Ahmedabad Daily Stay in Hotel Case : અમદાવાદના એરપોર્ટ વિસ્તારમાં આવેલી એક હોટલમાં યુવક અને યુવતીએ આપઘાતનો પ્રયાસ કર્યો હોવાની ચકચારજનક ઘટના સામે આવી છે. એરપોર્ટ વિસ્તારમાં આવેલી “ડેઇલી સ્ટે ઇન” નામની હોટલમાં ગઈકાલે રાત્રે એક યુવક અને યુવતી રોકાવા આવ્યા હતા. બંનેએ રાત્રે અંદાજે 9 વાગ્યે હોટલમાં ચેક-ઇન કર્યું હતું.
યુવકનો લોહી લુહાણ હાલતમાં મૃતદેહ મળ્યો
આજે બપોરે લગભગ દોઢ વાગ્યે હોટલ સ્ટાફ રૂમમાં પહોંચ્યો ત્યારે યુવક લોહી લુહાણ મૃત હાલતમાં મળ્યો હતો, જ્યારે યુવતી બેભાન હાલતમાં હતી. આ ઘટનાથી હોટલમાં અફરાતફરી મચી ગઈ હતી. હોટલ સ્ટાફ દ્વારા તરત જ 112 પર કોલ કરવામાં આવ્યો હતો. ગંભીર રીતે ઈજાગ્રસ્ત યુવતીને સારવાર માટે અસારવા સિવિલ હોસ્પિટલમાં ખસેડવામાં આવી છે.
યુવકનું નામ રામ ભરવાડ
મૃતક યુવકનું નામ રામ ભરવાડ હોવાનું જાણવા મળ્યું છે. તે અમદાવાદના કડવાસણ વિસ્તારમાં આવેલા ભારવડવાસનો રહેવાસી હતો. યુવક સાથે આવેલી યુવતી કૃષ્ણધામ બુટભવાની, વેજલપુર વિસ્તારમાં રહેતી હોવાનું સામે આવ્યું છે. બંનેએ આપઘાતનો પ્રયાસ કર્યો હોવાનું પ્રાથમિક તપાસમાં સામે આવ્યું છે, જેમાં ગંભીર ઈજાઓના કારણે યુવકનું મોત થયું છે.
પોલીસે તપાસ હાથધરી
ઘટનાની જાણ થતાં એરપોર્ટ પોલીસ તાત્કાલિક “ડેઇલી સ્ટે ઇન” હોટલમાં પહોંચી હતી અને ઘટના સ્થળે તપાસ હાથ ધરી હતી. પોલીસે હોટલ સ્ટાફ અને અન્ય વિગતોના આધારે વધુ તપાસ શરૂ કરી છે. સમગ્ર ઘટનાને લઈને એરપોર્ટ વિસ્તારમાં ચર્ચાનો માહોલ સર્જાયો છે.
