BMW F 450 GS vs KTM 390 Adventure S : કઈ એડવેન્ચર બાઇક છે તમારા માટે બેસ્ટ ચોઇસ?

BMW F 450 GS vs KTM 390 Adventure : ભારતીય બજારમાં એડવેન્ચર ટુરર બાઇક્સનો ક્રેઝ ઝડપથી વધી રહ્યો છે. ખાસ કરીને યુવા પેઢી હવે એવી બાઇક્સ પસંદ કરી રહી છે, જે સિટી રાઇડની સાથે સાથે પહાડો અને કાચા રસ્તાઓ પર પણ શાનદાર પરફોર્મન્સ આપે. આ હરીફાઈમાં જર્મન કંપની BMW એ તેની નવી F 450 GS સાથે એન્ટ્રી કરી છે, જે સીધી રીતે ઑસ્ટ્રિયન કંપની KTM ની લોકપ્રિય બાઇક 390 Adventure S સામે ઊભી છે. આ બંને બાઇક્સ પોતાની રીતે ખાસ છે, પરંતુ જો તમે કન્ફ્યુઝ છો કે કઈ બાઇક લેવી, તો આ વિગતવાર સરખામણી તમને મદદરૂપ થશે.

એન્જિન અને પરફોર્મન્સની સરખામણી

એન્જિનની વાત કરીએ તો BMW F 450 GS માં 420cc નું લિક્વિડ-કૂલ્ડ, પેરેલલ-ટ્વીન (બે સિલિન્ડર) એન્જિન મળે છે. આ એન્જિન 8,750rpm પર 48hp નો પાવર અને 6,750rpm પર 43Nm નો ટોર્ક આપે છે. ટ્વીન-સિલિન્ડર હોવાને કારણે હાઇ સ્પીડ પર બાઇકમાં વાઇબ્રેશન ઓછા આવે છે અને તે લાંબા અંતરની મુસાફરીમાં ઘણી સ્મૂથ રહે છે. બીજી તરફ, KTM 390 Adventure S માં 398cc નું સિંગલ-સિલિન્ડર એન્જિન છે જે 46hp પાવર અને 39Nm ટોર્ક જનરેટ કરે છે. જોકે KTM નું એન્જિન ઘણું પંચી છે, પરંતુ રિફાઇનમેન્ટ અને ટોપ-એન્ડ પરફોર્મન્સમાં BMW થોડી આગળ નીકળી જાય છે.

બાઇકનું વજન અને હેન્ડલિંગ

એડવેન્ચર બાઇક માટે તેનું વજન ખૂબ જ મહત્વનું પાસું છે. BMW F 450 GS નું વજન માત્ર 178 કિલોગ્રામ છે, જે તેના હળવા ચેસિસને કારણે શક્ય બન્યું છે. તેની સરખામણીમાં KTM 390 Adventure S નું વજન 182 કિલોગ્રામ છે. જોકે આ 4 કિલોનો તફાવત બહુ મોટો લાગતો નથી, પરંતુ જ્યારે તમે કીચડવાળા રસ્તા કે પહાડી વળાંકો પર બાઇક ચલાવો છો, ત્યારે BMW ની હળવાશ તેને હેન્ડલ કરવામાં વધુ સરળ બનાવે છે. ઓછા વજનને કારણે આ બાઇક નવા રાઇડર્સ માટે પણ અનુકૂળ રહે છે.

નવીનતમ E Clutch ટેકનોલોજી

BMW એ આ વખતે એક ક્રાંતિકારી ફીચર આપ્યું છે જેને 'E Clutch' કહેવામાં આવે છે. આ એક ઓટોમેટિક સેન્ટ્રીફ્યુગલ ક્લચ છે. તેનો સૌથી મોટો ફાયદો એ છે કે, રાઇડરે બાઇક શરૂ કરતી વખતે કે ઉભી રાખતી વખતે વારંવાર ક્લચ લીવર દબાવવાની જરૂર પડતી નથી. ટ્રાફિકમાં જ્યારે વારંવાર ઉભું રહેવું પડે, ત્યારે આ ટેકનોલોજી રાઇડરનો થાક ઓછો કરે છે. KTM માં ક્વિક-શિફ્ટર જરૂર મળે છે, પરંતુ BMW નો આ ક્લચ ઓપ્શન તેને આધુનિકતામાં એક ડગલું આગળ લઈ જાય છે.

ઓફ-રોડ ક્ષમતા અને વ્હીલ્સ

જો તમારી પ્રાથમિકતા ફક્ત કાચા રસ્તા અને પથરાળ વિસ્તારોમાં બાઇક ચલાવવાની હોય, તો KTM અહીં બાજી મારી જાય છે. KTM 390 Adventure S માં આગળ 21-ઇંચ અને પાછળ 17-ઇંચના ટ્યુબલેસ સ્પોક વ્હીલ્સ આપવામાં આવ્યા છે. મોટા ટાયર ખાડાઓ અને મોટા પથ્થરો પર સરળતાથી ચાલે છે. તેની સામે BMW માં આગળ 19-ઇંચ અને પાછળ 17-ઇંચના એલ્યુમિનિયમ કાસ્ટ વ્હીલ્સ છે, જે હાઇવે અને સામાન્ય ઓફ-રોડિંગ માટે સારા છે, પણ એક્સ્ટ્રીમ પર્વતારોહણ માટે KTM વધુ સક્ષમ સાબિત થાય છે.

કિંમત અને મૂલ્ય

કિંમતની વાત આવે ત્યારે KTM હંમેશા તેના ગ્રાહકોને ખુશ કરે છે. ભારતમાં KTM 390 Adventure S ની એક્સ-શોરૂમ કિંમત આશરે રૂ. 3.96 લાખ છે. તેની સામે BMW F 450 GS ની શરૂઆતની કિંમત રૂ. 4.70 લાખ છે અને તેના ટોપ વેરિઅન્ટ (ટ્રોફી) ની કિંમત રૂ. 5.30 લાખ સુધી જાય છે. એટલે કે, BMW માટે તમારે લગભગ 75,000 થી 1.30 લાખ રૂપિયા વધુ ખર્ચવા પડશે. જો તમે બ્રાન્ડ વેલ્યુ અને ટ્વીન-સિલિન્ડર એન્જિન ઈચ્છો છો તો BMW બેસ્ટ છે, પણ જો તમે ઓછા ખર્ચે દમદાર બાઇક ઈચ્છો છો તો KTM ઉત્તમ ઓપ્શન છે.