મહેસાણા જિલ્લાના બહુચરાજી વિસ્તારમાં સ્પાની આડમાં ચાલતા કુટણખાનાનો પોલીસે પર્દાફાશ કર્યો છે. બહુચરાજીમાં આવેલા શક્તિ લેન્ડમાર્ક કોમ્પ્લેક્સમાં કાર્યરત ‘ધ બેલા સ્પા’ પર પોલીસ દ્વારા અચાનક દરોડો પાડવામાં આવ્યો હતો. તપાસ દરમિયાન ખુલ્યું કે, સ્પામાં મસાજની સેવા આપવાના બહાને હાઈપ્રોફાઈલ સેક્સ રેકેટ ચલાવવામાં આવી રહ્યું હતું.
ગ્રાહક પાસેથી દેહવ્યાપાર માટે રૂ.1 હજારની રકમ વસૂલવામાં આવતી
સ્પાના સંચાલક રાજુ ચૌધરી દ્વારા પરપ્રાંતિય યુવતીઓને અહીં રાખી દેહવ્યાપાર કરાવવામાં આવતો હોવાની માહિતી સામે આવી છે. પોલીસ તપાસ મુજબ સ્પામાં આવતા દરેક ગ્રાહક પાસેથી દેહવ્યાપાર માટે રૂ. 1000ની રકમ વસૂલવામાં આવતી હતી. સ્પાની આડમાં ગેરકાયદેસર પ્રવૃત્તિઓ લાંબા સમયથી ચાલી રહી હતી.
પોલીસે સંચાલકની કરી ધરપકડ
દરોડા દરમિયાન પોલીસે સંચાલક રાજુ ચૌધરીની ધરપકડ કરી હતી તેમજ અન્ય કાયદેસરની કાર્યવાહી હાથ ધરવામાં આવી છે. આ સમગ્ર પર્દાફાશ બહુચરાજીના પી.આઈ. પી.એલ. વાઘેલાની ટીમ દ્વારા કરવામાં આવ્યો છે. પોલીસ આ મામલે વધુ તપાસ કરી રહી છે અને આ રેકેટ સાથે જોડાયેલા અન્ય લોકોની ભૂમિકા અંગે પણ તપાસ શરૂ કરવામાં આવી છે.
