કારની માઇલેજ વધારવાની બેસ્ટ ટિપ્સ! : સ્માર્ટ ડ્રાઇવિંગ સાથે કરો પેટ્રોલ-ડીઝલની મોટી બચત!

Best tips to increase car mileage : પેટ્રોલ અને ડીઝલના ભાવમાં વધારો થવાને કારણે, દરેક કાર માલિક ઓછા ફ્યુલનો ઉપયોગ કરીને શક્ય તેટલું વધુ અંતર કાપવાનો પ્રયાસ કરે છે. લોકો ઘણીવાર માને છે કે, ધીમે ધીમે વાહન ચલાવવાથી વધુ સારી માઇલેજ મળે છે, જ્યારે અન્ય લોકો માને છે કે, વધુ ઝડપે વાહન ચલાવવાથી વધુ માઇલેજ મળે છે. જોકે, વાસ્તવિકતા અલગ છે. જો તમે પણ તમારી કારમાંથી ઉત્તમ માઇલેજ મેળવવા ઈચ્છો છો, તો આ લેખ તમારા માટે ઉપયોગી સાબિત થશે. જાણો સારી માઇલેજ માટે તમારે તમારી કાર કઈ સ્પીડએ ચલાવવી જોઈએ.

આ સ્પીડએ વાહન ચલાવવું યોગ્ય?

સામાન્ય રીતે, કારને સારી માઇલેજ મેળવવા માટે 70 થી 90 કિલોમીટર પ્રતિ કલાક (kmph) ની ગતિ શ્રેષ્ઠ માનવામાં આવે છે. જો તમે હાઇવે પર વાહન ચલાવી રહ્યા છો, તો ટોપ ગિયર (5 મા) માં 70-80 કિમી પ્રતિ કલાકની ગતિ શ્રેષ્ઠ માનવામાં આવે છે. આનાથી એન્જિન પર ઓછો ભાર પડે છે અને એન્જિન વધુ સારી રીતે કાર્ય કરે છે. આનાથી કારને તેની મહત્તમ માઇલેજ મળે છે. જોકે, જ્યારે તમે શહેરમાં વાહન ચલાવી રહ્યા હોવ ત્યારે ટ્રાફિકને કારણે 90 કિમી પ્રતિ કલાકની ગતિ શક્ય નથી. શહેરમાં તમારે 40 થી 50 કિમી પ્રતિ કલાકની ગતિ જાળવી રાખવાનો પ્રયાસ કરવો જોઈએ અને વારંવાર બ્રેક લગાવવાનું કે એક્સિલરેટરને અચાનક દબાવવાનું ટાળવું જોઈએ.

ખરાબ માઇલેજના મુખ્ય કારણો છે:

વધુ પડતી સ્પીડ - ખૂબ જ હાઇ-સ્પીડએ (જેમ કે 100 કિમી પ્રતિ કલાક) વાહન ચલાવવાથી એન્જિન પર ભાર વધે છે. એન્જિનને વધુ પાવરનો ઉપયોગ કરવો પડે છે, જેના કારણે માઇલેજમાં ઘટાડો થઈ શકે છે. વધુમાં, હાઇ-સ્પીડ પર હવાનું દબાણ પણ વધારે હોય છે, જે માઇલેજને પણ અસર કરે છે.

ખોટા ગિયર પસંદગી - ઓછી સ્પીડએ હાઇ-ગિયરમાં અથવા હાઇ સ્પીડએ ઓછા ગિયરમાં વાહન ચલાવવાથી એન્જિન પર ભાર પડે છે. આનાથી ફ્યુલની બચત પણ ઓછી થાય છે. તેથી, હંમેશા યોગ્ય સમયે ગિયર્સ શિફ્ટ કરો અને યોગ્ય ગિયરમાં વાહન ચલાવો.

વારંવાર બ્રેક અને એક્સિલરેટર લગાવવું - સ્પીડ અચાનક વધારવી અને પછી અચાનક બ્રેક મારવી એ માઇલેજનો સૌથી મોટો દુશ્મન છે. આને રેશ ડ્રાઇવિંગ કહેવામાં આવે છે, જે ફ્યુલનો બગાડ કરે છે.

વધુ સારા માઇલેજ માટે ટિપ્સ

ક્રુઝ કંટ્રોલનો ઉપયોગ કરો - જો તમારી કારમાં ક્રુઝ કંટ્રોલ હોય, તો તેનો ઉપયોગ હાઇવે પર કરો. તે એકસરખી સ્પીડ જાળવી રાખે છે, જેનાથી ફ્યુલની બચત થાય છે.

ટાયર પ્રેશર - યોગ્ય ટાયર પ્રેશર જાળવો. હવાનું ઓછું દબાણ ઘર્ષણ વધારે છે, જે માઇલેજ ઘટાડે છે. હંમેશા તમારા ટાયર મેન્યુફેક્ચર કંપની દ્વારા જણાવેલ ટાયર પ્રેશર જાળવીને રાખો.

AC નો યોગ્ય ઉપયોગ - હાઇ-સ્પીડએ બારીઓ ખુલ્લી રાખીને વાહન ચલાવવાથી હવા ખેંચાય છે. આવી પરિસ્થિતિઓમાં, બારીઓ ખોલવા કરતાં AC ચલાવવું વધુ સારું છે. જોકે, ઓછી શહેરી સ્પીડએ AC બંધ કરવાથી માઇલેજમાં સુધારો થઈ શકે છે.