LPG Crisis: વર્તમાન સમયમાં વધતી જતી મોંઘવારી અને એલપીજી (LPG) ગેસના ભાવમાં ઝીંકાયેલા વધારાને કારણે સામાન્ય મધ્યમવર્ગીય પરિવારો માટે રસોડું ચલાવવું એક મોટો પડકાર બની રહ્યો છે. ગૃહિણીઓ હંમેશા એવા ઉપાયો શોધતી હોય છે જેનાથી ગેસની બચત થાય અને ઘરના સભ્યોને પૌષ્ટિક ખોરાક પણ મળી રહે. બીજી તરફ, આજના ભાગદોડ ભર્યા જીવનમાં લોકો પાસે લાંબો સમય રસોડામાં ઊભા રહેવાનો સમય પણ નથી. આ બંને સમસ્યાઓના સ્માર્ટ ઉકેલ તરીકે હવે 'ક્વિક કુકિંગ' (Quick Cooking) નો ક્રેઝ વધ્યો છે. આજે અમે તમને એવી 6 સ્વાદિષ્ટ વાનગીઓ વિશે જણાવીશું જે માત્ર 5 મિનિટના ગેસ વપરાશમાં તૈયાર થઈ જાય છે, જેનાથી તમારો સમય અને કિંમતી ઈંધણ બંને બચશે.
આ વાનગીઓની ખાસિયત એ છે કે, તે બનાવવામાં જેટલી સરળ છે, ખાવામાં તેટલી જ હેલ્ધી અને પ્રોટીનથી ભરપૂર છે. ઓટ્સથી લઈને પનીર અને ઈંડા સુધીની આ વાનગીઓ ડાયેટ કરનારાઓ માટે પણ શ્રેષ્ઠ વિકલ્પ સાબિત થઈ શકે છે. જો તમે પણ સ્માર્ટ કુકિંગ દ્વારા ગેસ બિલમાં કાપ મૂકવા માંગતા હોવ, તો નીચે મુજબની ઝટપટ બનતી રેસિપીઝ આજે જ ટ્રાય કરી શકો છો.
1. ફ્રોઝન વેજીટેબલ્સ સાથે મસાલા રોલ્ડ ઓટ્સ
રોલ્ડ ઓટ્સ પરંપરાગત ઓટ્સ કરતા ઘણા ઝડપથી ચઢી જાય છે. તેને બનાવવા માટે ગેસ પર એક પેન ગરમ કરી તેમાં વટાણા અને ગાજર જેવી ફ્રોઝન શાકભાજીને માત્ર બે મિનિટ સાંતળી લો. ત્યારબાદ તેમાં પાણી અને ઓટ્સ ઉમેરો. ઉકળતા પાણીમાં ઓટ્સ ખૂબ જ ઝડપથી નરમ થઈ જાય છે, જેનાથી ગેસનો વપરાશ નહિવત થાય છે.
2. પનીર અને બેલ પેપર સ્ટીર-ફ્રાય
પનીર એક એવું સુપરફૂડ છે જેને વધુ પકવવાની કે ઉકાળવાની જરૂર હોતી નથી. ક્યુબ્સમાં કાપેલું પનીર અને શિમલા મરચાંને તેજ આંચ પર માત્ર ત્રણ મિનિટ સુધી સાંતળી લો. આનાથી શાકભાજીનો ક્રંચ (કુરકુરાપણું) જળવાઈ રહેશે અને પનીરનો સ્વાદ પણ જબરદસ્ત આવશે. આ વાનગી પ્રોટીનનો બેસ્ટ સોર્સ છે.
3. ક્લાસિક ગુજરાતી પૌઆ
પૌઆ એ સવારના નાસ્તા માટે સૌથી હળવો અને ઝડપી વિકલ્પ છે. પૌઆને પલાળીને સોફ્ટ કરી લો. ત્યારબાદ પેનમાં તેલ મૂકી રાઈ, લીમડો અને સીંગદાણાનો વઘાર કરો. આ આખી પ્રક્રિયામાં માત્ર ૪ મિનિટનો સમય લાગે છે. પૌઆ ઉમેર્યા બાદ ગેસ બંધ કરીને વરાળમાં પણ તેને થોડીવાર રહેવા દઈ શકાય છે.
4. સોજી વેજીટેબલ સલાડ (કુસકુસ સ્ટાઈલ)
સોજીને રાંધવા માટે ગેસ ચાલુ રાખવાની જરૂર નથી. કોરી સોજી પર ઉકળતું ગરમ પાણી નાખી તેને ૫ મિનિટ ઢાંકીને રાખી દો, તે પોતાની મેળે જ ફૂલી જશે. આ દરમિયાન માત્ર ૩ મિનિટ માટે મકાઈ કે ડુંગળી સાંતળીને તેમાં મિક્સ કરી દો. આ એક ઉત્તમ લો-કેલરી સલાડ તૈયાર થઈ જશે.
5. પાલક-ઈંડાની ક્વિક ભુરજી
ઈંડા અને પાલક બંને સેકન્ડોમાં પાકી જાય છે. પેનમાં તેલ અને મસાલા ગરમ કરી તેમાં ફેંટેલા ઈંડા અને ઝીણી સમારેલી પાલક ઉમેરો. ૩ મિનિટ હલાવ્યા બાદ ગેસ બંધ કરી દો, પેનની બાકી રહેલી ગરમીમાં જ ઈંડા પૂરેપૂરા પાકી જશે. આનાથી પાલકના પોષક તત્વો પણ બચશે અને ગેસ પણ.
6. ચટપટી વઘારેલી ચણા ચાટ
જો તમારી પાસે બાફેલા ચણા તૈયાર હોય, તો આ વાનગી ૨ થી ૩ મિનિટમાં બની જાય છે. પેનમાં જીરું-આદુનો વઘાર કરી ચણાને માત્ર ગરમ કરી લો. ત્યારબાદ ગેસ બંધ કરીને તેમાં કાચા ટામેટા, ડુંગળી અને ચાટ મસાલો ઉમેરો. આ એક તેલ મુક્ત અને હેલ્ધી સ્નેક છે.
