લોસ એન્જલસ: ક્રિકેટના વૈશ્વિક વિસ્તરણ તરફ વધુ એક ઐતિહાસિક પગલું ભરતાં, ભારતના શાહરૂખ ખાનની સહ-માલિકી ધરાવતા 'નાઇટ રાઇડર્સ ગ્રુપે' અમેરિકાના કેલિફોર્નિયા સ્થિત પોમોના શહેરમાં પોતાનું નવું આંતરરાષ્ટ્રીય ક્રિકેટ સ્ટેડિયમ શરૂ કર્યું છે. આ સાથે નાઇટ રાઇડર્સ ગ્રુપ વિશ્વની પ્રથમ વૈશ્વિક ક્રિકેટ ફ્રેન્ચાઇઝી બની છે, જેણે પોતાનું આંતરરાષ્ટ્રીય ક્રિકેટ સ્ટેડિયમ વિકસાવ્યું છે.
'નાઇટ રાઇડર્સ ક્રિકેટ ગ્રાઉન્ડ, LA' ખાતે મેજર લીગ ક્રિકેટ (MLC)ની પ્રથમ મેચનું આયોજન કરવામાં આવ્યું હતું, જેમાં લોસ એન્જલસ નાઇટ રાઇડર્સ અને વોશિંગ્ટન ફ્રીડમ વચ્ચે મુકાબલો રમાયો હતો. આ સ્ટેડિયમ માત્ર એક મેચનું સ્થળ નથી, પરંતુ અમેરિકામાં ક્રિકેટના લાંબા ગાળાના વિકાસ માટે મહત્વપૂર્ણ ઈન્ફ્રાસ્ટ્રક્ચર તરીકે જોવામાં આવી રહ્યું છે.
વિશ્વસ્તરીય સુવિધાઓથી સજ્જ સ્ટેડિયમ
આ સ્ટેડિયમ આંતરરાષ્ટ્રીય ધોરણોને ધ્યાનમાં રાખીને તૈયાર કરવામાં આવ્યું છે. તેમાં મુખ્ય સ્ક્વેર પર આઠ પિચ, ICCના ધોરણ મુજબનું મેદાન, 120 ફૂટ ઊંચા છ ફ્લડલાઇટ ટાવર અને આધુનિક ખેલાડી તથા દર્શક સુવિધાઓ ઉપલબ્ધ કરાવવામાં આવી છે. સ્ટેડિયમના નિર્માણ દરમિયાન 32 હજાર મેટ્રિક ટનથી વધુ માટીનું સ્થળાંતર કરવામાં આવ્યું હતું.
શાહરુખ ખાને આ અવસરને "સપનું સાકાર થયું" ગણાવતાં જણાવ્યું કે લોસ એન્જલસમાં ક્રિકેટ માટે કાયમી ઘર બનાવવું માત્ર રમત માટે નહીં પરંતુ સમુદાય, પરિવાર અને મનોરંજનને જોડતું કેન્દ્ર ઊભું કરવાનો પ્રયાસ છે.
LA 2028 ઓલિમ્પિક્સ માટે પણ મહત્વપૂર્ણ
ક્રિકેટ 2028ના લોસ એન્જલસ ઓલિમ્પિક્સમાં ફરી સામેલ થવાનું છે. આવી સ્થિતિમાં અમેરિકામાં આધુનિક ક્રિકેટ સ્ટેડિયમનું નિર્માણ રમતના વિકાસ માટે મહત્વપૂર્ણ માનવામાં આવી રહ્યું છે. આ મેદાન મેજર લીગ ક્રિકેટ ઉપરાંત ભવિષ્યમાં આંતરરાષ્ટ્રીય ક્રિકેટ માટે પણ મહત્વની ભૂમિકા ભજવી શકે છે.
નાઇટ રાઇડર્સ ગ્રુપ હાલમાં ઇન્ડિયન પ્રીમિયર લીગમાં કોલકાતા નાઇટ રાઇડર્સ (KKR), કેરેબિયન પ્રીમિયર લીગમાં ટ્રિનબેગો નાઇટ રાઇડર્સ, ILT20માં અબુ ધાબી નાઇટ રાઇડર્સ અને મેજર લીગ ક્રિકેટમાં લોસ એન્જલસ નાઇટ રાઇડર્સ જેવી ટીમોનું સંચાલન કરે છે. નવા સ્ટેડિયમ સાથે ગ્રુપે પોતાની વૈશ્વિક હાજરીને વધુ મજબૂત બનાવી છે.
