બાંગ્લાદેશમાં હિંદુ વિરોધી હિંસા સતત વધતી જાય છે. છેલ્લા દોઢ મહિનાથી હિંદુઓને નિશાન બનાવી તેમને ક્રુરતા પૂર્વક મારવામાં આવી રહ્યા છે. આવોજ એક બનાવ બાંગ્લાદેશના રાજબારી જિલ્લામાં બન્યો છે જ્યાં ફ્યુઅલ પેમેન્ટના વિવાદમાં ફસાતા એક હિંદુ કર્મચારીને કાર નીચે કચડીને મારી નાખવામાં આવ્યો. આ ઘટના 17 જાન્યુઆરી 2026ના રોજ સવારે લગભગ 4:30 વાગ્યે ગોલાંડા મોર વિસ્તારમાં આવેલી કરીમ ફિલિંગ સ્ટેશન પર બની હતી. પીડિતનું નામ રિપોન સાહા (30 વર્ષ) છે, જે પેટ્રોલ પંપ પર કર્મચારી તરીકે કામ કરતા હતો.
પોલીસ અને પ્રત્યક્ષદર્શીઓના જણાવ્યા મુજબ, એક કાળી લેન્ડ ક્રુઝર SUVમાં આવેલા ગ્રાહકે લગભગ 5,000 ટાકા (આશરે 3,710 ભારતીય રૂપિયા)નું ફ્યુઅલ ભરાવ્યું હતું. ત્યારબાદ ડ્રાઈવર પેમેન્ટ કર્યા વિના જ વાહનને લઈને જવા માંગતો હતો. રિપોનએ વાહનને અટકાવવાનો પ્રયાસ કર્યો અને તેની આગળ ઉભો રહ્યો. આ દરમિયાન વાહનના ચાલકે રિપોન ઉપર જ કાર ચઢાવી દીધી અને ઘટનાસ્થળેથી રફ્ફુચક્કર થઇ ગયો, જેના કારણે રિપોન ત્યાં જ જીવ ગુમાવી બેઠો.
આ ઘટનાના આરોપી તરીકે બાંગ્લાદેશ નેશનલિસ્ટ પાર્ટી (BNP)ના પૂર્વ નેતા અને તેની યુવા વિંગ જુબો દલના સભ્ય અબુલ હાશેમ તથા ડ્રાઈવર કમલ હોસૈનની ઓળખ કરવામાં આવી છે. પોલીસે અબુલ હાશેમની ધરપકડ કરી લીધી છે અને તેમની વિરુદ્ધ હત્યાનો કેસ નોંધવાની તૈયારી કરી રહી છે. રાજબારી સદર પોલીસના વડા ખોન્ડકર ઝિયાઉર રહેમાને જણાવ્યું કે, "કર્મચારીએ પેમેન્ટ વિના જતા વાહનને અટકાવવાનો પ્રયાસ કર્યો હતો, પરંતુ આરોપીઓ એને કચડીને ભાગી ગયા."
બાંગ્લાદેશમાં અલ્પસંખ્યક હિંદુઓ પર થતા હુમલાઓ સતત વધતા જાય છે. તાજેતરમાં જ કાલીગંજ વિસ્તારમાં એક હિંદુ વેપારીને માર મારવામાં આવ્યો હતો અને કાઝીપુર જિલ્લામાં 60 વર્ષીય હિંદુ વ્યક્તિ લીટોન ચંદ્ર ઘોષની નાના વિવાદમાં હત્યા કરવામાં આવી હતી. આવી ઘટનાઓથી હિંદુ સમુદાયમાં ભયનું વાતાવરણ ફેલાયું છે.
પોલીસ તપાસમાં CCTV ફૂટેજની મદદ લેવામાં આવી રહી છે, જેમાં ઘટનાના દ્રશ્યો કેપ્ચર થયા છે. આ ઘટના અંગે આંતરરાષ્ટ્રીય સ્તરે પણ ચિંતા વ્યક્ત કરવામાં આવી છે.
