મહારાષ્ટ્રની આર્થિક રાજધાની મુંબઈમાં BMC સહિત રાજ્યની 29 મહાનગરપાલિકાઓ માટે ગુરુવારે 15 જાન્યુઆરીના રોજ મતદાન પ્રક્રિયા સંપન્ન થઈ છે. વોટિંગ પૂર્ણ થતાની સાથે જ વિવિધ એજન્સીઓના એક્ઝિટ પોલના આંકડા સામે આવ્યા છે જે રાજકીય સમીકરણોમાં મોટા ફેરફાર તરફ ઈશારો કરે છે. મોટાભાગના સર્વેક્ષણોમાં BJPની આગેવાની ધરાવતા ગઠબંધનને સ્પષ્ટ બહુમતી મળવાનું અનુમાન વ્યક્ત કરવામાં આવ્યું છે. વર્ષો પછી એકસાથે આવેલા ઠાકરે બંધુઓ એટલે કે ઉદ્ધવ ઠાકરે અને રાજ ઠાકરેની રણનીતિ મતદારોને રીઝવવામાં નિષ્ફળ રહી હોય તેમ જણાય છે. આ ચૂંટણીના સત્તાવાર અને આખરી પરિણામો શુક્રવારે 16 જાન્યુઆરીના રોજ જાહેર કરવામાં આવશે.
સત્તાના સિંહાસન માટે 114નો આંકડો અનિવાર્ય
Brihanmumbai Municipal Corporation એટલે કે BMCના કુલ 227 વોર્ડમાં સત્તા સ્થાપવા માટે કોઈપણ પક્ષ કે ગઠબંધને 114 બેઠકો મેળવવી જરૂરી છે. છેલ્લા અઢી દાયકાથી BMC પર શિવસેનાનું એકચક્રી શાસન રહ્યું છે ત્યારે આ વખતના એક્ઝિટ પોલના આંકડા શિવસેના (UBT) માટે ચિંતાજનક સાબિત થઈ શકે છે. આવતીકાલે સવારે 10 વાગ્યાથી મતગણતરી શરૂ થયા બાદ જ ખરો ચિત્ર સ્પષ્ટ થશે.
ગઠબંધનનું ગણિત અને વિપક્ષી વિભાજન
આ ચૂંટણીમાં મરાઠી મતોને અંકે કરવા માટે ઉદ્ધવ ઠાકરેની Shiv Sena (UBT) અને રાજ ઠાકરેની MNS એ હાથ મિલાવ્યા હતા. જોકે એક્ઝિટ પોલના આંકડા દર્શાવે છે કે આ એકતાનો ખાસ લાભ તેમને મળી રહ્યો નથી. બીજી તરફ વિપક્ષી છાવણીમાં પણ વિભાજન જોવા મળ્યું હતું કારણ કે કોંગ્રેસે MVA ગઠબંધનથી અલગ થઈને પ્રકાશ આંબેડકરની વંચિત બહુજન આઘાડી સાથે ચૂંટણી જંગમાં ઝંપલાવ્યું હતું. આ મતોનું વિભાજન સીધી રીતે BJP અને શિંદે જૂથની મહાયુતિને ફાયદો કરાવી રહ્યું હોય તેવું દેખાય છે.
વિવિધ એજન્સીઓના એક્ઝિટ પોલના તારણો
વિવિધ એક્ઝિટ પોલ મુજબ બેઠકોની સંભવિત સ્થિતિ નીચે મુજબ છે:
Janmat Polls: આ સર્વે મુજબ BJP અને શિવસેના ગઠબંધનને 138 બેઠકો સાથે સ્પષ્ટ બહુમતી મળી શકે છે જ્યારે ઠાકરે ગઠબંધનને માત્ર 62 બેઠકોથી સંતોષ માનવો પડી શકે છે. કોંગ્રેસના ફાળે 20 બેઠકો જવાની સંભાવના છે.
JVC Exit Poll: અહીં પણ મહાયુતિને 138 બેઠકો મળવાનો અંદાજ છે. ઉદ્ધવ ઠાકરેની આગેવાની વાળા જૂથને 59 અને કોંગ્રેસ ગઠબંધનને 23 બેઠકો મળી શકે છે.
Axis My India: આ એજન્સીના મતે BJP પ્લસને 131 થી 151 જેટલી તોતિંગ બેઠકો મળી શકે છે જ્યારે UBT પ્લસ 58 થી 68 બેઠકો વચ્ચે અટકી શકે છે.
DV Research: આ સર્વેમાં મહાયુતિને 107 થી 122 બેઠકો અને ઠાકરે બંધુઓના ગઠબંધનને 68 થી 83 બેઠકો મળવાનું અનુમાન છે.
વોટ શેરનું વિશ્લેષણ
JVC એક્ઝિટ પોલના ડેટા પ્રમાણે વોટ શેરની ટકાવારી કંઈક આ પ્રકારે રહી શકે છે:
મહાયુતિ ગઠબંધન: 42% થી 45%
Shiv Sena (UBT) + MNS + NCP (SP): 34% થી 37%
કોંગ્રેસ અને VBA ગઠબંધન: 13% થી 15%
અન્ય પક્ષો અને અપક્ષ: 6% થી 8%
આ આંકડાકીય માયાવી જાળ વચ્ચે મુંબઈના નગરપતિ કોણ બનશે અને એશિયાની સૌથી મોટી મહાનગરપાલિકા પર કોનો ભગવો લહેરાશે તે શુક્રવારની સાંજ સુધીમાં સ્પષ્ટ થઈ જશે.
