Cristiano Ronaldo will retire after FIFA World Cup 2026 : ફૂટબોલ જગતમાં જ્યારે સર્વકાલીન મહાન ખેલાડીઓની ચર્ચા થાય છે ત્યારે Cristiano Ronaldoનું નામ સૌથી આગળ આવે છે. હાલમાં ચાલી રહેલા 2026 ફિફા વર્લ્ડ કપ દરમિયાન પોર્ટુગલના દિગ્ગજ સ્ટારના ભવિષ્યને લઈને મોટી ચર્ચા શરૂ થઈ છે. રોનાલ્ડોની બહેન કાતિયા એવિરોએ આપેલા નિવેદન બાદ એવી અટકળો તેજ બની છે કે 2026નો વર્લ્ડ કપ તેમના આંતરરાષ્ટ્રીય કરિયરની અંતિમ ટૂર્નામેન્ટ સાબિત થઈ શકે છે. 41 વર્ષીય રોનાલ્ડો હાલમાં પોર્ટુગલની ટીમ સાથે વર્લ્ડ કપ અભિયાનમાં વ્યસ્ત છે. તેમની બહેન કાતિયા એવિરોએ મીડિયા સાથેની વાતચીતમાં કહ્યું કે, ચાહકોએ આ સમયનો ભરપૂર આનંદ માણવો જોઈએ, કારણ કે આ અદભુત સફર હવે અંતિમ તબક્કામાં પહોંચી રહી છે. તેમણે વિશ્વસનીય સૂત્રોના હવાલાથી જણાવ્યું કે આ ટૂર્નામેન્ટ રોનાલ્ડોનો "લાસ્ટ ડાન્સ" બની શકે છે.
નિવૃત્તિ અંગે હજુ અંતિમ નિર્ણય નથી
કાતિયાના નિવેદન બાદ સમગ્ર ફૂટબોલ વિશ્વમાં ચર્ચા શરૂ થઈ હતી, પરંતુ રસપ્રદ વાત એ છે કે રોનાલ્ડોએ પોતે હજુ સુધી સત્તાવાર રીતે નિવૃત્તિ અંગે કોઈ અંતિમ જાહેરાત કરી નથી. મીડિયા અહેવાલો અનુસાર, રોનાલ્ડોએ જણાવ્યું છે કે, તેઓ ઉતાવળમાં કોઈ નિર્ણય લેતા નથી અને વર્લ્ડ કપ અભિયાન પૂર્ણ થયા બાદ પરિવાર સાથે ચર્ચા કરીને ભવિષ્ય અંગે નિર્ણય લેશે. આથી સ્પષ્ટ થાય છે કે, કાતિયા એવિરોના નિવેદનને હજુ સુધી સત્તાવાર પુષ્ટિ માનવી યોગ્ય નહીં ગણાય, પરંતુ પરિવારની નજીકથી આવતી માહિતી હોવાને કારણે આ સંકેતને ગંભીરતાથી લેવામાં આવી રહ્યા છે.
આ પણ ખાસ વાંચો : શું ફરી એકવખત ધોવાઈ જશે ઈન્ડિયા-ઈંગ્લેન્ડની મેચ? : પ્રથમ મેચ બાદ હવે ઓલ્ડ ટ્રેફોર્ડમાં પણ ભારે વરસાદની આગાહી!
2030 વર્લ્ડ કપની ચર્ચા પર ઉઠ્યા પ્રશ્નો
તાજેતરમાં પોર્ટુગલના મુખ્ય કોચ Roberto Martinezએ રોનાલ્ડોની અદભુત ફિટનેસ અને શારીરિક ક્ષમતાની પ્રશંસા કરતાં કહ્યું હતું કે, તેઓ સિદ્ધાંતરૂપે 2030નો વર્લ્ડ કપ પણ રમી શકે છે. જોકે પોર્ટુગલ ફૂટબોલ સંઘના વડા પેડ્રો પ્રોએન્કાએ આ સંભાવનાને અત્યંત મુશ્કેલ ગણાવી હતી. હવે કાતિયા એવિરોના નિવેદન બાદ 2030ના વર્લ્ડ કપમાં રોનાલ્ડોની હાજરી અંગેની અટકળોને મોટો ઝટકો લાગ્યો છે. જો ખરેખર 2026નો વર્લ્ડ કપ તેમનો અંતિમ આંતરરાષ્ટ્રીય મંચ સાબિત થાય છે તો ફૂટબોલના એક ઐતિહાસિક અધ્યાયનો અંત આવશે.
છઠ્ઠા વર્લ્ડ કપમાં પણ સર્જી રહ્યા છે ઇતિહાસ
ક્રિસ્ટિયાનો રોનાલ્ડો માટે આ છઠ્ઠો ફિફા વર્લ્ડ કપ છે, જે પોતાના પ્રકારનો અનોખો રેકોર્ડ છે. 2006માં પ્રથમ વખત વર્લ્ડ કપ રમનાર રોનાલ્ડોએ લગભગ બે દાયકાથી વધુ સમય સુધી વિશ્વ ફૂટબોલ પર પ્રભુત્વ જમાવ્યું છે. ચાલુ ટૂર્નામેન્ટમાં તેમણે વધુ એક ઐતિહાસિક સિદ્ધિ પોતાના નામે નોંધાવી છે. ક્રોએશિયા સામેની મેચમાં પેનલ્ટી દ્વારા ગોલ કરીને તેઓ વર્લ્ડ કપ નોકઆઉટ તબક્કામાં ગોલ કરનાર સૌથી વયસ્ક ખેલાડી બન્યા છે. આ સાથે તેમણે પોતાના કરિયરના પ્રથમ વર્લ્ડ કપ નોકઆઉટ ગોલનો લાંબા સમયથી રહેલો ઇંતજાર પણ પૂર્ણ કર્યો છે. આ પહેલા ઉઝબેકિસ્તાન સામેની મેચમાં બે ગોલ કરીને તેઓ છ અલગ-અલગ વર્લ્ડ કપમાં ગોલ કરનાર પ્રથમ ખેલાડી બન્યા હતા. આ સિદ્ધિએ ફરી એકવાર તેમના અસાધારણ કરિયરની સાક્ષી આપી છે.
આ પણ ખાસ વાંચો : શાહરુખ ખાનના નાઇટ રાઇડર્સ ગ્રુપે રચ્યો ઈતિહાસ : અમેરિકામાં શરૂ કર્યું પોતાનું આંતરરાષ્ટ્રીય ક્રિકેટ સ્ટેડિયમ
ટીકાકારો સામે બહેનનો બચાવ
હાલના સમયમાં રોનાલ્ડોના પ્રદર્શન અને તેમની ગતિશીલતા અંગે કેટલીક ટીકા પણ થઈ રહી છે. જોકે તેમની બહેન કાતિયા હંમેશાની જેમ ભાઈના સમર્થનમાં ખુલ્લેઆમ સામે આવી છે. તેમણે જણાવ્યું કે જે લોકો ફૂટબોલને સાચા અર્થમાં સમજે છે તેઓ રોનાલ્ડોની બે દાયકાથી વધુ લાંબી સિદ્ધિઓને અવગણી શકે નહીં. કાતિયાએ પોતાના પરિવારના સંઘર્ષભર્યા દિવસોની યાદ અપાવતા કહ્યું કે એવેરો પરિવાર જે પરિસ્થિતિમાંથી આગળ વધ્યો છે તે જોતા આજની ટીકા તેમની ખુશી કે ગર્વને અસર કરી શકતી નથી.
શું 2026 વર્લ્ડ કપ બનશે ભાવુક વિદાય?
જો કાતિયા એવિરોનો દાવો સાચો સાબિત થાય છે તો 2026નો ફિફા વર્લ્ડ કપ માત્ર એક વધુ ટૂર્નામેન્ટ નહીં પરંતુ ફૂટબોલના મહાનતમ ખેલાડીઓમાંથી એકની વિદાય યાત્રા બની જશે. રોનાલ્ડો હાલમાં આંતરરાષ્ટ્રીય ફૂટબોલમાં સૌથી વધુ ગોલ કરનાર અને સૌથી વધુ મેચ રમનાર ખેલાડી તરીકે ઇતિહાસ રચી ચૂક્યા છે. તેમના નામે અસંખ્ય રેકોર્ડ્સ નોંધાયેલા છે અને તેમની વારસો આવનારી પેઢીઓ માટે પ્રેરણાસ્ત્રોત બની રહેશે. હાલ માટે ફૂટબોલપ્રેમીઓની નજર પોર્ટુગલના આગામી મુકાબલાઓ પર ટકેલી છે. ચાહકો આશા રાખી રહ્યા છે કે જો આ ખરેખર રોનાલ્ડોનો છેલ્લો વર્લ્ડ કપ હોય તો તેઓ તેને યાદગાર બનાવી દેશે અને કદાચ પોતાની કારકિર્દીનું સૌથી મોટું સ્વપ્ન - વર્લ્ડ કપ ટ્રોફી - સાથે વિદાય લેશે.
