ડેનમાર્કની પ્રતિષ્ઠિત કંપની Awake Boards દ્વારા પાણી પર સવારી કરવા માટે એક અત્યંત આધુનિક અને હાઈ-ટેક ઇલેક્ટ્રિક વ્હીકલ રજૂ કરવામાં આવ્યું છે, જેનું નામ Awake Navi છે. જર્મનીમાં આયોજિત પ્રતિષ્ઠિત Boot Düsseldorf શોમાં તેને લોન્ચ કરવામાં આવી છે. દેખાવમાં આ વાહન એક સ્પોર્ટ્સ મોટરસાઈકલ જેવું લાગે છે, પરંતુ તેની વિશેષતા એ છે કે તે રસ્તા પર નહીં પણ દરિયા કે નદીના મોજાંઓની ઉપર ઉડતી ચાલે છે. સામાન્ય બોટ કે જેટ-સ્કીની સરખામણીએ આ ટેકનોલોજી એકદમ અલગ છે, કારણ કે તે પાણીની અંદર રહેવાના બદલે સપાટીથી થોડે ઉપર હવામાં તરતી હોય તેવો અનુભવ કરાવે છે.
હાઈડ્રોફોઈલ ટેક્નોલોજીથી પાણી પર કેવી રીતે ઉડે છે?
Awake Naviની સૌથી મોટી ખાસિયત તેની Hydrofoil ટેક્નોલોજી છે. આ વાહનની નીચે ખાસ પ્રકારના પંખ (Foil) લગાવવામાં આવ્યા છે. જ્યારે તે પાણીમાં એક નિશ્ચિત ગતિ પકડે છે, ત્યારે આ પંખ આખી મોટરસાઈકલને પાણીની સપાટીથી ઉપર ઉઠાવી લે છે. આ પ્રક્રિયાને કારણે પાણીનો અવરોધ (Drag) ઘટી જાય છે અને મુસાફરી અત્યંત સ્મૂધ બની જાય છે. મોજાંઓના ઝટકા અનુભવાતા નથી અને સવારને એવું લાગે છે કે તે પાણી પર હવામાં ઉડી રહ્યો છે.
બાઈક ચલાવવા જેવો જ સરળ અનુભવ
Awake Naviની ડિઝાઇન એવી રીતે તૈયાર કરવામાં આવી છે કે સવાર તેના પર મોટરસાઈકલની જેમ બેસી શકે છે. જે લોકોને બાઈક ચલાવતા આવડતું હોય તેમના માટે આ વાહન ચલાવવું ખૂબ જ સરળ છે. તેના હેન્ડલ પર જ થ્રોટલ (એક્સિલરેટર) આપવામાં આવ્યું છે, જેનાથી તેની સ્પીડ નિયંત્રિત કરી શકાય છે. સુરક્ષા માટે તેમાં કિલ સ્વિચ અને પાછળ જવા માટે રિવર્સ ગિયરની સુવિધા પણ છે. હેન્ડલની વચ્ચે એક સ્માર્ટ સ્ક્રીન લગાવવામાં આવી છે જે નેવિગેશન અને બેટરી લેવલની માહિતી આપે છે.
પાવરફુલ બેટરી અને ઈકો-ફ્રેન્ડલી મુસાફરી
આ વોટર મોટરસાઈકલ સંપૂર્ણપણે ઇલેક્ટ્રિક છે, જેના કારણે તે કોઈ પણ પ્રકારનો અવાજ કે પ્રદૂષણ કરતી નથી. જો તેમાં મોટી XR4 બેટરીનો ઉપયોગ કરવામાં આવે તો તે સિંગલ ચાર્જ પર 3 કલાક સુધી ચાલી શકે છે, જ્યારે નાની LR4 બેટરી 1.5 કલાકનો બેકઅપ આપે છે. એન્જિન વગરની આ સવારી પાણીમાં એકદમ શાંતિથી પસાર થાય છે.
કાર્બન કમ્પોઝિટ બોડી અને વજન ક્ષમતા
આ વાહનને મજબૂત અને હલકું બનાવવા માટે Carbon Composite મટીરિયલનો ઉપયોગ કરવામાં આવ્યો છે. તેના પંખ જરૂરિયાત મુજબ ફોલ્ડ કરી શકાય છે, જેથી તેને ઓછા ઊંડા પાણીમાં પણ લઈ જઈ શકાય છે. Awake Navi પર એક અથવા બે વ્યક્તિ સવારી કરી શકે છે. તેની મહત્તમ વજન વહન કરવાની ક્ષમતા 250 કિલોગ્રામ છે. જો કોઈ વ્યક્તિ એકલા સવારી કરવા માંગતી હોય તો તે સાઈડના ફ્લોટ ટ્યુબ્સ હટાવી શકે છે, જેનાથી વાહન વધુ સ્લિમ અને ઝડપી બની જાય છે.
