કેન્દ્રીય ગૃહ મંત્રાલયે સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF) ની અધિકૃત સંખ્યામાં વધારો કર્યો છે. હવે CISF માં 2 લાખની જગ્યાએ 2.20 લાખ સૈનિકો હોઈ શકશે. સરકારે આ નિર્ણય સાથે ન માત્ર દળને મજબૂત બનાવવાનો માર્ગ ખોલ્યો છે, પરંતુ દેશના યુવાનો માટે રોજગારીના નવા અવસર પણ ઊભા કર્યા છે.
વધારાની સંખ્યાથી દળ મજબૂત થશે
CISFના CPRO DIG અજય દહિયાએ માહિતી આપી હતી કે વર્ષ 2024માં 13,230 સૈનિકોની ભરતી કરવામાં આવી હતી. હાલમાં 24,098 જગ્યાઓ માટે ભરતી પ્રક્રિયા ચાલી રહી છે.
દર વર્ષે 14,000 નવી ભરતી થશે
CISFએ જણાવ્યું છે કે આગામી પાંચ વર્ષ સુધી દર વર્ષે આશરે 14,000 સૈનિકોની ભરતી થશે. તેમાં મહિલાઓનો પણ નોંધપાત્ર સમાવેશ કરાશે. નવી બટાલિયનની રચનાથી દળ વધુ વિસ્તૃત અને કાર્યક્ષમ બનશે.
વિશિષ્ટ સ્થળોએ CISFની તૈનાતી
હાલમાં CISF દેશભરના 359 મહત્વપૂર્ણ સ્થાનો પર સુરક્ષા ફરજ બજાવી રહી છે. તેમાં ન્યૂક્લિયર પાવર પ્લાન્ટ, અવકાશ સંસ્થાઓ, એરપોર્ટ, બંદરો, મેટ્રો, સરકારી ઇમારતો, ઐતિહાસિક સ્મારકો અને જમ્મુ-કાશ્મીરના જેલોનો સમાવેશ થાય છે. CISF સંસદ ભવન અને અયોધ્યા એરપોર્ટ જેવી અતિસંવેદનશીલ જગ્યાઓ પર પણ તૈનાત છે.
માઓવાદ વિરોધી ઝુંબેશમાં CISFની ભૂમિકા
છત્તીસગઢમાં માઓવાદી પ્રવૃત્તિઓનો અંત લાવવા માટે સરકાર દ્વારા માર્ચ 2026 સુધીનો લક્ષ્યાંક નક્કી કરવામાં આવ્યો છે. આવી પરિસ્થિતિમાં CISF ની મજબૂત હાજરી ખૂબ જ જરૂરી છે.
