલિક બચાવ કામગીરી શરૂ કરી છે. લશ્કરી અને આપત્તિ વ્યવસ્થાપન ટીમો અસરગ્રસ્ત વિસ્તારોમાં ફસાયેલા લોકોને બહાર કાઢવા માટે સાથે મળીને કામ કરી રહી છે. દરમિયાન, પર્યટન મંત્રાલયે તાત્કાલિક અપીલ જારી કરીને પ્રવાસીઓને પરિસ્થિતિ સામાન્ય ન થાય ત્યાં સુધી શ્રીલંકાની તેમની યાત્રા યોજનાઓ મુલતવી રાખવા વિનંતી કરી છે, જેથી બચાવ કામગીરીમાં અવરોધ ન આવે અને સલામતી સુનિશ્ચિત થાય.
કેલાની નદી માટે મોટી પૂરની ચેતવણી
ભારે વરસાદ અને વધતા પાણીના સ્તરને કારણે આગામી 48 કલાકમાં નીચાણવાળા વિસ્તારોમાં પૂર આવી શકે છે. ઉચ્ચ જોખમવાળા વિસ્તારોમાં એહેલિયાગોડા, યતીયાંતોટા, રુવાનવેલા, દેહિઓવિતા, સીતાવાકા, ડોમ્પે, પાદુક્કા, હોમગામા, કડુવેલા, બિયાગામા, કોલોનાવા, કેલાનિયા, વટ્ટાલા અને કોલંબોનો સમાવેશ થાય છે.
શ્રીલંકામાં વિનાશ અને ભારત માટે ખતરો
ચક્રવાત દિટવા હાલમાં શ્રીલંકાના ત્રિંકોમાલી નજીક મંડરાઈ રહ્યો છે અને ધીમે ધીમે ઉત્તર-ઉત્તરપશ્ચિમ તરફ આગળ વધી રહ્યો છે. આ વાવાઝોડાએ શ્રીલંકામાં હવામાનને ગંભીર અસર કરી છે, જ્યાં ભારે વરસાદ અને જોરદાર પવન હજુ પણ ચાલુ છે. આ વાવાઝોડું હવે ભારતના પૂર્વી દરિયાકાંઠા તરફ, ખાસ કરીને તમિલનાડુ અને આંધ્રપ્રદેશ તરફ આગળ વધી રહ્યું છે. તેથી, બંને દેશોના લોકોને સતર્ક રહેવાની સલાહ આપવામાં આવી છે.
