'કરો યા મરો'નો જંગ પહેલા ભારત માટે ખુશીના સમાચાર : ટીમ ઈન્ડિયા સાથે ટકરાતા પહેલા કાંગારૂ ટીમને સૌથી મોટો ઝટકો, બહાર થયો આ વિસ્ફોટક ઓપનર

Champions Trophy 2025: ઓસ્ટ્રેલિયા ક્રિકેટ ટીમે ભારત સામેની ચેમ્પિયન્સ ટ્રોફી સેમિફાઇનલ મેચ પહેલા છેલ્લી ઘડીએ પોતાની ટીમમાં ફેરફાર કર્યો છે, જેમાં ઓપનર મેથ્યુ શોર્ટના સ્થાને રિઝર્વ કૂપર કોનોલીને સામેલ કરવામાં આવ્યા છે. શુક્રવારે અફઘાનિસ્તાન સામેની મેચ દરમિયાન શોર્ટને પગની પીઠમાં ઈજા થઈ હતી.

જેક ફ્રેઝર-મેકગર્કને મળી શકે છે તક
શોર્ટને લઈને ઓસ્ટ્રેલિયાના કેપ્ટન સ્ટીવ સ્મિથે બે દિવસ પહેલા કહ્યું હતું કે સેમિફાઇનલ મેચ પહેલા તેમને સ્વસ્થ થવામાં મુશ્કેલી પડશે. શોર્ટની ગેરહાજરીમાં જેક ફ્રેઝર-મેકગર્ક ભારત સામેની પ્લેઇંગ ઇલેવનમાં સ્થાન મેળવે તેવી અપેક્ષા છે. જોકે કોનોલી ટીમમાં જોડાયા બાદ ઓસ્ટ્રેલિયા કેવો અભિગમ અપનાવે છે તે જોવાનું બાકી છે. સ્ટીવ સ્મિથ અને તેના ખેલાડીઓ 4 માર્ચે દુબઈમાં ચેમ્પિયન્સ ટ્રોફીની સેમિફાઇનલમાં ભારત સામે ટકરાશે.

આવી છે કોનોલીની આંતરરાષ્ટ્રીય કરિયર
કોનોલીની વાત કરીએ તો તેણે ઓસ્ટ્રેલિયા માટે અત્યાર સુધીમાં 6 આંતરરાષ્ટ્રીય મેચ રમી છે, જેમાંથી ત્રણ વનડે છે. કોનોલી ડાબોડી બેટ્સમેન છે જે સ્પિન બોલિંગ પણ કરે છે. ભલે આ 21 વર્ષીય ખેલાડીનો બોલ કે બેટથી અત્યાર સુધી કોઈ પ્રભાવશાળી રેકોર્ડ નથી, પરંતુ દુબઈમાં ન્યુઝીલેન્ડ સામે ભારતના સ્પિન આક્રમણની અસર જોઈને કાંગારૂ ટીમે તેના નામ પર વિચાર કર્યો છે.

ભારત સામેની સેમિફાઇનલ મેચ માટે ઓસ્ટ્રેલિયાની ટીમ:
સ્ટીવ સ્મિથ (કેપ્ટન), સીન એબોટ, એલેક્સ કેરી, કૂપર કોનોલી, બેન દ્વારશીસ, નાથન એલિસ, જેક ફ્રેઝર-મેકગર્ક, એરોન હાર્ડી, ટ્રેવિસ હેડ, જોશ ઇંગ્લિસ, સ્પેન્સર જોહ્ન્સન, માર્નસ લાબુશેન, ગ્લેન મેક્સવેલ, તનવીર સંઘા, એડમ ઝામ્પા.