Ayushman Sarathi WhatsApp Service: દેશમાં આરોગ્ય સેવાઓને વધુ સરળ, ઝડપી અને ટેકનોલોજી આધારિત બનાવવા માટે કેન્દ્ર સરકારે મહત્વપૂર્ણ પગલું ભર્યું છે. કેન્દ્રીય આરોગ્ય અને પરિવાર કલ્યાણ મંત્રી જે.પી. નડ્ડાએ સામાન્ય નાગરિકોને વધુ સુલભ અને પારદર્શક આરોગ્ય સેવાઓ ઉપલબ્ધ કરાવવા માટે અનેક નવી ડિજિટલ પહેલોનું લોન્ચિંગ કર્યું છે. આ પહેલોનો મુખ્ય હેતુ લોકોને સરકારી કચેરીઓના ધક્કા ખાવાથી મુક્તિ આપીને મોબાઇલ અને ડિજિટલ પ્લેટફોર્મ મારફતે આરોગ્ય સેવાઓ સુધી સરળ પહોંચ સુનિશ્ચિત કરવાનો છે. નવી પહેલોમાં WhatsApp આધારિત 'આયુષ્માન સારથી' ચેટબોટ, આરોગ્ય સેતુ 2.0, યુનિફાઇડ હેલ્થ ઇન્ટરફેસ (UHI), રાષ્ટ્રીય એમ્બ્યુલન્સ સેવા માર્ગદર્શિકા, સુમન રોડમેપ 2030 તેમજ એનિમિયા મુક્ત ભારત અભિયાન જેવી મહત્વપૂર્ણ યોજનાઓનો સમાવેશ થાય છે. સરકારનું માનવું છે કે આ સેવાઓ ડિજિટલ હેલ્થ ઇકોસિસ્ટમને મજબૂત બનાવશે અને સામાન્ય નાગરિકો માટે આરોગ્ય વ્યવસ્થાને વધુ નાગરિકમૈત્રી બનાવશે.
વિકસિત ભારત 2047ના વિઝન સાથે આરોગ્ય ક્ષેત્રે નવી પહેલ
નવી સેવાઓના પ્રારંભ પ્રસંગે કેન્દ્રીય આરોગ્ય મંત્રી જે.પી. નડ્ડાએ જણાવ્યું હતું કે સ્વસ્થ નાગરિકો વિના વિકસિત ભારતનું સ્વપ્ન પૂર્ણ થઈ શકે નહીં. તેમણે કહ્યું કે વર્ષ 2047 સુધી ભારતને વિકસિત રાષ્ટ્ર બનાવવા માટે મજબૂત આરોગ્ય માળખું અનિવાર્ય છે અને ડિજિટલ ટેકનોલોજી આ પરિવર્તનનો મહત્વપૂર્ણ આધારસ્તંભ બની રહી છે. તેમણે જણાવ્યું કે, ડિજિટલ આરોગ્ય સેવાઓના વિસ્તરણથી લોકોને સમય અને ખર્ચ બંનેમાં રાહત મળશે તેમજ સેવાઓ વધુ પારદર્શક અને અસરકારક બનશે. સરકાર આરોગ્ય સેવાઓને લોકોના ઘર સુધી પહોંચાડવાના પ્રયાસોને સતત વેગ આપી રહી છે.
આ પણ વાંચો: હવે ₹10,000થી વધુ રકમ ઓનલાઇન ટ્રાન્સફર કરવા પર થશે વિલંબ : સાયબર ફ્રોડ પર લગામ કસવા RBIનો મોટો પ્રસ્તાવ
આયુષ્માન સારથી WhatsApp ચેટબોટ શું કામ કરશે?
સરકારે શરૂ કરેલો 'આયુષ્માન સારથી' WhatsApp ચેટબોટ લાભાર્થીઓ માટે એક મહત્વપૂર્ણ સુવિધા સાબિત થઈ શકે છે. આ ચેટબોટ દ્વારા લોકો કોઈપણ સમયે અને કોઈપણ સ્થળેથી આયુષ્માન ભારત યોજના સંબંધિત માહિતી મેળવી શકશે. લાભાર્થીઓ પોતાની પાત્રતા ચકાસી શકશે, આયુષ્માન કાર્ડ માટે અરજી કરી શકશે, કાર્ડ ડાઉનલોડ કરી શકશે તેમજ e-KYC પ્રક્રિયા પૂર્ણ કરી શકશે. આ ઉપરાંત આધાર કાર્ડ લિંક કરવાની, PM-JAY કાર્ડને લોક અથવા અનલોક કરવાની અને અન્ય વિવિધ સેવાઓનો લાભ પણ સરળતાથી મેળવી શકાશે. 70 વર્ષથી વધુ ઉંમરના વરિષ્ઠ નાગરિકો માટે શરૂ કરવામાં આવેલી આયુષ્માન વાયા વંદના યોજના સાથે જોડાયેલી સેવાઓ પણ આ ચેટબોટ મારફતે ઉપલબ્ધ કરાવવામાં આવશે.
સારવારનો ઇતિહાસ, બેલેન્સ અને હોસ્પિટલની માહિતી પણ મળશે
આયુષ્માન સારથી દ્વારા લાભાર્થીઓ પોતાનો ઉપલબ્ધ સારવાર બેલેન્સ જાણી શકશે તેમજ અત્યાર સુધી થયેલી સારવારનો સંપૂર્ણ ઇતિહાસ પણ જોઈ શકશે. આ ઉપરાંત નજીકની પેનલવાળી હોસ્પિટલ શોધવાની સુવિધા પણ ઉપલબ્ધ રહેશે. જો કોઈ લાભાર્થીને સેવા સંબંધિત ફરિયાદ હોય તો તે સીધા જ ફરિયાદ નોંધાવી શકશે અને તેની સ્થિતિનું ટ્રેકિંગ પણ કરી શકશે. ઉપરાંત કોલબેકની વિનંતી કરવાની તેમજ હોસ્પિટલમાંથી ડિસ્ચાર્જ થયા બાદ પ્રતિસાદ આપવાની વ્યવસ્થા પણ ઉપલબ્ધ કરાવવામાં આવી છે. સરકારનું કહેવું છે કે, WhatsApp જેવા વ્યાપકપણે ઉપયોગમાં લેવાતા પ્લેટફોર્મ દ્વારા આરોગ્ય સેવાઓને વધુ સરળ અને લોકોની પહોંચમાં લાવવાનો પ્રયાસ કરવામાં આવ્યો છે.
આરોગ્ય સેતુ 2.0 હવે વ્યક્તિગત હેલ્થ રેકોર્ડ પ્લેટફોર્મ
કેન્દ્રીય આરોગ્ય મંત્રીએ આરોગ્ય સેતુ 2.0નું પણ લોન્ચિંગ કર્યું છે. કોરોના મહામારી દરમિયાન લોકપ્રિય બનેલી આરોગ્ય સેતુ એપ હવે વધુ વિસ્તૃત સ્વરૂપમાં રજૂ કરવામાં આવી છે. નવી આવૃત્તિ હવે માત્ર રસીકરણ માહિતી પૂરતી મર્યાદિત નહીં રહે, પરંતુ વ્યક્તિગત આરોગ્ય રેકોર્ડનું સંચાલન કરવા માટે ડિજિટલ પ્લેટફોર્મ તરીકે પણ કાર્ય કરશે. લોકો આરોગ્ય વીમા કવરેજ, ક્લેમની સ્થિતિ અને અન્ય આરોગ્ય સંબંધિત વિગતો એક જ સ્થળે જોઈ શકશે. આયુષ્માન ભારત ડિજિટલ મિશન અંતર્ગત વિકસાવવામાં આવેલી આ સેવા દ્વારા લોકો ABHA ID બનાવી શકશે, પોતાના આરોગ્ય રેકોર્ડનું ડિજિટલ સંચાલન કરી શકશે તેમજ હોસ્પિટલોમાં સરળતાથી ડિજિટલ નોંધણી પણ કરાવી શકશે.
UHI દ્વારા મળશે એક ક્લિકમાં આરોગ્ય સેવાઓ
સરકારે યુનિફાઇડ હેલ્થ ઇન્ટરફેસ (UHI) પણ લોન્ચ કર્યું છે, જે દેશના ડિજિટલ આરોગ્ય માળખાને વધુ મજબૂત બનાવશે. આ પ્લેટફોર્મ દર્દીઓને વિવિધ ચકાસાયેલ આરોગ્ય સેવાઓ શોધવા, બુક કરવા અને તેનો લાભ મેળવવાની સુવિધા આપશે. UHI એક ઇન્ટરઓપરેબલ ડિજિટલ નેટવર્ક તરીકે કાર્ય કરશે, જેના કારણે લોકોને માત્ર એક જ એપ્લિકેશન પર આધારિત રહેવાની જરૂર નહીં પડે. વિવિધ ડિજિટલ પ્લેટફોર્મ વચ્ચે સુમેળ સ્થાપિત કરીને આરોગ્ય સંબંધિત માહિતી અને સેવાઓ સરળતાથી ઉપલબ્ધ થશે. કેન્દ્ર સરકારનો વિશ્વાસ છે કે, આ નવી ડિજિટલ પહેલો આરોગ્ય ક્ષેત્રમાં ટેકનોલોજી આધારિત પરિવર્તન લાવવામાં મહત્વપૂર્ણ સાબિત થશે અને નાગરિકોને વધુ સુવિધાજનક, પારદર્શક અને કાર્યક્ષમ આરોગ્ય સેવાઓ ઉપલબ્ધ કરાવવામાં મદદરૂપ બનશે.
