વર્તમાન સમયમાં પરિવહન માટે ઇલેક્ટ્રિક વાહનોનો ક્રેઝ ઝડપથી વધી રહ્યો છે ત્યારે ગ્રાહકો હંમેશા એવા વિકલ્પો શોધતા હોય છે જે બજેટમાં હોય અને લાંબી મુસાફરી કરાવી શકે. આ બાબતને ધ્યાનમાં રાખીને ચીની ઓટોમોબાઈલ કંપની Bestune દ્વારા Xiaoma નામની એક કોમ્પેક્ટ ઇલેક્ટ્રિક કાર રજૂ કરવામાં આવી છે. આ નાની કાર તેની અદભૂત ક્ષમતાને કારણે લાંબા સમયથી ભારતીય બજારમાં પણ ચર્ચાનો વિષય બની છે.
Bestune Xiaoma કારની સૌથી આકર્ષક બાબત તેની કિંમત અને ચાલવાની ક્ષમતા છે. વિવિધ અહેવાલો મુજબ આ કાર એક વખત સંપૂર્ણ ચાર્જ થયા પછી આશરે 1200 કિલોમીટરનું અંતર કાપી શકે છે જે અન્ય સામાન્ય ઇલેક્ટ્રિક ગાડીઓની સરખામણીએ ઘણી વધારે છે. તેની કિંમતની વાત કરીએ તો ચીનમાં આ કારની શરૂઆત 3.47 લાખ રૂપિયાથી થાય છે અને તેના ટોપ મોડલની કિંમત 5.78 લાખ રૂપિયા સુધી જાય છે. આ કારણોસર તે મધ્યમ વર્ગના લોકો માટે ખૂબ જ કિફાયતી વિકલ્પ સાબિત થઈ શકે છે.
ફીચર્સ અને ટેકનોલોજીની દ્રષ્ટિએ આ કાર નાની હોવા છતાં સ્માર્ટ સુવિધાઓથી સજ્જ છે. તેમાં 7 inchની ટચસ્ક્રીન ઇન્ફોટેનમેન્ટ સિસ્ટમ અને ડ્યુઅલ ટોન ડેશબોર્ડ આપવામાં આવ્યું છે. કારના વ્હીલ્સને એરોડાયનામિક ડિઝાઇન આપવામાં આવી છે જેથી હવાનું ઘર્ષણ ઓછું થાય અને તે વધુ રેન્જ આપી શકે. આ વાહન ખાસ FME પ્લેટફોર્મ પર તૈયાર કરવામાં આવ્યું છે જેને ઇલેક્ટ્રિક અને રેન્જ એક્સટેન્ડર વાહનો માટે વિકસાવવામાં આવ્યું છે.
પાવર અને પરફોર્મન્સ માટે આ કારમાં 20kWની ઇલેક્ટ્રિક મોટર લગાડવામાં આવી છે જે રિયર વ્હીલ ડ્રાઇવ સિસ્ટમ પર કામ કરે છે. સુરક્ષા અને ટકાઉપણું વધારવા માટે તેમાં LFP એટલે કે લિથિયમ આયર્ન ફોસ્ફેટ બેટરીનો પ્રયોગ થયો છે. ડ્રાઇવરની સુરક્ષા માટે એરબેગની સુવિધા પણ ઉપલબ્ધ છે. 3 ડોર ડિઝાઇન ધરાવતી આ કાર કદમાં નાની હોવાથી શહેરના ટ્રાફિકમાં ચલાવવા માટે અત્યંત સરળ છે.
ભારતમાં આ કારના લોન્ચિંગ અંગે હજુ સુધી કોઈ સત્તાવાર માહિતી પ્રાપ્ત થઈ નથી પરંતુ ભવિષ્યમાં તે ભારતીય રસ્તાઓ પર જોવા મળી શકે તેવી શક્યતાઓ છે. જો આ કાર ભારતમાં આવે તો તેનો સીધો મુકાબલો Tata Tiago EV અને MG Comet EV જેવી લોકપ્રિય ગાડીઓ સાથે થશે. ઓછી કિંમત અને વધુ માઇલેજ તેને ગ્રાહકો માટે પ્રથમ પસંદગી બનાવી શકે છે.
