20 Wickets in a Day: મેલબોર્ન ક્રિકેટ ગ્રાઉન્ડ (MCG) ખાતે રમાયેલી એશિઝ સીરિઝની ચોથી ટેસ્ટ મેચના પ્રથમ દિવસે ક્રિકેટના ચાહકોને અદ્ભુત નજારો જોવા મળ્યો. ઝડપી અને ઉછાળવાળી પિચ પર બોલરોએ પૂર્ણ પ્રભુત્વ જમાવ્યું હતું, જેના કારણે એક જ દિવસમાં કુલ 20 વિકેટ પડી. આ ઘટના એશિઝ ટેસ્ટના પ્રથમ દિવસે 124 વર્ષ પછી બની છે, જ્યારે અગાઉ 1901-02માં અહીં જ 25 વિકેટ પડી હતી. ઓસ્ટ્રેલિયા અને ઇંગ્લેન્ડ બંને ટીમોની પ્રથમ ઇનિંગ્સ ઓછા સ્કોરમાં સમેટાઈ ગઈ, અને દિવસના અંતે ઓસ્ટ્રેલિયાએ બીજી ઇનિંગ્સમાં વિના વિકેટે 4 રન બનાવીને 46 રનની લીડ મેળવી લીધી.
મેચની શરૂઆત અને ઓસ્ટ્રેલિયાની પ્રથમ ઇનિંગ્સ
ઇંગ્લેન્ડના કેપ્ટન બેન સ્ટોક્સે ટોસ જીતીને પ્રથમ બોલિંગ પસંદ કરી હતી. પિચ પર 10 મીમી જેટલું ઘાસ હોવાથી બોલરોને મદદ મળી. ઇંગ્લિશ ફાસ્ટ બોલર જોશ ટોંગે શાનદાર પ્રદર્શન કરતાં 5 વિકેટ ઝડપીને ઓસ્ટ્રેલિયાને માત્ર 152 રનમાં ઓલઆઉટ કરી દીધું. ઓસ્ટ્રેલિયા તરફથી માઈકલ નેસરે 35 રનની ઇનિંગ્સ રમીને સૌથી વધુ રન બનાવ્યા, જ્યારે ઉસ્માન ખ્વાજાએ 29 રનનો ફાળો આપ્યો. અન્ય કોઈ બેટ્સમેન ટકી શક્યો નહીં, અને ટીમ ટી બ્રેક પહેલાં જ ઓલઆઉટ થઈ ગઈ.
ઇંગ્લેન્ડની પ્રથમ ઇનિંગ્સ માત્ર 110 રન
જવાબી ઇનિંગ્સમાં ઇંગ્લેન્ડની શરૂઆત પણ ખરાબ રહી. મિચેલ સ્ટાર્ક અને માઈકલ નેસરે વહેલી વિકેટો ઝડપીને દબાણ બનાવ્યું. હેરી બ્રુકે આક્રમક 41 રન બનાવ્યા, પરંતુ તે પછી ટીમનું મિડલ ઓર્ડર ધરાશાયી થયું. ગુસ એટકિન્સને 28 અને કેપ્ટન બેન સ્ટોક્સે 16 રન બનાવ્યા, પરંતુ ટીમ માત્ર 110 રનમાં ઓલઆઉટ થઈ ગઈ. ઓસ્ટ્રેલિયા તરફથી માઈકલ નેસરે 4 વિકેટ અને સ્કોટ બોલેન્ડે 3 વિકેટ લીધી. આમ, ઓસ્ટ્રેલિયાને 42 રનની લીડ મળી.
બીજી ઇનિંગ્સ અને દિવસનો અંત
દિવસના અંતે એક જ ઓવર બાકી હતી, જેમાં ઓસ્ટ્રેલિયાએ નાઈટવોચમેન તરીકે સ્કોટ બોલેન્ડને મોકલ્યો. તેણે છેલ્લી બોલ પર ચોગ્ગો મારીને 4 રન બનાવ્યા અને ટ્રેવિસ હેડ સાથે વિના વિકેટે 4 રન કરીને દિવસ પૂરો કર્યો. આમ, ઓસ્ટ્રેલિયાની કુલ લીડ 46 રન થઈ.
MCG ગ્રાઉંડ પર ઐતિહાસિક રેકોર્ડ
પ્રથમ દિવસે 20 વિકેટ પડવી એ MCG પર ટેસ્ટ મેચના એક દિવસમાં ચોથી વખત બની છે. અહીં એક દિવસમાં સૌથી વધુ વિકેટનો રેકોર્ડ:
25 - ઓસ્ટ્રેલિયા વિ. ઇંગ્લેન્ડ, 1901-02 (પહેલો દિવસ)
20 - ઓસ્ટ્રેલિયા વિ. દક્ષિણ આફ્રિકા, 1931-32 (દિવસ 1)
20 - ઓસ્ટ્રેલિયા વિ. ઇંગ્લેન્ડ, 1894-95 (પહેલો દિવસ)
20 - ઓસ્ટ્રેલિયા વિ. ઇંગ્લેન્ડ, 2025-26 (દિવસ 1)
આ ઉપરાંત, એશિઝમાં પ્રથમ દિવસે 20 વિકેટ પડવી 1950 પછી પ્રથમ વખત બની છે. બંને ટીમોની બેટિંગ નિષ્ફળતા અને પિચની મદદથી બોલરોનો દિવસ રહ્યો. સીરિઝમાં ઓસ્ટ્રેલિયા
3-0થી આગળ છે અને એશિઝ જાળવી રાખી છે. આ મેચમાં વધુ રોમાંચક ક્રિકેટની અપેક્ષા છે.
