IPL 2026 : IPL 2026 ની આતુરતાથી રાહ જોઈ રહેલા ક્રિકેટ પ્રેમીઓ માટે ભારતીય ક્રિકેટ કંટ્રોલ બોર્ડ (BCCI) એ એક શાનદાર સમાચાર આપ્યા છે. જો તમે સ્ટેડિયમ જઈને મેચ નથી જોઈ શકતા, તો ચિંતા કરવાની જરૂર નથી. BCCI એ 15 અલગ-અલગ શહેરોમાં 'ફેન પાર્ક' શરૂ કરવાની જાહેરાત કરી છે. અહીં ફેન્સ વિશાળ એલઇડી (LED) સ્ક્રીન પર લાઈવ મેચનો આનંદ સંપૂર્ણપણે ફ્રીમાં માણી શકશે.
IPL 2026 ની શરૂઆત
IPL ની 19 મી સીઝનનો પ્રારંભ 28 માર્ચ, 2026 થી થવા જઈ રહ્યો છે. ટુર્નામેન્ટની પ્રથમ મેચ ડિફેન્ડિંગ ચેમ્પિયન રોયલ ચેલેન્જર્સ બેંગ્લોર (RCB) અને સનરાઇઝર્સ હૈદરાબાદ (SRH) વચ્ચે રમાશે. મેચની ટિકિટો માટે ભારે પડાપડી થઈ રહી છે, ત્યારે ફેન પાર્કની જાહેરાતથી સામાન્ય ફેન્સમાં ખુશીનો માહોલ જોવા મળી રહ્યો છે.
ફેન પાર્કની ખાસિયતો
BCCI દર વર્ષે આ પ્રકારના ફેન પાર્કનું આયોજન કરે છે, જેથી ક્રિકેટનો ક્રેઝ દરેક ગામ સુધી પહોંચી શકે. આ ફેન પાર્કમાં માત્ર મોટી સ્ક્રીન પર મેચ જ નથી બતાવવામાં આવતી, પરંતુ ત્યાં પરિવાર અને મિત્રો માટે પૂરતું મનોરંજન પણ હોય છે. આ સ્થળોએ કિડ્સ ઝોન, ફેમિલી ઝોન, ખાણી-પીણીના સ્ટોલ અને જીઓ સિનેમા (JioCinema) એક્સપિરિયન્સ ઝોન પણ બનાવવામાં આવે છે, જે તમને સ્ટેડિયમ જેવો જ અહેસાસ કરાવે છે.
પ્રથમ તબક્કાનું શેડ્યૂલ
BCCI એ હાલમાં પ્રથમ ત્રણ અઠવાડિયા માટે ફેન પાર્કનું લિસ્ટ જાહેર કર્યું છે. 28 માર્ચથી શરૂ થતા આ આયોજનમાં 11 રાજ્યોના 15 શહેરોને આવરી લેવામાં આવ્યા છે. આ શહેરોમાં રહેતા લોકો શનિવાર અને રવિવારની રજાઓમાં લાઈવ મેચનો મફત આનંદ માણી શકશે.
કયા શહેરમાં ક્યારે યોજાશે?
28-29 માર્ચ (પહેલું અઠવાડિયું) : રોહતક, ભોપાલ, તુમાકુરુ, નાગપુર અને કૃષ્ણા નગર.
4-5 એપ્રિલ (બીજું અઠવાડિયું) : મથુરા, જોધપુર, નિઝામાબાદ, મૈસુરુ અને ભુવનેશ્વર.
11-12 એપ્રિલ (ત્રીજું અઠવાડિયું) : મેરઠ, નડિયાદ, રત્નાગિરી, કોઈમ્બતુર અને રાઉરકેલા.
